¹ Nomba abena Rubeni nabena Gadi, bakwete ing'ombe nempanga ishingi, bamwene ifyalo fyaku Yaseri na Giledi ukuti fisuma nganshi ukutekelamo ifitekwa. ² Elyo baya kuli Mose na Eleasa shimapepo nentungulushi sha lukuta, babeba abati, ³ ''Ataloti, Diboni, Yaseri, Nimura, Heshiboni, Eleale, Sebamu, Nebo, na Beoni, ⁴ icalo ico Yawe apokolwele pacinso lwalukuta lwabena Israeli nacilinga ukutekelamo ifitekwa, nababomfi benu nabakwata ifitekwa.'' ⁵ Batile, ''Ngacakuti mwatulangulukilako, lekeni cino calo cipelwe kubabomfi benu pakuti cibe icuma cesu. Mwituleka twabuke Yodani.'' ⁶ Mose atile kubena Gadi na bena Rubeni, ''Bushe mulefwaya ukushala nokwikala kuno ilyo abanenu baleya kunkondo? ⁷ Bushe cinshi ico muletompwela imitima yabena Israeli pakuti beya mucalo Yawe abapela? ⁸ Ififine efyo nabashinwe bacitile, ilyo nabatumine ukufuma ku Kadeshi Banea kukuya lengula icalo. ⁹ Panuma yakuya fika kwishika lya Eshikoli nokumona icalo, babwelele nokutompola imitima yabena Israeli mukukana ingila mucalo Yawe abapele. ¹⁰ Yawe alifulilwe nganshi, ubo bushiku alapa noyu umulapo ati, ¹¹ 'Pantu aba bantu tabankonkele nemitima yabo yonse, tapali nangu umo umwaume uuli nemyaka amakumi yabili nangu ukucilapo, uwafumine mu Egypito, ukamona icalo nalaile mukulapa ukupela Abrahamu, Isaki na Yakobo. ¹² Tapali nangu umo kanofye Kalebu mwana Yefuni umwina Kenasi na Yoshua mwana Nuni, pantu bena balikonkele Yawe nemitima yabo yonse.' ¹³ Eico Yawe afulilwe abena Israeli, abalenga nokululumba mumatololo pamyaka amakumi yane, mpakafye inkulo yabalya bonse abacitile ifyabipa pa cinso cakwe yasuka yapwa. ¹⁴ Kabili moneni, mwe luko lubifi, mwaibika pa fifulo fya bashinwe, nokulenga Yawe alundepo ukufulilwa Israeli. ¹⁵ Nga cakuti wataluka mukumfwila Yawe, nakabili line akabalekako ababantu bonse mumatololo, kabili nimwe mukalenga ukuti bonaike.'' ¹⁶ Elyo bapalamine kuli ena abati, ''Tulefwaya ukule amacinka yafitekwa fyesu, nemisumba yabanakashi besu nabana. ¹⁷ Lelo tuli abaipekanya mukuipangasha fwebene nokuba pantanshi yabena Israeli, mapkafye tukabafishe mucifulo cabo. Lelo pali inonshita abanakashi besu nababale bekale mumisumba yamalinga, pakubacingililako kubekashi bacalo. ¹⁸ Tatawkabwekele kumayanda yesu mapkafye umwina Israeli onse akapokele icacishilano cakwe. ¹⁹ Ifwe tatwakapokeko ica cishilano pamo nabo mwishilya lya mumana wa Yodani, pantu ifwe icacishilano cesu caba kuno bushilya kukabanga ka Yodani.'' ²⁰ Elyo Mose atile kuli bena, ''Kuit mwabwelelamofye nga cakuti mwacita ici. Mwaipangasha mwebene pacinso cakwa Yawe ukuya kubulwi, ²¹ kabili nga abaipangasha bonse mwaya abuka Yodani pacinso cakwa Yawe mpaka akafulume abalwani bakwe ²² nokucimfya cilya calo pacinso cakwe, lyena kuti mwabwelelamo nokuba abakaele kuli Yawe naku bena Israeli. Kabili ici calo cikaba cuma cenu pacinso cakwa Yawe. ²³ Lelo nga mwafilwa ukucita ico mwalaya, ninshi mwabifya kuli Yawe. Elyo muli nokushininkisha ukuti ububifi bwenu buli nokuba pali imwe. ²⁴ Kuuleni imisumba yabanakashi benu nabana, nama cinka yafitekwa, lelo mucite ico mulaile!'' ²⁵ Abaena Gadi nabena Rubeni batile kuli Mose, ''Ifwe fwebabomfi bobe tuli nokucita ifyo wakonkomesha wemfumu yesu. ²⁶ Abana besu nabakashi, iikuni yesu yampanga ne mbushi ne ng'ombe, fikashala mumisumba ya Giledi. ²⁷ Lelo aba bomfi benu, umwaume onsefye uuipangeshe kubulwi, alinokwabuka mukulwisha pacinso cakwa Yawe, pamo ngefyo wasosa wemfumu yesu.'' ²⁸ Elyo Mose apele ifipope pali bena kuli Eleasa shimapepo na Yoshua mwana Nuni, nentungulushi shandupwa shabena Israeli. ²⁹ Atile kuli bena, ''Nga cakuti abena Gadi nabena Rubeni, umwaume onsefye uipangeshe kubulwi, ayabuka Yodani naimwe pacinso cakwa Yawe, lyena ilyo mwapoka icalo, nemwe muli nokubapela icalo ca Gileadi ngecuma cabo. ³⁰ Lelo ngatababwike umumana nabaipangasha naimwe pamo, bafwilefye ukukwatako icitungu mu calo ca Kenani.'' ³¹ Abena Gadi nabena Rubeni bayaswike abati, ''Ababomfi benu bali nokutita ifyo Yawe alandile. ³² Tuli nokwabuka umumana nokuya mu calo ca Kenani pacinso cakwa Yawe natuipangasha, leelo icuma cacishilano cesu cikaba nici kuno kwishilya lya Yodani.'' ³³ Elyo Mose apele kubena Gadi, abena Rubeni nacitika waluko lyakwa Manase mwana Yosefu icalo cakwa Siyoni imfumu yabena Amori, necalo cakwa Ogi imfumu yabena Bashani. Icalo conse kumo kwine nemisumba yabamo, necitungu campanga yonse iyabashingulwike. ³⁴ Abena Gadi bakulile Diboni, Atoroti, Aroeri, ³⁵ Atiroti Shofani, Yesa, Yogebea, ³⁶ Beti Nimura, na beti Harani, ngemisumba yakulilwako amalinga nokukula amacinka yafitekwa fyabo. ³⁷ Abena Rubeni nakabili bakula Eshiboni, Eleale, Kiriataimu, ³⁸ pamopene na Nebo, Baali Meoni- ayamashina bayalwile na Sibuma. Imisumba imbi bakulile baliinike amashina. ³⁹ Abamulupwa lwakwa Makili mwana Manase baile ku Gileadi, bapoka icalo nokufulumunamo abane Amoli abaleikalamo. ⁴⁰ Elyo Mose abepele Gileadi kubena Makiri, abamulupwa lwakwa Manase kabili eko balaikala. ⁴¹ Yaili umulupwa lwakwa Manase apokolola imishi yabo nokulaita ati Hafoti Yairi, ⁴² kabili Noba nao apokolola Kenati namishi yali mumbali, nokulaita ati Noba, pamo ngafintu balemwita.