¹ Ngako-ke kwekucala ngiyala kutsi kukhuleka, nekuncusa, nekubonga, akwentelwe bonkhe bantfu. ² emakhosi nabo bonkhe labasetinkhundleni letisetulu, kute sitawuhlala ngekuthula nekwesaba Nkulunkulu ngako konkhe kuhlonipheka. ³ Loku kuhle futsi kuyamukeleka embikwa Nkulunkulu umsindzisi wetfu. ⁴ Ufisa kutsi bonkhe bantfu basindziswe futsi bafinyelele ekulatini liciniso. ⁵ Ngobe munye Nkulunkulu, munye nemlamuli losemkhatsini waNkulunkulu nebantfu, lomuntfu nguKhristu Jesu. ⁶ lowatinikela kutsi abe yinhlawulo yabo bonkhe, loko kwaba bufakazi ngesikhatsi lesifanele. ⁷ ngaleso sizatfu ngiko lengakhetselwa kona kuba ngummemeteli nemphostoli-nginitjela liciniso, angicambi emanga- futsi ngingumfundzisi kubetive ekukholweni nasecinisweni. ⁸ Ngakoke, ngifuna emadvodza kuyo yonkhe indzawo kutsi bathandaze futsi baphakamise tandla tabo letingcwele ate lulaka nembango. ⁹ Kanjalo nebafati kumele bembatse kahle ngekuhlonipheka , hhayi ngemichino, nome ngetingubo letidulile. ¹⁰ Kodvwa bahlobe ngetento letinhle letifanele labasikati labatsi besaba Nkulunkulu. ¹¹ Lomsikati kumele afundze kute umsindvo nangekutfobeka konkhe. ¹² Kodvwa angivumeli kutsi afundzise nome-ke engamele indvodza, kepha akathule. ¹³ Ngobe Adamu wabunjwa kucala, kwase kulandzela Eva. ¹⁴ Futsi Adamu akakohliswanga, kepha ngumfati lowakhohliswa, waphula umtsetfo. ¹⁵ kodvwa umfati uyawusindziswa ngekutala bantfwana, nabahlala ngekuzitsa konkhe ekukholweni, naselutsandvweni, nasekungcwelisweni nekutitsiba.