¹ Kateninan jo gereja Antiokiaan, injene unsa' mintuari nabi nana guruun. Ari naan asonan Barnabas, Simeon (ikalong i Niger), Lusius dari Kirene, Manaen (Saurun gulungan maena Herodes Raja banua), nana i Saulus. ² Samentara tanga' sambayanga jo Tuhanan nana puasaan, Roh Kudusan bada, " Khususkan tiang taku' Barnabas nana i Saulusan, ari naan kukalong to' kumeang karaja." ³ Mamin puasa, badoa, nana manumpangang tangan jo iboa ari naan, ari naan tangkat idutus. ⁴ Dabarikan i Barnabas nana i Saulusan malola'i jo Roh Kudusan malamba'i Selukia; dari injene ari naan balayar jo pulau Siprusan. ⁵ Saat mondok jo kota Salamisan, ari naan mamadang Firman Tuhan jo ambat Sinagogeen Yahudiin. Daturuni kole' Yohanes Markus. ⁶ Waktu mangulilingi ambat pulau mondok jo Pafosan, ari naan sidua' nana tuu muna' patoangan, nabi ba'barek urang Yahudi, Bar Yesus asonan. ⁷ Tuu muna' patoangan niin bagulungan nana gubernuran, Sergius Paulus, tuu ma'matap. Baba'an niin maloong jo i Barnabasan nana i Paulus, kole' to' mandalinga Firman Tuhanna. ⁸ Tapi Elimas, "tuu muna' patoang" (katenanna iasonan) manantang jo ari naan; Dakoi'a gubernuran naan manto' injua parasaya'. ⁹ Tapi i Paulusan, yang iasonan busi i Paulus dapano'i kole' Roh Kudusan, mambele jooan, ¹⁰ lo'a, " Ingkoon, anak jalu baraatko, apano' ate nuun kole' jalu baraatan. Ingkoon naan musua jalu mam ko. Injuko kala' baranti mamutar balikkan dalana Tuhan yang bujuran, inju de' katenanna? ¹¹ Belena, tangan Tuhan bo mo'angan mukuman jonuun, ingkoon mo' jaji bautako. Injunao dapat mita mata'aso lunna niin mo'." Laloang araunana mataan; barik nyadi kuliling manyari tuu to' mibit jooan. ¹² Mamin dakita kole' gubernur aika yang terjadiin, iaan parasaya', iaan taranyan kole' jalu iajarangan mangana'i Tuhan. ¹³ Kateninan i Paulusan nana ara gulunganna balayar dari Pafos mondok jo Pergaan jo banua Pamfilia. Tapi darantang kole' Yohanes barik ari naan mole' balik katin jo Yerusaleman. ¹⁴ I Paulusan nana ara gulungana lamba' dari Perga mamin naan mondok jo Antiokia banua Pisidia. Injene ari naan lamba' jo Langko Alatalaan aso Sabbatan barik duduk injene. ¹⁵ Mamin mambasa Taurat nana kitab ara Nabiin, ara pamimpin dari Langko Alatala naan mananya'," Ara saurun, kalau injene jalu to' ipadang ingkin tiang ta' tuu indi', padaanga ingkin." ¹⁶ Barikan kadeng i Paulusan mameang tanda nana tangana; kada'an, "Ingkinan urang Israel nana ingkin yang manghormati Alatalaan, tantalingana. ¹⁷ Alatala'a urang Israelan mile' jo ara tamatoa jolo ka'an maniang bansa ka'an lele' ambat salunna tio' jo tana' mesiran, nana tanganna yang kuatan, Iaan mamimpin jo ari naan maruan. ¹⁸ Sakitar ampat pulo' taun dauna'a ari naan jo padang gurunan.(Jo salinan joloon ibasa," sakitar ampat pulo' taun Iaan mamiara jo ari naan jo padang gurunan.")* ¹⁹ Mamin manyaapang tujuh suku bansa dari Kanaan, Iaan mameang tana'an nande' joka'an jaji waris ka'. Kajadian ninde' labi na dari empat ratus lima puluh taun. ²⁰ Mamin naan, Alatalaan mameang jo arinaan ara hakim mondok jo i Samuelan sang nabi. ²¹ Mamin naan rakyatan mamita mangkat raja, barikan Alatalaan mameang jo ari naan i Saul bin Kish, dari suku Benyamin, datiang raja salunna ampat pulo' taunan. ²² Mamin dasosorang dari jabatan rajaan kole' Tuhanan, Iaan mangkat jo i Daudtan jaji raja'a ari naan. Mangana'i i Daudtan arinaan bada,'Ku-duanga i Daud anaka Isai, jaji baba yang mangertiin isi' ateku', to' malola'i kato'an-Ku.' ²³ Dari kanturunana baba iniin, Alatalaan mameang jo Israelan sera Juruselamat, Yesus, kate yang mamin dajanjikanan Kole'a. ²⁴ Mulaina terjadi kateniinan, jo injuanpi Yesusan mondok, Yohanesan mandongoang ijolo jo ambat mintuariin mangana'i pamandi' monyuro batobat. ²⁵ Saat Yohanesan tanga' bakaraja'a, iaan bada,'Tika'ak lo'nin? Iakan niin boanak Juruselamatan naan, tapi