¹ Ono webo, omwana wangu, koba anguzu mu luzhyalo luli muli Klisto Jesu. ² Nhyintu nhyookanvwa kuli ndime akati ka bakamboni banji banji, konhyipa kubantu bahomeka ibatikonhye kuyiiha bamwi. ³ Kopengana andime mbuli hikalumamba mubotu wa klisto Jesu. ⁴ Kunyina hikalumamba uuli munkondo ulikkomaniha twaambo twabuumi bwakwe, kutewa akkomanihe himalelo wakwe. ⁵ Alimwi, naa umwi wanjila mu muzundano wa kuhiyana, takonzhyi kusamwikwa ingala ccita waitobela milawo yamuzundano. ⁶ Cileelela kuti mulimi uubeleka acanguzu abe nguutaanguna kupewa cihango cakusaanguna kubizhwa. ⁷ Koyeeya aaya ngikwaambila, nkaambo mwami uyakukupa kuyakwaateelela oonse. ⁸ Amumuyeeye Jesu Klistu, wa cikombo ca Davida, wakabuka kuhvwa kubahu. Mbubona mbuli mbocibele mu makani aamulumbe wangu, ⁹ mwalo omo mwepengela kuhika ku mbaakani yakwaangwa maceni mbuli himilandu. Pele inhwi lya Leza talikonhyi kwaangwa. ¹⁰ Aboobo ndazumanana muli zhyoonse akaambo kabaabo ibasalilwe, kutewa kuti abalo bakatambule luhutuko luli muli Klisto Jesu, abulemu butamani. ¹¹ Oku nkokwaamba kwamahimpe: "Natwafwa anguwe, tuya kunkala anguwe. ¹² Naa twazunda, tuyakulela anguwe. Na twamukaka, awalo uyakutukaka. ¹³ Na titwahomeka, walo ulakazumanana kuhomeka, nkaambo walo takonhya kulikaka mwini. ¹⁴ Kozumanana kubayeehya enhyi nhyintu. Kubalailila muli Leza kuti kabatazwangani mu mangwalo, eeci tacili kabotu alimwi cinyonganya baabo ibateelela. ¹⁵ Koba munkutwe kuli tondenhya kuli Leza mbuli mboli musale wakwe, mbuli mubelehi unyina nsoni, uyiihya cabululami makani akahimpe. ¹⁶ Utabi hikusampaula akwaamba majwi akubeya, alo ayo aguhya bantu banji mubuleza. ¹⁷ Kwaambaula kwabo, kulayambukila mbuli donda mwaka. Akati kabo kuli Hymenaeus a Philetus, ¹⁸ balo aba bakaleya mu kahimpe. Baamba kuti bubuke bwakahu bwakacitika kale, alimwi luhumo lwabantu bamwi balunyonganya. ¹⁹ Nokuba boobo, matalikilo mayumu a Leza aliivwi, alilembelwe kuti: "Mwami ulibanhyi bakwe" alimwi "Oonse uyita inhyina lya Mwami asosoloke kububyaabi. ²⁰ "Mung'anda ikwete lubono takujaniki buyo nzhyibikilo nzhya golide a nsiliva. Kulajanika anzhyibikilo nzhya nzhyisamu abulongo. Nzhyimwi zhyakubelehya milimo yabulemu, nzhyimwi nzhyakubelehya milimo itali yabulemu. ²¹ Kuti naa muntu umwi walisalazhya kutabeleka milimo mibi, waba cibelehyo cabulemu, wabikwa abusena bwabulemu waba muntu uyandika kuli himalelo wakwe, wabambilwa kupewa milimo mibotu yoonse. ²² Amusosoloke kububyaabi bwaku bukuhyi. Amucite bululami, luhomo, luyando aimwi aluumuno antoomwe abaabo baita Mwami amyoyo usalala. ²³ Pele koikaka mibunhyo yabunhubanhuba ayakubula luzhybo. Ulinhyi kuti eenzhyi zhyileta kuzwangana. ²⁴ Mutwanga wa Mwami tayelele kuzwangana aboobo welele kuba mubombe kuli boonse, kakozhya kuyiinhya akubatama, ²⁵ kululamika baabo bamukazhya mububonvwu, kutewa ndiza Leza ulabasandula ku luhyibo lwa kahimpe. ²⁶ Bakabe aluumuno alimwi akuhiya toonze twa mubi, bakumana kuba anguwe kuluyando lwakwe.