¹ Ininna kadakuun yang pande iparasaya'i ingkin: Antiin tu'un na'an to dari panilik, iaan muna tujuan yang mamman. ² Katenanbusi iaan inju muna sala, harus borese. Iaan arus sera suangkienbo. Iaan arus bapikiran langke, mam basa'an. Iaan arus dari ulu lamba tambaipilagi pande malambaang tio suangkienna. ³ Iaan boan tu pium, amo suji', basamaamm, tanang inju pande to duit poang. ⁴ Iaan pande malambaang suanglangko'a nana yang maamman, anak-anaka to malola'i na hormat joan. ⁵ Anti'in baba' an-nan inju dapat mator suanglangko'a kadiri, apalagi murus Jemaat Alatala? ⁶ Iaan arus tu yang maamman, injua bongka' mato' injua sala lamba mamin naan alo ilalama palambaan antu garagasiin. ⁷ Iaan arus maam jo pambele tu' isaluanan Jemaat-tan, mato' iaan inju pawa-awa'i, tasaruk jo dalan antu garagasiin. ⁸ Katenanbusi jo diakon-diakon-nan, arus tu yang i-hormatiin, boang tu yang injuun pande iangkam kadaan, atau bapampang lila'an. Arinaan saharussan inju pium mato' injua bongka'. ⁹ Arinaan arus pande mamiara kaparasaya'anna na ate yang boresen. ¹⁰ Arinaan arus dakato'i tu ijolo, inju muna sala, kolea'a arinaan arus malayani tu ambat. ¹¹ Katenanbusi bibingen arus manghormati. Inju pande mamang, arinaan arus moderat, satia tu ilalama samua halan. ¹² Diako-diakon aruslah dari lai dari sera bibinge, dapat malambaang jo anak-anakan na suangkienna nana yang maamman. ¹³ Kole'a intika yang malayani nana yang maamman bua'ana kule'mo panghargaan untukka kadiri na kaparasayaanna jo Yesus Kristus-san. ¹⁴ Samua'an niin kubetek-betekkang jaji, iaakan mo buakuna arien mamondokki jo niin nan. ¹⁵ Do' injuakmo dapat mamondokki, ikarati'i poang mo ingkin yang kutulisan, aikaloa mangalakonni tio ilalama suang langko Alatalaan, inin na Jemaat yang tio'on, yang totongan yang pande ilola'i ingki. ¹⁶ Samua yang dapadangngan naan totong kausana, inju pande isalia: " Iaan manyatakan diri'a ilalama suang muntuarikaan, jo sumangatkaan, dasaksikan kole'a Malaekat, ipandongoang jo antara bansa-bansa, samua banua parasaya,iana kamuli'a'anka'an."