¹ Amashiwi aya sobelwe palwa musumba uwa Damasiko ni aya. Yawe alisosele ati, ''Umusumba wa Damasiko ukawa tawkabe musumba nakabili iyo, ukabafye umwina wafitantala epala. ² Mumisumba yaku Aroeli tamwakabe abantu. Ikabafye nincende umo impanga ne n'gombe shikalalila, takwakamoneke necakushitinya. ³ Takwakashale ilinga kuli Efremu, nobufumu bwamusumba wa Damasiko nabo bwine bukapwa. Abena Siria abakashalapo bakasebana nga bana bakwa Israeli.'' Yawe umwine wafita nasosa. ⁴ ''Ubishiku bumo bwalaswa bufike, ilyo ubucindami bwakwa Yakobo bukapwa, nokwina kwakwe kukapwa, akashalafye nga pakamuti. ⁵ Cikaba ngebala ilyo batimpwilemo imitwe ya ngano, nokutolamo imisonso yaiko, ngebala lyamwishika ya Refaimu, ilyo basotwelemo imisonso yangano ⁶ Mukashalafye abantu abampendwa, ngo mu Olife uo bakuntileko ifitwalo fyonse nokushakofye ifitwalo fibili nangu fitatatu ifili pakantongoli, nangu ifitwalofye fine nangufye fisano.'' Ee, Yawe Lesa wakwa Israeli. ⁷ Ubo bushiku ngabwafika elyo abantu bakapilibukila kuli kabumba wabo Lesa wamushilo wakwa Israeli. ⁸ Ninshi nomba capwa baleka ukulasakamana ifibumbili fyamalambo ifyo abene bakula. Ninshi nomba basulilapo nefintu ifyo baipangila ifilinge ncenshi shimulungu Asheri, nefibumbili fine ifyakocelapo ububani. ⁹ Ubo bushiku nga bwafika, ninshi imisumba yabo yashala insansalila kabili ninshi yashala ifibolya ngemisumba iyo abena Ifi nabena Amoni bashile insansalila, ilyo bafulumwike abana bakwa Israeli. ¹⁰ Mwebena Israeli mwalilaba kuli Lesa uwamipuswishe, mwalifilwa ukwibukisha icilibwe cenu ico mufisamamo. Eico nangu mwingalima imyangashi iyalelema nangu mwalimba imyangashi iyabena fyalo, ¹¹ elyo ifyo mwalimba lelo, nangu fingapuka nokubalula iluba panshita yalucelo, awe teti mumonemo nelyo fimo ifyo mwinga lobololamo. Ifya kulobolola fikaba ifyacepa ifyafyefye kuti fyamiletelafye ubucushi ubushingapwa. Yawe acimfya imishobo shabalwani . ¹² Abantu bamishobo iyamaka balebolokota balecita ifyongo kwati ni bemba, kwati kukumana kwamatamba ayakalamba ayalulunkene. ¹³ Nangu imitundu yabantu ishile nailulunkana ngamatamba ilyo Lesa aikalipila yaululuka nga misungu iilipampili n, yaululuka nge mpimbili isha sendwa kuli kangungwa. ¹⁴ Panshita yacungulo awe kwaba nakayofi! Kutifye cilya bushilati buce wae tepakumona umuntu nangu umo! efyo ciba kubantu bonse abatapa icalo cesu, ecakaniko bantu bonse abesa muklutonaula.