¹ takuli umuntu uo batumgula nangu ukuputula uukengila mulukuta lwakwa Yawe. ² Umwana wa mubucende talingile ukulongana mu lukuta lwakwa Yawe; ukufika napa nkulo yalenga ikumi iya balupwa bakwe, takuli nangu umo muli bena uukengila mu lukuta lwakwa Yawe. ³ Umwina Amore nangu umwina Maobu tafwile ukusangwa mu lukuta lwakwa Yawe; ukufikafye napa nkulo yalenga ikumi iya ba lupwa bakwe, takuli nangu umo muli bena uwakusangwa mu lukuta lwakwa Yawe. ⁴ Ici nipamulandu wakuti tabamikumenyepo na umukate na amenshi mu nshila ilyo mwalefuma ku Egypto, kabili pamulandu ba mimishe Balamu umwana mwaume wakwa Beore ukufuma ku Petore mu Aramu Nahara, pakuti amitipwile. ⁵ Leelo Yawe Lesa wenu taumfwile kuli Balamu; eico, Yawe Lesa wenu apilibwile icitipo mu mapalo pali imwe, pamulandu Yawe Lesa wenu alimitemwa. ⁶ Mwikabalomba umutende wabo nangu icuma, munshiku shenu shonse. ⁷ Taufwile wapata umwina Edomu, pantu ni munonko; tamufwile mwapatululapo umwina Egypto, pamulandu muli balebeshi mu calo cakwe. ⁸ Ulupwa lwa mu nkulo yalenga butatu ulwa fyalwa kuli bena kuti basangwa mu lukuta lwa kwa Yawe. ⁹ Ilyo mukafuma nga ifita ku balwani benu, mukaisunge mwebene ukufuma ku fintu ifibi. ¹⁰ Nga cakuti muli umntu muli imwe uushawamishiwa pamulandu nefyamucitikile mu bushiku, eco afwile afuma kunse ya nkambi yabulwi; tafwile abwelela mu nkambi. ¹¹ Ilyo ubushiku bwafika, afwile asamba mu menshi umwine; ilyo akasuba kawa, abwelele mukati ka nkambi. ¹² Mufwile mwakwata incende mukati ka nkambi uko mwingaya; ¹³ kabili mu kwatepo fimo mu fisolobelo fyenu ifya kwimbilako; ilyo waibila impemba mukuyafwilisha wemwine, ufwile waimbako kabili ubwekeshepo ilola na ukufimba ifyafuma kuli iwe. ¹⁴ Pantu Yawe Lesa wenu aleenda mu kati ka nkambi ukumipela ukucimfya na ukumipela abalwani mu minwe yenu. Eico inkambi yenu ifwile yaba iyashila, pakuti tamwenemo icakowela muli imwe no kufuma kuli imwe. ¹⁵ Tamufwile mwabwekesha kuli cibinda umusha ilyo afyuka ukufuma kuli cibinda wakwe. ¹⁶ Lekeni akale nemwe, mu musumba onse uo asala. Mwikamutitikisha. ¹⁷ Tamufwile mwaba umwana mwanakashi umu cende mubena Israeli, nangu umwana mwaume umucende mu bena Israeli. ¹⁸ Tamufwile ukuleta indalama sha mubucende nangu indalama ya mbwa mu ng'anda yakwa Yawe Lesa wenu ku mulapo onse; pantu fyonse ifi fya bunani kuli Yawe Lesa wenu. ¹⁹ Tamufwile ukubikapo nsonsela pafyo mwakongwesha umwina Israeli munenu, ifyakulundapo fya ndalama, ifyakulya fyakulundapo, nangu ifili fyonse ifyo wamupela munkongole. ²⁰ kumu tula tula kuti wapokako ifyakulundapo; leelo kuli munonko umwina Israeli taufwile wapokako ifyakulundapo, pakuti Yawe Lesa wenu engamipala muli fyonse ifyo mwabikapo iminwe yenu, mu calo ico muleyamo mu ku kwata. ²¹ Elyo mwapanga umulapo kuli Yawe Lesa wenu, taufwile wa waya waya ukufikilisha, pamtu Yawe Lesa wenu alefwaya ukuti ufishe; cikaba lubembu kuli imwe nga cakutitamufikilishe. ²² Leelo nga cakuti ta mulapile umulapo, tacakabe lubembu kuli imwe. ²³ Icafuma pakanwa kenu mufwile ukucimona na ukucicita; ukulingana na umulapo uuntu mwalapile kuli Yawe Lesa wenu, fyonse ifyo mwalaile ku tunwa twenu. ²⁴ Ilyo mwaya mwibala lya mwangashi ilyo bena mupalamano benu, kuti mwalyamo imyangashi ukulingana napo mulefwaya, leelo mwikabikamo nangu kamo mu miseke yenu. ²⁵ Ilyo mwaya mu ngano yabena mupalamano benu, kuti mwasabako imitwe ya ngano ku minwe yenu, leelo mwikapishamo icikwakwa mu ngano shapya isha bena mupalamano.