¹ Awe ine, pali iwe we musumba wa Sioni, nshatalelepofye iyoo, ine nshaleke kulandapo, pakafye ulubuke we Yerusalemu. Mpakafye ubuloloke bobe busame ngemibengele yakasuba, nokulubulwa kobe kube ngomwenge uulesanika ubushiku. ² Abantu bamishobo bakulamonapo ifyo iwe uucita ifyalungama, ne shamfumu shabo shonse shakulatamba ifyo iwe wacindama. Ukalaitwa ishina ilipya ilyo Yawe umwine akakwinika. ³ Kuli Yawe, iwe ukaba ngengala yabufumu iyayemba, ukaba ngecitabo ca bumfumu mu maboko yakwa Lesa obe. ⁴ Abantu nomba tabalekwita ''Uwalekeleshiwa,'' Necalo cobe tabalecita ''Icaonaulwa,'' Iyoo. Nomba bakulakwita ''Kacele wakwa Lesa,'' Icalo cobe bakulacita ''Caupwa bwino.'' Pantu Yawe alekucankilwa, kabili icalo cobe calaba kwati mwana kashi uuwaupwa. ⁵ Pantu ngafilya umulumendo abula umukashana uushabala opwa eo aupa, efyo nabana bobe bakakubula, ngafilya shibwinga asekelela pali nabwinga wakwe, efyo na Lesa akasekelela pali iwe. ⁶ Iwe Yerusalemu; pamalinga yobe ine nimbikapo bamalonda, nabo tabakulaikala tondolo ubwaila no bwaca bali nokulanjibukisha palwafilayo fyandi, kabili tabakulaesha nokutusha nakalya. ⁷ Balaleka ine ndeikalilafye, mpakafye nkakubukulule iwe we Yerusalemu, nkakucite umusumba uwakuti bantu icalo conse bakalelumbanya. ⁸ Yawe napala umulapo wakuboko kwakwe ukwa ku kulyo, kabili kwakwe ukwamaka atile ati, ''Napalifye ine napala ukuti nshakaleke balwani bakalemulila icakulya iyoo, nabena fyalo ine nshakabaleke bakalemunwena umwangashi wenu upya uo imwe muculila. ⁹ Lelo imwe mwebalima ingano nokushisepa, nimwe mwakulalya imikate, mwakulalumbanya Yawe. Mwe basaba ifitwalo fya mumyangashi, nimwe mukalanwena umwangashi mumansa shacifulo candi icamushilo.'' ¹⁰ Imwe mwe bena Yerusalemu, aleni imeni paminshi, kasebeleni abantu benu mumusebo abalebwela. kaciteni icimusebo icikulu, mushulemo nabwe. Imyeni ulunga pakuti imishobo yabena fyalo beshibe ifi! ¹¹ Lekeni beshibe ukuti Yawe alebilikisha pano sonde ati, mwebe umwaana mwanakshi Sioni amuti, ala umupusushi obe aleisa, necilambu cakwe ali naco, ala ulya aleisa nabantu abo alubwile. ¹² Imwe mwakulaitwa 'Abantu bakwa Lesa abamushilo,'' abantu abo Yawe alubula.' Yerusalemu akulaitwa 'Umusumba uo Yawe atemwa; 'Umusumba uo Lesa ashalekelesha.''