¹ Kwenteka kulinye liSabatha, uma aya endlini yamunye webaholi webaFarisi kuyodla sinkhwa, kutsi bebambukele dvutane. ² Bukani, lapha phambi kwakhe kwakunendvodza lebeyinesifo sekuvuvuka. ³ Jesu wabuta tati temtsetfo emtsetfweni wemaJuda neba Farisi, ''Umtsetfo uyasivumela yini siphilise ngeliSabatha, nome cha?'' ⁴ Kepha bathula dvu. Ngako Jesu wamutsatsa, wamuphilisa, bese wamuhambisa. ⁵ Watsi kubo, ''Ngumuphi kini lonendvodzana nome imbongolo lewele ekhatsi eludzakeni ngelilanga leliSabatha angeke amukhiphe ngaleso sikhatsi?'' ⁶ Behluleka kumnika imphendvulo kuletintfo leti. ⁷ Uma Jesu anaka kuyangani labo bebamenyiwe bakhetse letihlalo lephakeme, wakhuluma umfanekiso, atsi kubo, ⁸ ''Uma umenywe ngumuntfu edzilini lemshado, ungahlali phasi endzaweni lephakeme, ngoba kunemuntfu lomenyiwe loncono kakhulu kunawe. ⁹ Uma lomuntfu lonimemile nobabili afika, utawutsi kuwe, 'Nika lona lomunye umuntfu indzawo yakho,' bese ngemahloni utawuchubeka kuyotsatsa indzawo lephasi. ¹⁰ Kodvwa uma umenyiwe, hamba uhlale phasi endzaweni lephasi, khona uma lona lokumemile eta, utotsi kuwe, 'Mngani, hamba uhlale endzaweni lephakeme.' Utawubese uyahlonipheka ebukhoneni babo bonkhe labahleli etafuleni nawe. ¹¹ Ngoba wonkhe lotiphakamisako utawutitfoba, bese loyo lotitfobako utawuphakanyiswa.'' ¹² Jesu watsi kulendvodza lebeyimmemile, ''Uma unika kudla nome lidzili, ungabamemi bangani bakho nome bobhuti bakho nome tihlobo takho nome bomakhelwane labacebile, ngoba bangahle bakumeme futsi, bese utawubhadaleka. ¹³ Kepha uma wenta lidzili, mema timphuya, tishosha, labangahambi, nalabangaboni, ¹⁴ utawubusiswa, ngoba ngeke bakhone kukubhadala. Ngoba utawubhadalwa ekuvusweni kwalabalungile.'' ¹⁵ Jesu abehleli etafuleni uma munye wabo eva letintfo leti, watsi kuye, ''Lobusisiwe nguloyo lotawudla sinkhwa embusweni waNkulunkulu!'' ¹⁶ Kepha Jesu watsi kuye, ''Lenye indvodza yalungisa lidzili lelikhulu wamema labanyenti. ¹⁷ Ngesikhatsi selilungisiswe lelidzili, watfumela sisebenti sakhe kutsi siyotsi kulabo bebamenyiwe, 'Wotani, ngoba konkhe sekulungele nyalo.' ¹⁸ ''Bonkhe bacala kukhonona ngalokufananako. Lowekucala watsi kuye, 'Ngitsenge lipulazi, futsi kumele ngiphume ngiyolibona. Ngicela ungicolele.' ¹⁹ ''Lomunye watsi, 'Ngitsenge tinkhabi letisihlanu, futsi ngisayawutilinga. Ngicela ungicolisele.' ²⁰ '''Bese lenye indvodza yatsi, 'Ngishade umfati, ngako ke angeke ngite.' ²¹ ''Lesisebenti seta satjela umphatsi waso letintfo leti. Bese umphatsi wendlu uyatfukutsela bese utsi kulesisebenti sakhe, 'Phuma masinyane uye etitaladini nasemacentselweni elidolobha uletse lana timphuya, tishosha, timphumphutse, nalabakhubatekile.' ²² ''Lesisebenti satsi, 'Mnumzane, loko lokushito sekwentiwe, kepha solo kunelikamelo.' ²³ ''Lomnumzane watsi kulesisebenti, 'Phuma uye emigwacweni nasetindleleni bese uyabancenga kutsi bangene, khona indlu yami itogcwala. ²⁴ Ngoba ngitsi kuwe, kute walamadvodza lawa labebamenyiwe labatawudla lelidzili lami.'' ²⁵ Lesicuku lesikhulu manje besihamba naye, wagucuka bese watsi kubo, ²⁶ ''Uma nomangabe ngubani eta kimi futsi angazondi uyihlo wakhe, unina, bantfwana, tinsizwa, bodzadze, ngisho nemphilo yakhe, angeke abe ngumfundzi wami. ²⁷ Loyo longetjasi siphambano sakhe bese uyangilandzela angeke abe ngumfundzi wami. ²⁸ Ngoba lomunye wenu lofisa kwakha umbhoshongo akacali ngekuhlala phasi bese ubala imali atobala kutsi unako yini lakudzingako kukucedza? ²⁹ Ngaphandle kwaloko, uma sekabekile sisekelo bese akasakhoni kucedza, bonkhe labasibonako batocala kumnyonga, ³⁰ batsi, 'Lendvodza lena yacala kwakha yangakhoni kucedza.' ³¹ Noma inkhosi, isahamba kuyohlangana nalenye inkhosi empini, angeke ahlale phasi kucala bese utsatsa imiyalo ngekutsi utawukhona yini kulwa nalelenye inkhosi ngemadvodza langemashumi latinkhulungwane leta lemelane naye netinkhulungwane letingemashumi lamabili emadvodza? ³² Uma angeke, lelelinye libutfo solo lisekhashane, utfumela umgijimi ayocela timo tekuthula. ³³ Ngako ke,noma ngubani kini longadzeli konkhe loko lanako angeke abe ngumlandzeli wami. ³⁴ Luswayi lulungile, kepha uma loluswayi lulahlekelwe bunandzi balo, lungentiwa njani kutsi lube luswayi phindze? ³⁵ Alusenamsebenti walomhlaba nome ngisho manyolo. Luyalahlwa. Loyo lonetindlebe tekuva, akeve.''