¹ Aya emashiwi yakwa lemuele imfumu, ubukombe bwa cindama ubo nyina amupele pa kumulungika: ² Cinshi ndesosa, we mwana wandi, kabili cinshi, we mwana wa mwifumo lyandi, kabili cinshi, we mwana wa milapo yandi? ³ Wionawila amaka yobe kubanakashi, kabili inshila shobe wileka shiye umulobele isha mfumu. ⁴ We mwana wandi Lemuele, tacalinga isha mfumu ukunwa umwangashi nangu abalaashi ukusosa abati: ''Ifykunwa ifikola fili kwi?''' ⁵ Epali umuntu anwa nokulaba ifipope, apondamika no mulandu wa bana ba balanda. ⁶ Peleni ifyakunwa ifikola kubali mupepi no kufwa, kabili peeleni umwangashi ku baleshikitika imitima. ⁷ Lekeni anwe nokulaba ku bupiina bwakwe, nokukanaibukisha kabili amacushi yakwe. ⁸ Landilako abashingailandilako abene, kabili pokololako bonse abaletwalwa kukwipaiwa. ⁹ Asamuna akanwa kobe, kabili pingwila imilandu mu bulungami nokulubulwilako umulanda no mupiina. ¹⁰ Yangu ifyo cawama ukushukila umwanakashi wine wine pa ng'anda! pantu ena acindamishapo ukucila utumabwe twa rubi. ¹¹ Wiba wakwe amucetekela nga nshi, kabili takabulwe icintu cisuma. ¹² Apo wiba aikalila pano calo, amuletelelafye ifintu ifisuma te fibi iyoo. ¹³ Ena afwaya fwaya ubushishi bwa masako ya mpaanga, no bushishi ubwatelela, nokupeka peka ku milomo wakupikula. ¹⁴ Ena alafumya icakulya ukutali nokucileta pa ng'anda, nga filya amato yabashimakwebo yacita. ¹⁵ Ena abuka bushikushiku, pakuti apekanishishe ulupwa lwakwe icakulya, napakuti apeele ababomfi bakwe abanakashi ifyakaniko fyabo. ¹⁶ Ena kutala aceceta ibala elyo alishita, kabili mubukumu buntu asanga alimishamo ne myangashi. ¹⁷ Ena aba uwaswangana ku milimo, alikosa nokucenjela mukubomba. ¹⁸ Ena alamwenamo mu milimo yonse intu abomba, kabili icisaniko cakwe cisanika bushiku bonse. ¹⁹ Ena kuminwe apikula bushishi, nokuipikwila insalu shakwe umwine. ²⁰ Ena alafwilisha abapina, nokupelako ababusu. ²¹ Ena tatina nangu kube impepo shani, pantu bonsefye mumwakwe balikwata ifyakufwala ifayakaba. ²² Ena alapikula nefyakufimbana, alafwala ne nsalu ishatelela ne shakashika. ²³ Wiba wakwe alicindikwa mu mpongolo, ilyo ekala pamo nabakalamba ba calo. ²⁴ Ena alapikula insalu ishatelela ne mishipi, nokulashitisha kuli bashimakwebo. ²⁵ Ena alikwata amaka nabantu bonse balamucindika, kabili ena akaba ne nsansa mu nshiku sha ku ntanshi. ²⁶ Ne lintu alanda, awe ena alandafye ifyamano fyeka fyeka, ne milandile yakwe yamutembo. ²⁷ Alapikintika lyonse ku milimo yaba pa ng'anda, kabili talya mukate wa bunang'ani. ²⁸ Ena abana bakwe balamucankilwa, na wiba nao alamulumbanya. ²⁹ Alasosa ati, ''Abanakashi abaupwa bena bengi, ee busuma mufyo bacita, nomba iwe mayo walipulapo pali bonse.'' ³⁰ Ala ukuba uyemba kutumpika umuntu, ukuba imbeka kulapwa bwangu, nomba umwakashi uwakwatila Yawe akatina ena ewalingafye ukulumbanya. ³¹ Eya, mulemulumbanye pa fintu acita. Ena alilinga ukuti abakankala bonse balemucindika pa milimo yakwe pa mpongolo sha musumba.