tantalingana, injen bo mo' mondok sera mintuari mamin iak, mambuka' tali sapatua pun injuak pantas.' ²⁶ Ara saurun, anak-anak dari kanturunana Abraham, nana ingkin mansenan yang manyembaaan jo Alatalaan, itujuang joka'an pasan mangana'i keselamatanan iniin. ²⁷ Kole' ara yang la'lako'on jo Yerusaleman, nana ambat pamimpina, inju maku'i Jooan, dabarikan dapano'i nubuatan dari ara nabiin yang ibasaan tiap aso Sabat nana manyalipangan Jooan. ²⁸ Walaupun inju iduang aika yang manyuro' iduno'angan Jooan, ari naan mamita Jo i Pilatusan muno' Jooan. ²⁹ Mamin ari naan mamano'i aika yang itulisan mangana'i Jooa, arii naan pamando Jooan dari kayu salipan barik dapagoleng jo kuburan. ³⁰ Tapi Alatalaan matio' balik Jooan dari intara tuu mateen. ³¹ Iaan ikita unsa' aso lunnan kole' ara yang malola'an Jooan dari Galilea jo Yerusaleman. Ara iniinna yang jaji saksi-sakisiin jo ambat tuu'un. ³² Sampai kateniin ingkaman mawa dongo mam kam mangana'i pakat yang datiangan kole' ara tamatoa jolo ka': ³³ Dapano'ina pakata Alatalaan joka'an, anak-anaka ari naan, nana alasan inanna Yesusan dakatio' balik Kole'a. Iniina busi yang itulisan jo lalam Mazmur keduaan:' Inkona anak babaKu'un, sasoon niin Iakan jaji AmaNuak.' ³⁴ Mangana'i Iaan totongan busi matio' balik Jooan dari tuu mateen nanna mintuarian injunna dapat binasa, Iaan maminna bada kateniin:' Ku meang kin mo' berkat Daud yang kudusan nana pastiin.' ³⁵ Iniinna aika manun iaan busi bada jo Mazmur boanan,' Ingkoon injuko manyuro' Yang kudusan malami kebinasaan.' ³⁶ Mamin i Daudtan melayani kato'ana jo Zamanna, iaan mate, dakuburang nana ara tamatoa joloan, malami kebinasaan, ³⁷ tapi Iaan yang dakatio' balikan kole' Tuhanan injuna malamii kebinasaan. ³⁸ Manto' matoangin, ara saurun, bahawa malaloi tuun niinidongoang pengampunan ambat dosa. ³⁹ Kole'a, setiap tuu yang parasaya'an ipatotong dari ambata hallan yang injuun dasuro' kole' Hukum Musa. ⁴⁰ Waspada nain jo hal yang dapadangan kole' ara nabiin manto' inju terjadi jonuun: ⁴¹ 'Belena, yang panggila'-gila'ankiin, takajutnain barik anyap; Iaakan tanga' bakarajaKu' jo aso ninan, karaja yang injun dapat iparasaya'i ingko, walaupun injene yang padampeangan jonuun." ⁴² Saat i Paulusan nana Barnabas tangkat, ambat tuu mamitaan jo ari naan manyuro' padampeang hal yang samaan jo Sabat imundiin. ⁴³ Mamin pertemuan jo Langko Alatalaan, ambat urang Yahudiin nana penganut agama Yahudiin malola' jo i Paulusan nana Barnabas, yang mamin sipadanan nana ari naan manyuro' jo ari naan tio' jo lalam kasih karunia Tuhan. ⁴⁴ Jo Sabat imundiin, to' akaus tuu lalam kotaan simalo'-malo' to' mandalinga Firman Tuhan. ⁴⁵ Saat ara urang Yahudiin mita ambat tuu simalo-malo', ari naan apais atean barik kadaan silaloan nana yang dapadangan kole' i Paulus nana mangila'-gila'a. ⁴⁶ Tapi nana barania i Paulusan nana Barnabas bada," Penting jaji bahawa Firman Tuhanan harus ipadampeang jonuun ijolo. Mita jonuun manulak Jooan barik ianggapkin inju pantas manarima' tio' kekal, belena, ingkaman mamalinkam jo tuu boanan urang Yahudi. ⁴⁷ Katenanna yang daparintangan kole' Tuhanan jonaman, kalo'a,'Ingkinan Kutiangkin jaji terang jo tuu boanan urang Yahudi, manto' idongoanga ingkin keselamatanan mondok jo ujung bumiin. ⁴⁸ Saat tuu boanan urang Yahudi mandalinga niin, susu nyawa'an nana mamudi Firman Tuhan. Saambat nana yang mamin itentukanan tiang tio' kekal jaji parasaya'. ⁴⁹ Firman Tuhanan idongoang saraa-raa banuaan naan. ⁵⁰ Tapi ambat urang Yahudiin masut tuu yang parasaya'an nana ara bibinge yang dakilalaan kole' tuu'un. Hal iniin manyuro' atimbun tuduhanan jo ara i Paulusan nana Barnabas barik dauser mondok jo batas kotaan. ⁵¹ Tapi i Paulusan nana Barnabas mangibasang debu dari kaia. Barikan ari naan lamba' jo kota Ikonium. ⁵² Ara muridtan dapano'i kole' susu nyawaan nana kekuatan Roh Kudusan.