¹ Aya emashiwi ayo Yawe akonkomeshe Mose ukulanda kubana bakwa Israeli mumpanga ya Moabu, amashiwi ayalundilwepo pa cipangano bapangene ne nabo, mu Horebu. ² Mose aitile abena Israeli bonse nokulanda kuli bena, ''Imwe namumona ifintu fyonse Yawe acitile pamenso yenu mumpanga ya Egypto kuli Farao, nakubabomfi bakwe bonse naku mpanga yakwe yonse- ³ amacusho ayakalamba ayo amenso yenu yamwene, ifishibilo, amano ifikalamba. ⁴ Leelo ukufika naileelo Yawe tamupela umutima wakwishiba, amenso yakumona, nangu amatwi yakumfwa. ⁵ Nalimitungulwile pa myaka amakumi yane mumatololo; ifyakufwala fyenu tafyalepwike, elyo ne ndyato shenu tashalepwike kumakasa yenu. ⁶ Tamwalile umukate uli onse, kabili tamwa nwinepo umwangashi uli onse nangu cakunwa icikola, pakuti mwishibe ukuti nine Yawe Lesa wenu. ⁷ Ilyo mwaishile kuli ino ncende, Sihone, imfumu yaku Heshebone, na Oge, imfumu yaku Bashani, baishile mukulwa na ifwe, leelo twalibacimfishe. ⁸ Twapokele impanga nokupela ngecabupyani kuli Rubeni, kubena Gadi ukuti cibe icapakati wamukowa wabena Manase. ⁹ Eico mulesunga amashiwi yaba muli ici cipangano nokulayakonka, pakutila fyonse ifyo mulecita fileenda bwino. ¹⁰ Mwiminine leelo, imwe bonse kucinso cakwa Yawe Lesa wenu; imfumu yenu, umutundu yenu, abakalamba benu nabacilolo benu- Nabaume bonse abamu Israeli, ¹¹ abana benu abanono, abakashi benu, abatula tulafye abo abali pakati kenu munkambi, ukufuma kuli ena uutema ikuni shenu kuli ena uumitapila amenshi yenu. ¹² Imwe muli pano mukukonka nokwingila mucipingano cakwa Yawe Lesa wenu elyo namumulapo uo Yawe Lesa wenu alepangana naimwe ileelo, ¹³ pakuti amulenge imwe leelo ukuba abantu bakwe umwine, elyo pakuti enga ba Lesa wenu, ngafilya alandile kuli imwe, pamo ngefyo alapile ku fikolwe fyenu, Abrahamu, Isaki, nakuli Yakobo. ¹⁴ Pantu tepali imwe ndepangila ici cipangano no mulapo- ¹⁵ kuli cila umo uwiminine pano naifwe ileelo kucinso cakwa yawe Lesa wesu- leelo nakuli abo abashili pano naifwe ileelo. ¹⁶ Mwalishiba ifya twaikele mumpanga yaku Egypto, nefyo twapitile mukati kanko isho mwapitilemo. ¹⁷ Mwalemona utulubi twabo utwabipa utwapangwa nefimuti elyo namabwe, silfere nefya golide ifyo fyali pakati kabo. ¹⁸ Shininkisheni ukuti muli imwwe tamuli umwaume, umwanakashi, umukowa elyo nomutundu abo imitima yabo ileauluka leelo ukufuma kuli Yawe Lesa wenu, pakuti baye shinshimuna utulubi twanko isho. Moneni pakuti kwiba pali imwe umushila wacilimwa iciletwala ubusungu. ¹⁹ Ilyo ulya muntu aumfwa amashiwi aya acitipu, akaipala ena mumulimo wakwe nokulanda, ''Nkekala umutende, nangu nyenda mubumankonso bwa mumutima wandi.' Ici cikonaula ica bomba pamo pene neyauma. ²⁰ Yawe takamwelele ena, leelo, icifukushi ca kwa Yawe nobufuba fikaba pali uyu muntu, nefitipu fyonse ifyalembwa mwibuku ili fikaba pali ena, elyo Yawe akafuta ishina lyakwe mwisamba lya mulu. ²¹ Yawe akamupatwila ena kufinkunka ukufuma ku mikowa yonse iyabena Israeli , mukusunga fyonse ifintu fya cipangano ifyo ifyalembwa muli ili buuku lya mafunde. ²² Inkulo ya kuntanshi ikesa, abana benu bakema panuma yenu, elyo nabatula tulafye abakafuma ku mpanga ya kutali, bakalanda ilyo bakamona ifikuko muli ilya mpanga na malwele yaiko ayo Yawe acilwalika- ²³ nelyo ilyo bakamona impanga yonse yaba mumingu yamulilo nomucele, apo apashakabyalwe icili conse nangu ukutwala ifisabo, apo apashakamene umulemfwe, ngokuwa kwa Sodomu na Gomora, Adma na Seboyimu, iyo Yawe aonawile mucifukushi ne cipyu- ²⁴ bakalandila pamo bonse nenko shimbi, 'Cinshi Yawe acitile ici cintu ku mpanga iyi? Bushe uku kukaba kwacifukushi cikalamba capilibula nshi?' ²⁵ Elyo abantu bakatila, 'Nipamulandu wa kukana icipingano cakwa Yawe, Lesa wafikolwe fyabo, ico bapangene nabo pakufuma mu mpanga ya Egypto, ²⁶ kabili pamulandu wakuti baile mukubombela tu lesa tumbi nokutufukamina, tu lesa uto bashaishibe kabili utushapelwe kuli bena. ²⁷ Eico ubukali bwakwa Yawe bwaiminine pampanga iyi, kukuleta icitipu icalembelwe muli ili buku. ²⁸ Yawe ali banukwile bena ukufuma mumpanga yabo iya bukali, mu cipyu, na mucifukushi cikalamba, no kubaposa mumpanga imbi, nge ifilelo. ²⁹ Ifyankama fyakwa Yawe Lesa wenu; leelo ifyasokololwa fyesu umuyayaya nabana besu, ukuti tucite fyonse amashiwi aya mafunde yakwe