¹ Umfweni kuli ine, mwebakonkela ubololeke, imwe mwebafwaya Yawe. Ibukisheni icilibwe ico imwe mwatuntukako, nomukanda uo imwe mwaimbwamo. ² Lolesheni kuli shinwe Abrahamu, nakuli Sara uwamufyele. Abrahamu takwetepo mwana ilyo ine namusalile, nomba ine nalimupalile, namupela nabana nafusha nobufyashi bvwakwe. ³ Cine cine Yawe akalangulukilako umusumba wa Sion, akalangulukilako bonse abaikala mufitantala fyauko. Nangu icalo cauko caonaika akacisangulula nge bala lya Eden, akacita ne mpanga iyaonaika ukaba nge bala lyakwa Yawe, mukabafye ukwanga ne nsansa, ne nyimbo isha kumulumba ne shakumutotela. ⁴ ''Umfweni kuli ine, mwe bantu bandi; kutikeni kufyo ine ndesosa mwe luko lwandi. Amafunde yakafuma kuli ine nobupingushi bwandi bukaba elubuto kubanatu ba mishobo. ⁵ Ubulungamai bwandi nabupalama, ukupususha kwandi kuli mu nshila. Ninewine nkabateka abantu ba mishobo, nabantu ba mufyalo fya kutali kululamba lwa bemba, balalolela pakuti nje mbapusushe. ⁶ Inwineni amenso yenu ku mulu, lolesheni na pesonde. Ala umulu ukongoloka nge cushi, ne sonde likapwa nge nsalu iikote, nabekala calo bonse bakafya ngo tushishi. Lelo ukupususha kwandi kukabelelela, nobulungami bwandi tabwakafilwe iyoo. ⁷ Umfweni kuno, imwe mwebaishiba ifyalungama, mwe basunga amafunde yandi mu mitima yenu. Imwe mwisakamana umusalula wa bantu, nangu ifyo balemituka. ⁸ Pantu aba bantu icipelekeshe ca bushiku cikabalya nge nsalu, kabili utushishi tukabalya nga filya tulya amasako. Lelo ubulungami bwandi bwena bukabelelela, no ukupususha kwandi kukaba ku nkulo ne nkulo.'' ⁹ Buka, buka we kuboko kwakwe nokufwala amaka yobe, buka nga filya fine walecita mu nshita shakale, munkulo shakale nakale. ¹⁰ Bushe teiwe wine waputawile fipimfya fipimfya Rahabu, cilya cishimwe shimwe ca muli bemba? Bushe teiwe wine wakamishe amenshi yali bemba mwi tenga lya shika, wacita ne nshila mu menshi, pakuti abantu abo walepususha emo bapite pakwabuka. ¹¹ Kanshi abantu abo walubula we Yawe bakabwela, bakafika ne nsansa mu Sioni, bakesa baleimba inyimbo, baleaula notupundu. Ukusekelela nokwanga kwa pee bakafisanga, bakalasansamuka nokwanga pe na pee, tabakabale nakabili abalilishika nangu ukucula iyoo. ¹² Yawe nakabili aletila ati, ''Íne wine nine nsansamusha imwe. Nga nomba kuti imwe mwalatina shani umuntu umwina kufwa, umwana wa muntu uukoma nge cani? ¹³ Kuti mwalaba shani Yawe uwamubumba, uwafungulula umulu, nokwikasha isonde? Cinshi ico imwe lyonse mwaikalila mu mwenso, uwakutina ubukali bwa bantu abamucusha, abafwaya ukumulofya? Bushe ubukali bwa bantu bamucusha buli kwi? ¹⁴ Bankole ababa mu fifungo, balaswa balubukuke. Tabafwile mu nindi, bakalakwata ifyakulya ifyo bakalakabila ukukwata. ¹⁵ Pantu ine nine Yawe, Lesa wenu, ine nine nsunkanya bemba, nokulaimya amatamba pakuti yalepoma. Ishina lyandi nine Yawe umwine wafita. ¹⁶ Nlibika amashiwi yandi mukanwa kobe, nakufisa na mucintelelwe ca kuboko kwandi. Ine newandalika imyulu, nokubika umufula we sonde, neusosa nakuli Sioni nati, 'Iwe muli bantu bandi,'' ¹⁷ Buka, buka iwe Yerusalemu, ale ima! Iwe wewanwene kuminwe yakwa Yawe ulukombo lwa ciptyu cakwe. Iwe wewafipililefye tonse utwa mu cikombe cakutalansuka, utulenga abantu ukupungushima. ¹⁸ Pabana baume bonse abo wafyele tapamoneka nelyo umo uwakukwikatilako pakuboko. Namubana baume bonse aba wakushishe tapamoneka nangu wakuti alekutungululako. ¹⁹ Pamipamba iyo ibili iya kuponene, nani uwakulililapo ubulanda? Pabonaushi, nokubongoloka, icipowe nolupanga ifyakwishila, nani uwakulangulukilako? ²⁰ Mufinshoko fyonse ifya misebo, namulala ba mwano abafwile icipupu, bali nge nsebula ishiketwe mwi sumbu. Nabomfwa apapela icipyu cakwa Yawe, apapela ukwebauka kwakwa Yawe wenu. ²¹ Eico umfweni imwe ici mwe bena Yerusalemu mwe balecula, mwe bali abakolwa lelo temwangashi munwene. ²² Ifi ifyasosa imfumu Yawe, Lesa wenu, uutulanyako abantu bakwe aleti, ''Mona nimpokolola mu minwe yobe ulukombo lwa kupungushima. Icikombe calukombo lwa cipyu candi, tawakabwekeshepo ukunwamo nakabili iyoo. ²³ Nimbula ulukombo nokulubika muminwe yabamucusha, abamweba ukulambalala pa nshi pakuti batantalepo, abo abacita inuma shenu ukuaba ngo mushili kabili ngo musebo uwakwendaukamo.