¹ Mhla kufika lusuku lwePhentekhosti, bonkhe bebabutsene endzawonye. ² Ngekuphatima kweliso kwehla ezulwini, kwangena umsindvo lokungatsi ngumoya lonemandla logijima ngesivinini lesikhulu wagcwalisa yonkhe lendlu lebebahleti kuyo. ³ Kwase kubonakala kubo tilwimi lekwakungatsi ngumlilo letehlukene tehla tahlala etikwabo ngamunye ngamunye. ⁴ Bagcwatjiswa bonkhe ngaMoya LoNgcwele base bayacala bakhuluma ngaletinye tilwimi, Moya abapha kuphumisela. ⁵ Ngaleso sikhatsi kwakukhona emaJuda labehlala eJerusalema, emadvodza lanebuNkulunkulu, labevela etiveni tonkhe letingaphansi kwelizulu. ⁶ Lomsindvo watsi na uvakala, leticuku tebantfu tabutsana ndzawonye tamane tasangana kutsi kwentekani ngoba lowo nalowo wonkhe umuntfu wativela labantfu bakhuluma ngelulwimi lwakubo. ⁷ Bamangala kakhulu futsi batsatseka; base batsi,' Kambe ecinisweni labantfu labakhulumako abasiwo yini kantsi emaGalile na?' ⁸ Kepha kuya ngani lokutsi sibeva ngamunye ngamunye bakhuluma ngelulwimi lwakitsi lesatalwa nalo, ⁹ emaPhathiya, emaMede nemaElamathisi, nalabo labahlala eMesophothamiya, eJudiya naseKhaphadosiya, ePhontusi naseAsiya, ¹⁰ Frijiya nasePhamfiliya, eGibhithe nasetincenyeni taseLibhiya madvute ne Khurene, netivakashi letichamuka eRoma, ¹¹ emaJuda nemaPhroselithe, baseKhrethe namaArabu, bonkhe labantfu sibeva bakhuluma ngetilwimi takitsi bababata imisebenti lemikhulu yaNkulunkulu". ¹² Bonkhe bamangala bacakeka; batsi kulomunye nakulomunye,' Kusho kutsini loku?' ¹³ Kodvwa labanye babaphukuta batsi,' Laba bagcwele liwayini lelisha'. ¹⁴ Kodvwa Phetro kanye nalaba labanye lebebalishumi nakunye, basukuma bema ngetinyawo wase uphakamisi livi kubo watsi,' Madvodza aseJudiya nani nonkhe lenihlala eJerusalema akwatiwe ngini loku; lalelisisani emavi ami. ¹⁵ Phela labantfu laba abakadzakwa njengobe nitsatsa kanjalo nje, phela kuseseli awa lesitsatfu kusile nje. ¹⁶ Kodvwa loku nguloku lokwakhulunywa ngumprofethi Joweli nakatsi: ' ¹⁷ Kutawenteka ngemalanga ekugcina'. kusho Nkulunkulu,' Ngitawutfululela Moya wami etikwabo bonkhe bantfu. Emadvodzana enu nemadvodzakati enu atawuphrofetha, emajaha enu ayawubona imibono, futsi emakhehla ayawuphupha emaphupho. ¹⁸ Empeleni etikwetisebenti tami nasetikwetisebenti tami letinsikati kulawo malanga ngitawutfululela Moya wami, futsi bayawuphrofetha. ¹⁹ Ngitawuveta timangaliso etulu esibhakabhakeni netibonakaliso phansi emhlabatsini, ingati, umlilo, nekutfunca kwentfutfu. ²⁰ Lilanga liyawugucuka libe bumnyama nenyeti iyawugucuka ibe yingati lungakafiki lusuku lolukhulu lolubabatekako lweNkosi. ²¹ Kuyawenteka ke kutsi wonkhe muntfu lobita libito leNkosi uyawusindziswa. ²² Madvodza akaISrayeli, vanini nankha emagama: Jesu waseNazaretha abeyindvodza lefakazelwe nguNkulunkulu kini ngetento letinkhulukati netimangaliso nangetibonakaliso Nkulunkulu latenta ngaye emkhatsini wenu, njengobe nine matfupha nitatela. ²³ Lendvodza le yanikelwa ngekweluhlelonchanti lwaNkulunkulu nangekwatinchanti; Nine ke, ngesandla semadvodza late