¹ Pawula, umphostoli waKhristu Jesu ngekwentsandvo yaNkulunkulu, naThimothi umzalwane wetfu, ebandleni laNkulunkulu lelise Korinthe, nakubobonkhe bantfu baNkulunkulu labangcwele labakuso sonkhe sifundza sase-Akhaya. ² Shengatsi umusa ungaba kini kanye nekuthula lokuvela kuNkulunkulu Babe wetfu neNkhosi Jesu Khristu. ³ Shangatsi Nkulunkulu neYise weNkhosi Jesu Khristu angadvunyiswa. UnguYise webubele naNkulunkulu wendvudvuto yonkhe. ⁴ Nkulunkulu usidvudvuta kuto tonkhe tinhlupheko tetfu, kute natsi sitewudvudvuta labo labahlupheka nanoma ngani. Sidvudvuta labanye ngayo leyo ndvudvuto Nkulunkulu layisebentisile kusidvudvuta ngayo. ⁵ Ngako njengobe tinhlupheko taKhristu tivama ngenca yetfu, ngalokunjalo nekudvudvuteka kwetfu kuyavama ngaye Khristu. ⁶ Kodvwa uma sicindzetelwa, kukwekudvudvuteka nekusindziswa kwenu; futsi uma sidvudvutwa, kukwendvudvuto yenu. Indvudvuto yenu isebenta ngemphumelelo nanihlanganyela ngekubeketela kuto tona leto tinhlupheko lesikuto natsi. ⁷ Litsemba letfu macondzana nani alinyakatiswa, ngobe siyati kutsi njengobe nihlanganyela etinhluphekweni , niyahlanganyela futsi nasekudvudvutekeni kwetfu. ⁸ Ngoba asifuni ningete nati, bazalwane, ngetinhlupheko lesaba nato e-Asiya. Sacindzetelwa saphela ngalokungetulu kwemandla etfu kangangekutsi salahlekelwa nalitsemba lekuphila. ⁹ Ngempela, sasinesijubo sekufa etikwetfu. Kepha loko kwasenta kutsi singabeki litsemba kitsi, esikhundleni silibeke kuNkulunkulu, lovusa labafile. ¹⁰ Wasikhululula engotini lebulalako, futsi usetawusikhulula. ¹¹ Utakwenta loku njengoba nani futsi nisisitile ngemithantazo yenu. Ngako labanyenti batawusimelela baletse tibongo ngemusa wekulunga lesanikwa wona ngemithandazo yalabanyenti. ¹² Siyatichenya ngaloku: Nanembeza wetfu ufakazela kutsi sitiphetse kulomhlaba ngebucotfo nangekumesaba Nkulunkulu, singabambeleli enhlakanipheni yenyama kepha emseni waNkulunkulu. ¹³ Asinibhaleli lite leningeke nikhone kulifundza futsi nilicondze, futsi ngiyetsemba nitawucondza ngalokuphelele ¹⁴ njengoba nisivile kancane, kutsi ningatikhukhumeta ngatsi ngalelo langa leNkhosi yetfu Jesu, njengoba sitawutikhukhumeta ngani. ¹⁵ Ngobe ngangicinisekile ngalokutsi, ngangifuna kuta kini kucala, kuze nitakwemukela inzuzo yekuvakashelwa kabili. ¹⁶ Ngangitilungiselela kunivakashela nangiya eMasedoniya. Ngaphindze ngafuna kunivakashela nasengisuka eMasedoniya, ukuze ningiphekeletele endleleni yami kuya eJudiya. ¹⁷ Ngesikhatsi ngicabanga ngalendlela, ngabe ngangingabata yini? Ngabe ngihlela tintfo ngekwelizinga lebantfu, khona ngitawutsi "yebo, yebo" ngiphindze ngitsi "cha, cha" ngasikhatsi sinye? ¹⁸ Kodvwa njengoba Nkulunkulu etsembekile, asibasho kanye kanye bo "yebo" na "cha". ¹⁹ Ngoba Indvodzana yaNkulunku, Jesu Khristu, leyashunyayelwa ngitsi kini mine nginaSilasi naThimothi, ayisuye ''Yebo'' na ''Cha.'' Esikhundleni, wahlale angu ''Yebo.'' ²⁰ Ngoba tonkhe tetsembiso taNkulunkulu tingu ''Yebo'' kuye. Kungako futsi ngaye sitsi ''Amen'' kubeludvumo lwaNkulunkulu. ²¹ Nyalo ke nguNkulunkulu losicinisekisa kuKhristu kanye nani, futsi wasigcoba, ²² wabeka luphawu lwakhe kitsi wasipha futsi naMoya etinhlitiyweni tetfu njengesibambiso saloko lokuseta. ²³ Esikhundleni, ngibita Nkulunkulu atoba ngufakazi wami kutsi sizatfu ngingetanga eKhorinthe kwakungukutsi nginonge. ²⁴ Loku akusiko ngoba sizama kwenta lukholo lwenu lube nguloku lesifuna kutsi lube ngilo. Esikhundleni, sisebenta nani nekujabula kwenu, njengaloku nime nicinile ekukholweni kwenu.