¹ Pawula, umphostoli waKhristu Jesu ngekuyalwa nguNkulunkulu loyinkhosi nemsindzisi naKhristu Jesu litsemba letfu, ² iya kuThimothi indvodzana sibili ekukholweni: Umusa, nebubele futsi nekuthula lokuvela kuNkulunkulu longuBabe naKhristu Jesu iNkhosi. ³ Njengobe ngakuyala kutsi wente mangihamba ngiya eMasedoniya, Hlala lapho Efesu kute utoyala bantfu labatsite kutsi bangafundzisi infundziso lehlukile. ⁴ Kumele bangatinaki letindzaba nelulibo lwekutalana lolungapheli. loko kuletsa kuphikisana kunekutsi kusite licebo laNkulunkulu, lelingekukholwa. ⁵ Nyalo injongo yemyalo lutsandvo loluphuma enhlitiyweni lehlobile, nakunembeza lomsulwa nasekukholweni lokute kutentisa. ⁶ labanye bantfu bashiye letintfo leti emuva bangenela tinkhulumo letingasiti lutfo. ⁷ Bafuna kuba bafundzisi bemtsetfo, kepha abacondzisisi loko labakushoko nobe labakugcizelela kangaka. ⁸ Kodvwa siyati kutsi umtsetfo ulungile mawusetjentiswa ngendlela lelungile. ⁹ Siyakwati loku, kutsi umtsetfo awentelwanga bantfu labalungile, kepha ubekelwe labangawugcini, nalabangemesabi Nkulunkulu. wentelwe labo lababulala boyise nabonina, babulali, wabekelwa tingwadla, netiphingi, ¹⁰ nebantfu bebulili bunye labalalanako, nebatfumbi bebantfu babente tigcila, bacambimanga, nabofakazi bemanga, nalabo labenta nobeyini lephambene nenfundziso lengiyo. ¹¹ Lenfundziso ivumelana nelivangeli lebukhosi ngilo lelivangeli laNkulunkulu lobusisekile lengaphatsiswa lona mine. ¹² Ngiyabonga khristu Jesu iNkhosi yetfu. Uyangicinisa, wangetsemba wangifaka emsebentini wakhe. ¹³ Ngangingulohlambalatako, ngimtingela, ngiyindvodza lenebudlova. ¹⁴ Kodvwa ngatfola bubele ngobe bengentiwa kungakholwa. ngatfola umusa weNkhosi yetfu wachichima nekukholwa nelutsandvo kuKhristu Jesu. ¹⁵ Lomlayeto wetsembekile futsi ufanelwe ngiko konkhe kwemukwelwa, kutsi Khristu Jesu weta emhlabeni kutosindzisa toni. ¹⁶ Lengingulesikhulu kuto tonkhe. kepha ngaleso sizatfu ngatfola bubele, kute kutsi ngami losembili, Khristu Jesu abonakalise kubeketela kwakhe konkhe. Wakwenta loku njengesibonelo salabo labayawutsembela kuye ngekuphila lokuphakadze. ¹⁷ Kuyo iNkhosi yaphakadze, lengabhubhi, lengabonwa, NKulunkulu lekukuphela kwakhe, akube ludvumo nenkhatimulo phakadze naphakadze. Amen. ¹⁸ Ngibeka lomyalo embikwakho, Thimothi, mtfwanami, kuhambisana netiprofetho taphambilini letashiwo ngawe, kute ulwe kulwa lokuhle, ¹⁹ ubambelele ekukholweni futsi nanembeza lomsulwa. Ngekwala loko, labanye bephukelwe ngumkhumbi wabo wekukholwa. ²⁰ Labo nguHimenewusi kanye Alekzanda, lengibanikele kuSathane kute batewufundziswa kunga hlambalati.