umtsetfo, nambulala ngekumbetsela esiphambanweni. ²⁴ Kodvwa Nkulunkulu wamvusa kulabafile, wamkhulula etinhlungwini tekufa, ngoba loko kwakungeke kukhone kumbamba. ²⁵ Phela Davide utsi ngaye,' Ngayibona iNkhosi embikwebuso bami njalo, ngoba ungesekudla sami kute nginganyakatiswa. ²⁶ Ngakoke inhlitiyo yami yajabula nelulwimi lwami lwatfokota. Futsi, inyama yami seyiyawuphila etsembeni. ²⁷ Ngoba ungeke ushiye umphefumulo wami eHayidese, Nalongcwele wakho ungeke umvumele abone kubola. ²⁸ Wembula kimi tindlela temphilo; utawungigcwalisa ngenjabulo ebusweni bakho.' ²⁹ Bazalwane, ngingakhuluma ngesibindzi kini ngakhokho wetfu Davide, kutsi wafa waphindze wangcwatjwa, nekutsi lithuna lakhe lisesemkhatsisini wetfu kute kube kunamuhla. ³⁰ Ngako ke anguphrofethi futsi bekati kutsi Nkulunkulu abefunge ngesishicilelo kuye kutsi uyawuhlalisa titukulwane takhe esihlalweni sakhe. ³¹ Wakubona lokwakutawenteka esikhatsini lesitako wakhuluma nangekuvuka kulabafile kwaKhristu, kutsi bengazange ashiywe eHayidese, futsi ke umtimba wakhe awuzange ukubone kubola. ³² LoJesu lo - Nkulunkulu wamvusa kulabafile, le tsine sonkhe sibofakazi baloko. ³³ Ngako ke, asamphakamise waba ngesekudla saNkulunkulu futsi asamukeliswe Moya loyingcwele labetsenjiswe yena nguBabe, sewutfululele naku lenikubonako nalenikuvako, ³⁴ Phela Davide akazange enyukele ezulwini, kodvwa utsi, 'Inkhosi yatsi eNkhosini yami,' Hlala ngesekudla sami ³⁵ ngize ngente titsa takho tibe senabelo setinyawo takho.' ³⁶ Ngako ke, akutsi ke yonkhe indlu yakaIsrayeli ngekwesiciniseko yati kutsi Nkulunkulu sewumente waba yiNkosi naKhristu, loJesu lenambetsela.' ³⁷ Kwatsi nabakuva loku, bahlabeka etinhlitiyweni tabo, batsi kuPhetro nebaphostoli labanye, ' Bazalwane, sitawentani?' ³⁸ Phetro wase utsi kubo,' Phendvukani nibhabhatiswe, ngamunye ngamunye wenu, egameni laJesu Khristu kute nicolelwe tono tenu, niphindze nemukeliswe sipho lesinguMoya loyingcwele. ³⁹ Phela lesetsembiso lesi senu kanye nebantfwana benu nakubo bonkhe labakhashane, labanyenti nganoba iNkhosi iyawubabita .' ⁴⁰ Ngemagama lamanyenti lehlukene wabafakazela abancengisisa, atsi,' Sindziswani kulesitukulwane lesibi.' ⁴¹ Ngako bemukela emavi akhe base bayabhajatiswa, kwangeteka ngalelo langa imiphefumulo letinkulungwane letintsatfu. ⁴² Batinikela bona lucobo esifundzisweni sebaphostoli nasekuhlanganyeleni, kanye nasekuhlephuleni sinkhwa nasekuthandazeni ⁴³ Bantfu behlelwa kwesaba , netimangaliso kanye netibonakaliso kwakwentiwa baphostoli. ⁴⁴ Bonkhe labakholwako babendzawonye futsi bahlanganyela ngalokufanako kuko konkhe, ⁴⁵ futsi batsengisa ngetakhiwo tabo kanye netintfo tabo, bebabelana bonkhe, kuye ngesidzingo sangamunye ngamunye. ⁴⁶ Ngaloko ke lilanga ngelilanga batinikela bona nganjongo yinye ethempelini. Bahlephulelana sinkhwa emakhaya, bahlephulelana nangekudla ngekujabula nangetinhlitiyo letitfobekile, ⁴⁷ babedvumisa Nkulunkulu futsi batsandzeka kubantfu bonkhe, neNkhosi yayingeta tinombolo tabo ngalababesindziswa.