¹ Kanshi mumweshi walenga ikumi na ibili mumweshi beta Ada, mu bushiku bwalenga ikumi limo na shitatu ubwa uyu wine mweshi, icebo ne cipope ca mfumu fyali nokucitikilapo. Ubushiku bwine ubo ebo abalwani ba ba Yuda balesubila ukubacimfya, nomba fyayaluka. ² Ba Yuda bacimfishe aba ba patile. Aba Yuda mumisumba yonse namu fitungu fyonse ifya calo ca mfumu Asuelusi balongana mukwipaya abo abalefwaya ukubalofya. Kanshi tapali nangu umo uwakubalwisha pantu umwenso waliketefye abantu bonse. ³ Bonse aba lashi ba mfumu aba mu fitungu fyacalo inkonkani sha mfumu, ba kateka ba babomfi bamfumu bayafwilisha aba Yuda pantu umwenso wakutina Modekai walibekete. ⁴ Pantu Modekai ali namaka ayengi mung'anda ya mfumu, no lulumbi lwakwe lwalikumene mucalo conse, pantu amaka Modekai akwete yalekulilakofye. ⁵ Kanshi aba Yuda bakoma bonse abalwani babo kulupanga ukubepaya nokubonaula nokucita abalwani babo mumu sango balefwailamo ⁶ Mu musumba wa Susa wekafye Abayuda baipeye no konaula abantu abaume imyanda isano. ⁷ Kabili baipaya na Pandashandata na Dalufoni na Asipata, ⁸ na Porata, na Adalia, na Aridata, ⁹ na Pamashita na Aridai na Faisata, ¹⁰ abana ikumi limo abakwa Hamani mwana Hamedata, umulwani wa ba Yuda . Lelo ifyuma fyabo fyena tabafitapile iyoo. ¹¹ Pa bushiku bwine ubo baya shimikilako imfumu impendawa ya bantu baipeye mu musumba wa Susa. ¹² Elyo imfumu yaeba namfumu Esta aiti , ''Mu musumba wa Susa, aba Yuda bepeye no ko naula abaume imyanda isano elyo na bana bakwa Hamani ikumi limo. Nga kanshi mu fitungu fimbi ifyo ulelomba? Filepelwa kuli iwe. Cinshi ulefwaya? Cilefikilishiwa.'' ¹³ Elyo Esta ayasuka ati, ''Nga cakuti cakusekesha we mfumu, leka Abayuda aba muno Susa basuminishiwe ukucita nakabili mailo ifyo bacitile ukulingana ne cebo ca bushiku bwa lelo. Lekeni bamwana Hamani ikumi babkulile pa fimuti.'' ¹⁴ Kanshi imfumu epakupela icebo icakucita ifyo fine. Ne funde lyapeelwa mumusumba wa Susa, na bana ikumi limo abakwa Hamani baba kulika. ¹⁵ Aba Yuda abali mu Susa balongana nakabili pabushiku bwalenga ikumi limo na shine ubwa mu mweshi wa Ada, baipaya abaume imyanda itatu lelo tabasampile ifyuma. ¹⁶ Elyo aba Yuda bambi balongana mufitungu fya calo ca mfumu, baicingilila nokuipokololako kubalwani babo, nokwipaya aba bapatile amakana cine lubali nayasano nomba taba sampile ifyuma fyabo. ¹⁷ Ubu bwali bushiku bwalenga ikumi limo na shitatu ubwa mumweshi wa Ada. Elyo pabushiku bwalenga ikumi limo na shine bali tushishe nokubucita ubwakusefya ne nsansa. Inshiku nkulu ya Purimu. ¹⁸ Aba Yuda bali mu Susa bena balongene pabushiku bwalenga ikumi limo na shitatu nobwalenga ikumi limo na bune, elyo nomba ubwalenga ikumi limo na busano batusha nokubucita ubwa kusefya ne nsansa. ¹⁹ Emulandu walenga ukuti aba Yuda, balya bekala mu ncende sha mumushi, balecindika ubushiku bwalenga ikumi limo na shine ubwa mumweshi wa Ada. Ubu bushiku buba bwaku sansamukamo, ukusefya nokutusha, ubwashiku bwakupelana ubupe bwafyakulya. ²⁰ Modekai alembele ifintu fyonse nokutuma amakalata kubaYuda mufitungu fyonse fya calo ca mfumu Asuelusi ifyakutali nefyamupepi. ²¹ Mumakalata aya abakonkomeshe ukucindika ubushiku ubwalenga ikumi limo na bune ubwa mumweshi wa Ada elyo nobwalenga ikumi limo na busano cila mwaka. ²² Pantu ebushiku aba Yuda balubwike kubalwani babo, kabili emweshi ubu landa bwabo bwayalwikemo insansa nokulosha kwabo kwayalwike ukutusha. Ishi nshiku shifwile shaba isha kusansamukamo no kusefya. Ninshiku shakupelanamo ubupe bwafyakulya ne sha kupelamo abalanda ifya bupe. ²³ Kanshi aba Yuda basuminisha ifyalembele Modekai, bayamba nokufikonka. ²⁴ Hamani umwina Agagi umwana wakwa Hamedata, umulwani waba Yuda ewali nama pange yakulofya aba Yuda nokubula Puri pakupendula pakuti abonaule nokubalofya. ²⁵ Nomba ilyo imfumu yaumfwile ukufuma kuli Esta, yali pingwile nokulemba ukuti ama pange yakwe ayabi ayo akwatile aba Yuda yamwalukile, ena nabana bakwe babakulike nokuba kulikila kufimuti. ²⁶ Emulanduwine bainikile inshiku ati Purimu ukufumya kwishiwi lya Puri. Kabili ni pa mulandu wa fyonse ifyalembelwe muli iyi kalata nefyo bamwene ne fyabaponene, ²⁷ Abayuda baipangile no kukonka ulutambi pamo na bana babo na bantu bonsefye ukucindika cila mwaka apabula ukufilwa ishi nshiku shibili umo mwine calembelwe na pa nshita iyasalwa cila mwaka. ²⁸ Ishi nshiku shibili bafwile bashicindika no kushikonka munkulo shonse mundupwa shonse na mufintu fyonse ifya calo, na mumisumba yonse. Elyo ishi nshiku sha Purimu tabafwile baleka ukushisefya ku Muyuda onse nelyo ukuleka ukushibukisha mu bana ba mu lupwa lwabo. ²⁹ Elyo nafumu Esta, umwana wakwa Abihaili, na Modekai umu Yuda balemba inkalata ya bubili no kubikapo amaka nganshi ukushininkisha pa nshikunkulu ya Purimu. ³⁰ Aya makalata yatuminwe ku ba Yuda bonse abamufitungu fyonse umwanda umo amakumi yabili na cine lubali ifya calo ca mfumu Asuelusi mu mashiwi yacibote no kubateka imitima. ³¹ Amashiwi yali mu makalata yabakonkomesha ukuti bakalesefya inshiku sha Purimu pa nshita iyasontwa pamo ngefyo namfumu Esta na Modekai umu Yuda babebele ukucitya pamo na bana babo mukukonka ulutambi lwakufunga ukulya no kuloosha . ³² Icebo capeele Esta ecalengele ukuti ukusefya Purimu kube ulutambi elyo no kulembwa mu citabo.