¹ Palameni kuon, imwe mwe nko, kabili umfweni kutikeni, mwe bantu! Icalo nefyaisulamo fyonse fyumfwe, isonde, nafyonse ififumapo. ² Pantu Yawe nakalipa ku nko shonse, kabili ali necipyu ku fita fyabo; naonaula aba bantu umupwilapo, nabapela kukwipaiwa. ³ Ifitumbi fyabo fikaposwa panse. Ukununka kwa fitumbi kukaba monse monse; ne mpili shikonka umulopa wabo. ⁴ Intanda shonse ishamumulu shikasanguluka, no mulu akapombwa nge citabo icapombwa; ne ntanda shonse shikapena, nga filya ibula lilukuta ku mwangashi, kabili nga filya amankunyu yapisha yalukuta ukufuma ku mukunyu. ⁵ Pantu ilyo ulupanga lwandi ninshi nalunwa nalwikuta mu mulu; moneni, lukekila pali Edomu, pa bantu ndepatwila ku bonaushi. ⁶ Ulupanga lwakwa Yawe lulekonkoloka umulopa nokufimbwa na mafuta, lulekonkoloka no mulopa wa bana ba mpaanga ne mbushi, nalufimbwa na mafuta ya mfyo shabasukusuku. Pantu Yawe nakwataa ilambo mu Bozra no kwipaya ukukalamba mu mpanga yakwa Edomu. ⁷ Imbao shikawila pamo nabena nefipouti fya ng'ombe pamo neshikalamba. Impaanga yabo ikanwa umulopa, no lukungu lwabo lukaba ulwanona ku mafuta. ⁸ Pantu bukaba bushiku bwa cilandushi cakwa Yawe no mwaka ilyo akalandula Sione. ⁹ Imimana ya mu Edomu ikasanguka icibansa, ulukungu lukasanguka ilibwe lya mulilo, no mushili ukasanguka icibansa icilepya umulilo. ¹⁰ Cikalapya ubushiku na kasuba; icunshi cikalafuuka umuyayaya; ukufuma ku nko ne nkulo ikaba ni mpanga itaonaika; takwakabe uwakupitamo umuyayaya. ¹¹ Lelo ifyuni fya mu mpanga ne nama efikekalamo mulya; icipululu na mwankole fikapangamo ifinsa mulya. Yawe akatambalikapo intambo yakupiminako yacimfulumfulu ne libwe lyakupiminako. ¹² Tamwakabe icikashalamo icikatekwa ubufumu mu Edomu, ne ntungulushi sha calo mulya tashakabe kantu. ¹³ Mukaluka imyunga mu ncende ishalimo isano, bakaenya, bakacilasa emalinga yakwa Edomu. Mukaba ebwikalo bwaba mumbwe, ni ncende ya ba mwakatala. ¹⁴ Inama sha mpanga naba cimbwi shikalakumanina kulya, nefibushi mabwe fikalakumanina kuli umo nomunankwe. Ifinama ifyaba nge fiwa fya mpanga fikapanga ubwikashi nokufwaila incende shakutushishamo. ¹⁵ Ifipululu fikapanga ifinsa, ukubikila nokutotola amani yafiko, fikatota nokucingilila abana. Ee, amakubi yakakolongana, ililume ne likota. ¹⁶ Fwayeni mu citabo capombwa cakwa Yawe; takuli cimo pali ifi icishakasangwe, fyonse fikaba fibili fibili icilume ne cikota; pantu akanwa kakwe nakakambisha ici, no mupashi wakwe naufilonganika pamo. ¹⁷ Ena afipendwile pakufyakanya icalo, nokufipela ifiputulwa fyafiko. Bakacikwata umuyayaya; ukufuma ku nkulo ne nkulo bakekala kulya kwine.