¹ Yobo akonkenyepo nokulanda ukutila, ² ''Yangu, nga naba ifyo nali mu myenshi yapita ilyo Lesa alesunga, ³ Ilyo inyali yakwe yalebalika pa mutwe wandi, kabili ilyo naleenda ukupula mu mfifi no lubuto lwakwe. ⁴ Yangu, nga nali ifyo nali mu nshiku sha kubombesha ne nsansa kwandi ilyo bucibusa bwakwa Lesa bwali mwi tenti lyandi, ⁵ ilyo uwabulamba bonse aali nanebo, nabana bandi balenshinguluka, ⁶ ilyo inshila yandi yakupilwe ne shiba ilyatikama, ne libwe lyalefumya utumilonga twa mafuta! ⁷ Ilyo nafumine kunse ku mpongolo ya musumba, ilyo naikele mu cifulo candi mu lubansa lwa musumba, ⁸ abalumendo bamwene nebo nokuba apatali nandi mu mucinshi, nabakote baleima nokwiminina uku ncindika. ⁹ Bacilolo baleleka ukulanda ilyo naisa; balebika iminwe patunwa twabo. ¹⁰ Amashiwi yabakateka yaletalalikwa, ne ndimi shabo shalambatila mu tunwa twabo. ¹¹ Pantu panuma amatwi yabo yangufwa balentasha; panuma amenso yabo yamona balembela bukambone noku ntemwa. ¹² Pantu nalepususha umulanda nga akuta, no ushikwete wishi ilyo ashakwete uwa ku mwafwa. ¹³ Amapalo yawali mu pepi nokulaba yaleisa pali ine; nalenga umutima wakwa mukamfwilwa ukwimbila insansa. ¹⁴ Nalefwala ubulungami, nabo bwamfwika; umulinganya wandi wali nga tamba tamba ne cisote. ¹⁵ Nali amenso ya mpofu; nali amakasa ya balemana. ¹⁶ Nali wishi kubabusu; nalececeta umulandu nangu wa muntu uo nshaishiba. ¹⁷ Naletobaula insekete sha ushili mulungami; nalepokolola nefyo basuminemo ameno. ¹⁸ Elyo nasosele natila, ''Nkafwila mu cisansala candi; nkafusha inshiku shandi ngo tubulungwa twa mucanga. ¹⁹ Imishila yandi naitambalila ku menshi, no mume uli ubushiku bonse ku misambo yandi. ²⁰ Ukucindama kwaba muli ine kwaba ukupya inshita yonse, nobuta bwa maka yandi bwabafye ubupya lyonse mu minwe yandi. ²¹ Kuli ine abaume balyumfwile; bali ndolele; baikele tondolo kukumfwa kuku panda amano kwandi. ²² Panuma ya mashiwi yandi, tabalandilepo nakabili; ukulanda kwandi kwaleponena pali bena nga menshi. ²³ Lyonse balendolela ifyo balelola imfula; baleasamwisha utunwa twabo ku kunwa amashiwi yandi, ifyo balecita imfula ya numa. ²⁴ Nalibamwentwilile ilyo tabalecetekela, tabalekana ukupokelela ulubuto lwa cinso candi. ²⁵ Nalebesalila inshila nokwikala nge mfumu yabo; naikele nge mfumu pafita fyaiko, ngo muntu uuletalalika abalelosha.