¹ Ubukombe palwa mupokapoka wa cimonwa: Mulandu nshi uwalengele imwe ukwinina pamulu wa mayanda? ² Bushe nico mwingomfwa umusumba uwaisulamo icongo, umusumba wa cimfulumfulu? Abantu bobe bonse abafwile tabaipaiwe nemifwi, kabili tabafwile mubulwi. ³ Bonse bantungulushi bafulumwike pamo, lelo abaiketwe ukwabula ukubomfya ubuta; bonsefye baikatilwe pamo, nelyo bafulumukile ukutali. ⁴ Eico kanshi nebo nasosele ukuti, ''Mwindolesha, nalalila bulanda bulanda; mwiesha ukuntalalika palwa bonaushi bwa mwana umwanakashi uwa bantu bandi.'' ⁵ Pantu kuli ubushiku bwa cimpingili ubwakunyantaula, ne cimfulunganya caka Lesa Yawe wamabumba, mumukonko wa cimonwa, ukubongolola kwa fibumba, ne nkuta sha bantu ku mpili. ⁶ Elamu asendele abashilika ba calo, pali kabakwe namaceleta, na Kiri nafimbula pa nkwela. ⁷ Cikacitika ukuti imipoka poka ya ncende shenu ishawamisha mukesula amaceleta, nabashilika bapali bakabalwe pa mpongolo. ⁸ Alifumishepo ubucingo bwakwa Yuda; kabili mwaloleshe muli bulya bushiku ku fyanso mwisano ilya mu mpanga. ⁹ Mwalimwene ifipunda fya musumba wakwa Davidi, ifyali ifingi, kabili mwalongenye amenshi ya mucishiba ca mwisamba. ¹⁰ Mwapendele amapunda ya Yerusalemu, kabili mwabongolwele amayanda pakukosha icibumba. ¹¹ Mwapangile icakusunga amenshi pakati kafibumba fibili ica munshi ya cishiba cakale. Lelo tamwaloleshe pawalenga umusumba, uwapekenye umusumba ukutula ku kale. ¹² Shikulu Yawe wamabumba aitile pali bulya bushiku kukulila, kukulosha, kukubeya amapala, nokufwala insalu shabulanda. ¹³ Lelo moneni, mucifulo caifyo, mwalesefya, ukusanwa, ukwipaya ing'ombe ne mbpaanga ukulya inama nokunwa umwangashi; natulye nokunwa pantu ubwamailo tukafwa. ¹⁴ Ici casoselwe mumatwi yandi kuli Yawe wa mabumba; ''Mucinefye ubu bubifi tabwakelelwe kuli imwe ukufikafye nakukufuma kwenu.'' efyo shikulu Yawe wamabumba asosa. ¹⁵ Shikulu Yawe wamabumba asosa ifi, ''Kabiye kuli uyu kangalila, ku Shibna, wa ng'anda nokusosa, ¹⁶ 'Cinshi ulecita kuno elyo kabili nani akupele insambu ishakuipangila icilindi cakukushikamo, ukwimba imanda apa sansuka kabili ukufukula imanda yakutushapo mu libwe?''' ¹⁷ Mona, Yawe alimupepi nokukuposa, umwaume wabulanda, mupepi nokukuposa panshi; akakwikata namaka. ¹⁸ Mu cinefye akakushingulusha imiku nemiku, nokukuposa nge mpila mu calo ica pabuka. Kulya ukafwa, kabili kulya eko amaceleta yobe ayabukata yakaba ukaba musebanya ku ng'anda yakwa Shikulu! ¹⁹ ''Nkakufumya pacifulo apo ubombele, napa ncende wapelwa. Ukatelemunwa. ²⁰ Cikaba pali bulya busiku ukuti nketa umubomfi wandi Eliakim umwana mwaume wakwa Hilikia. ²¹ Nkamufwika umwingila obe nokumubikako umushipi obe, kabili nkapela amaka yobe ayabucilolo mu minwe yakwe. Akaba wishi kubekashi bamu Yerusalemu naku ng'anda yakwa Yuda. ²² Nkabika imfungulo mu ng'anda yakwa Davidi pamabeya yakwe; akesula kabili takuli uukesala; akesla kabili takuli uukesula. ²³ Nkamupampamina, ngo lupopo pa ncende apakosa, kabili akesaba icipuna cabucindami ku ng'anda yakwa wishi. ²⁴ Babikile pali ena ubukata bonse ubwa ng'anda yakwa wishi, intuntuko nobufyashi, umutondo onse uunono ku nweno ukufika ku mitondo iikalamba yonse. ²⁵ Pali bulya bushiku ubu ebukombe bwakwa Yawe wa mabumba ulupopo ulwapopwa pa mwinshi apakosa lukapopoloka, lukakontauka, nokupona nokufina ukwalipo kukaputulwako. Yawe nalanda.