¹ Ifi efyasosa Yawe ati, ''Umulu, ecipuna candi icabufumu, icalo naco epo ine nanyanta amakasa yandi. Nga nomba kanshi ni ng'anda iyo imwe mwingakulila? Nangu nipa n cende nshi ningatushisha? ² Ala nine wine nabumba nabumba fonse ifi, nemwine nine Yawe. Elyo kwena abantu bacefya abalapila, abakwatila akatina nokupetamina ishiwi lyandi, ine ebo mposako amano. ³ Abantu tepakutemwa ukucita ifyo bena balefwaya. Umuntu uuli onse uwipaya ing'ombe nokutula ilambo, abafyengo uwipaya umuntu. Uwaipaya akanama apanga nokukatula nge lambo, ababafye cimo cine nounyongela umukoshi wambwa pakwipaya nokuleka ilambo. Noyo uutula umutulo icabunga, aba cimo cine ngo uutulila umulopa wa nkupa. Naonse uoca ububani, cimo noupakata utulubi. Abantu tebakutemwa iyi mipepelem yabo iishabipila. ⁴ Kanshi naine wine nakulabatolesha imipamba, nokuleta pali bena ifintu filya batina. Pantu tapali nelyo umo uwanjaswike ilyo ine nalebeta, nangu uwakumfwa ilyo ine nalebeba. Mutemwikwa ukuntalamina, nokulacita ifintu ifishinsekesha.'' ⁵ Umfweni kuno ishiwi lyakwa Yawe, imwe mwe bankwatila akatina, mwebapetamina ishiwi lyandi ine ne Yawe. Imwe ndemweba nati, abantu benu bamo balimupata, nokusula pamulandu wakuti imwe mwalipentamina. Imwe balamuwela abati, ''Twakulamonako ifyo imwe mwakulasansamuka. Yawe nalemulangafye ifyo apulama, nalemupusushakofye. ⁶ Umfweni akabolokoto ako kaba mumusumba, akafuma mwi tempele. Ine Yawe ndebolokota pa nshita ndelimuna abalwani bandi. ⁷ Umusumba wandi uwamushilo uuli ngo mwakashi uwafyala umwana umwaume apopenefye, ukwabula nokuti atale akomwe nefumo. ⁸ Bushe kwalitala akuba umuntu uwamonapo nangu ukumfwapo icauyu musango? Bushe kwalitala akuba umushobo umo uwa bantu uwatampile ukubapo pa bushikufye bumo? Aa Sioni ena akafyala umutundu wa bantu ilyo line akakomwa nefumo. ⁹ Nine Yawe uulenga ukuti cilepalamina icakuti abantu bandi balefyalilwapo, bushe imwe muleti amuti kuti ine nalekapofye nokuyti bafyalwe iyoo, aini? Efyasosa Lesa wenu. ¹⁰ Sansamukeni pamo na Yerusalemu, mwangileni imwe bonse mwe mutemwa. Akusansamukeni nankwe nomba, imwe bonse mwe balemulosha. ¹¹ Mwakulacankilwa ifisuma fyakwe, nga filya ciba kukanya akali kwi bele lyakwa nyina, mukalaonka nokusansamushiwa, nokuilemena kufilyo ifishaifinya. ¹² Ifi ifyasosa Yawe, ''Ine nkaletela Yerusalemu umutende wape, nefyuma fya mishobo ya bena fyalo fyakulaisa kuli ena, fyakulafumfumuka nga amenshi ya mumumana uushikama. Mwakulaba nga akana akasungwa na nyina, Yerusalemu akamusendela pamaboko yakwe nokumutentemba bwino. ¹³ Ine nkalamutalalikila imwe mu Yerusalemu, nga filya fine nacifyashi atalalika kamwane, efyo nkalamutalalikilako. ¹⁴ Ilyo imwe mukalamona ifi fintu, ala imitima yenu ikalasansamuka, mukalakwatisha amaka no mutende. Elyo mukashininkisha ukuti kanshi ine ne Yawe ndafwa abampetamina, nokuti kanshi ine ndafokela abalwani bandi. ¹⁵ Ine ne Yawe nkeshila mumulilo, amaceleta yandi yakaba nga kankungwe. nkesa kukupesha abo ine nafulilwa, nobukali bwandi bukaba ngo lubingu lwa mulilo. ¹⁶ Abantu bonsefye pacalo abo ine nkasanga ne milandu, ine Yawe nkabalimwina ku mulilo nakulupanga, nokufwa bengi bakafwa kulandu waine ne Yawe. ¹⁷ Ine ne Yawe ndetila nati, calapwa, kabili calapwilililafye kuli aba bantu baisangulula, abaya imilongo kukulapepa imilungu mu ncende isho bapekanisha mumabala. Calapwililishafye kuli aba bantu abaltya iminofu ya nkumba nabakwindi. Nefyakulya fimbi ifyabunani. ¹⁸ Ine nalishiba ifyo bena batontonkanya nefyo bacita. Ine nalaisa nonganye abantu bamishobofye yonse ne ndimi shonse nabo bakesamona ubucindami bwandi. ¹⁹ Kabili nkaba icishibilo pakati kabo icakushininkisha ukuti kanshi ine ndebalimuna. Kwena nalaisashapo bamo, nabo ndebatuma kubantu ba mishobo ababa ku fyalo fyakutali iya kululamba lwa bemba, uko bena bashatala abomfwa palwa lulumbi lwandi, uko bena bashatala abamona ifyo ine nacindama, nefyo ine naba nobulamba. Nako eku Tashishi, na ku Libya, naku Ludia uko abantu bacenjelesha ukuposa imifwi, naku Tubali, na ku calo ca Bagiriki. Nikuli iyi mishobo yabena fyalo iyo balaya mukulashimikilako ifyo ine nacindama. ²⁰ Bakabwesha nabanenu bonse, bakabafumya mumishobo ya bantu bonse, nokwisabatula ngo bupe kuli ine ne Yawe. Pakwisa ku lupili lwandi ulwa mushilo mu Yerusalemu bakabaleta pali bakabalwe, pamaceleta, pamacila, napali ba mpunda, napangamila. Cikabafye nga filya fine abena Israeli baleta imitulo yabo iya cabunga ku ng'anda yandi ne Yawe, iyo nabasendela mufipe fyasanguluka. ²¹ Bamo pali abo bantu, ine ne Yawe nkaba cita bashimapepo na bena Lebi-efyasosa Yawe. ²² Pantu nge ifine umulu uupya ne calo cipya ifyo ine ndecita ifyakubelela kumaka yandi ne Yawe, ifyo nabana benu bakulabelela pamo pene ne shina lyenu. ²³ Pashiku nkulu yakumoneka kwa mwenshi onse uupya, nalyonsefye pabushiku bwe Sabata, abantu bamitundu yonse bakulaisa muno mu Yerusalemu ku kumpepa ine ne Yawe. ²⁴ Pakubwelelamo bakulatamba ifitumbi fya bantu abansangukile. Imititi yakulafilya tayakatale aifwa nakalya, nomulilo wakulafyoca nao tawakatale aushima iyoo. Kabili bakaba icakuselausha ku bantu ba mitundu yonse.''