¹ Ilyo imfumu yaku Sheba yaumfwile ululumbi lwakwa Solomoni, Yena yaishile ku Yerusalemu mukumwesha ena nefipusho ifyakosa. Aishile nomulongo wa bant abali nengamila ishalongele amafuta, golige iingi, elyo namabwe ayabengeshima. Ilyo aishile kuli Solomoni, ena amwebele ena conse ico icali mumutima wakwe. ² Solomoni ayaswike ena yonse amepusho yakwe; takwali nelyo limo ilyakosele sana kuli Solomoni; takwali icipusho ico ena tayaswike. ³ Ilyo imfumu yaku Sheba yamwene amano yacifyalilwa muli Solomoni necipango ico akulile, ⁴ ifyakulya petebulo lyakwe, ukwikala kwababombfi bakwe, imibombele yababomfi bakwe elyo imifyalile yabo, kabili balya baleta ifyakunwa nemifwalile yabo elyo nobupe bwafyakoca ena apangile palya pa ngánda yakwa Yawe, calimupapwishe ena. ⁵ Ena atile ku mfumu, ''Cacine akasebo ako naumfwile mu calo candi pamashiwi yobe elyo namano yobe ayacifyalilwa. ⁶ Ine nshasumine ifyo naumfwile mpaka naisa kuno elyo amenso yandi yamona. Tali citika uwaebelwe palubali lwa mano yobe ayacifyalilwa nefyuma! Iwe naucila pa lulumbi ulo naumfwile. ⁷ Ifyo bapalwa abantu bobe, elyo ifyo bapalwa ababomfi bobe abo abashipikisha ukwiminina pali ine, pamulandu balyumfwa ulwamano yobe ayacifyalilwa. ⁸ Abe uwapalwa Yawe Lesa obe, uyo uwabika amaka muli iwe, uyo uwabika iwe pacipuna cobe, kukuba imfumu kuli Yawe Lesa obe. Pamulandu Lesa obe alitemwa Israele mukukonka nokubakusha bena umuyayaya, ena alilenga iwe imfumu pali bena, kuli iwe mukacita ubupingushi nobulungami!'' ⁹ Éna apele imfumu amatalanta ya golide 120 elyo namafuta ayengi namabwe ayabengeshima. Takwatalile akuba amafuta ayengi nganshi nga ayo imfumu yaku Sheba apele ku mfumu Solomoni. ¹⁰ Ababomfi bakwa Hiramu elyo nababomfi bakwa Solomoni, abo abaletele golide ukufuma ku Ofiri, kabili baletele imbao shafimuti algumu namabwe ayabengeshima. ¹¹ Imbao sha fimuti, imfumu yapangile amatabo ya ngánda yakwa Yawe ne ngánda yakwe, pamofye nabansango nefilimba fyabakemba. Takwaba ulubao ulwaba ngolu ulushamonekepo pakubala mu calo cakwa Yuda. ¹² Imfumu Solomoni yapele kuli namfumu waku Sheba fyonse ifyo akabile nafyonse ifyo ena alomdele; ena amupele ifingi ukucila pafyo ena aletele ku mfumu. Eico ena alimine nokuya ku calo cakwe, ena nababomfi bakwe. ¹³ Nomba ukufina kwa golide iyo yaishile kuli Solomoni mumwaka wa 666 amatalanta ya golide, ¹⁴ lubali lumbi golide iyo bashimakwebo nabasulwishi baletele. Shonse ishamfumu shaku Arabia nabalashi mu calo nabo baletele golide na silfere kuli Solomoni. ¹⁵ Imfumu Solomoni yapangile inkwela ishikalamba ishakufulwa na golide. Amashekele imyanda mutanda aya golide yaile mu cila umo. ¹⁶ Ena kabili apangile inkwela ishafulwa na golide imyanda itatu. Amaina yatatu aya golide yaile muli cila nkwela; imfumu yabikile fyena mu ngánda yamutengo wa Lebanone. ¹⁷ Ilyo imfumu yapangile icipuna cameno yansofu nokukupapo cena na golide waengululwa. ¹⁸ Kwali amatabo mutanda ayakuninapo pakuya pa cipuna, elyo akapuna kakubikapo amakasa kakabikwe ku cipuna. Kulubali lonse ulwacipuna kwali apakushintilila amaboko nenkalamo shibili nashiminina lubali lwashibiye. ¹⁹ Inkalamo ikumi na shibili nashiminina pamatabo, imo kulubali lumbi, ulwa ibiye ulwa matabo mutanda. Takwali icipuna icaba ngeci mubufumu bonse. ²⁰ Yonse amakapu ya mfumu Solomoni yali ya golide, elyo yonse amakapu yakunwinamo mu ngánda ya mutengo wa Lebanone yali ya golide waengululwa. Takwali aya silfere pamulandu silfere talependwa ukuba uwamutengo mu nshiku shakwa Solomoni. ²¹ Imfumu yalikwete amato ayaleya kutaushishi nababomfi bakwa Hiramu. Umuku umo cila myaka itatu ubwato bwaleleta golide, silfere elyo nameno yansofu; pamofye nefikolwe nabapikoko. ²² Kbili imfumu Solomoni yacilile shonse ishamfumu shamwi sonde mufyuma namumano yacifyalilwa. ²³ Bonse bashamfumu baleya kuli Solomoni mukuti bengomfwa amano yakwe ayacifyalilwa, ayo Lesa abikile mumutima wakwe. ²⁴ Balya abalemupempula baleleta ifyabupe ifipe fya silfere nefya golide, ifyakufwala, ifyanso, elyo namafuta, pamofye nabakabalwe nemfalashi, cilamwaka. ²⁵ Solomoni akwete amatanga yabakabalwe imyanda ine elyo amaceleta, elyo nabakabalwe amakana ikumi nababili, ifyo abikile mumaceleta yamisumba elyo nomwine nao mu Yerusalemu. ²⁶ Ena atekele pashamfumu shonse ukufuma ku mumana wa Yufrate ukuya ku calo ca bapelishiti, elyo kumimpaka ya Egypto. ²⁷ Imfumu yakwete silfere mu Yerusalemu, namabwe ayengi pamushili. Ena apangile imbao shafimuti fyamu kedari ukufula kwati fimuti fyamukunyu ifyaba shefela. ²⁸ Baletele bakabalwe abakwa Solomoni ukufuma ku Egypto elyo nakufyalo fyonse. ²⁹ Nomba kumilandu imbi iikumine Solomoni, ukubalilapo nokushalikisha, bushe tayalembwa mumalyashi yakwa Ntani kasesema, mubusesemo bwakwa Ahiya umwina Shilo, elyo namucimonwa cakwa Ido kamona ico kabili cakwete ilyashi palubali lwakwa Yerobaumu umwana mwaume wakwa Nabat? ³⁰ Solomoni atekele pali Israele pamyaka amakumi yane. ³¹ Ena alele pamo nefikolwe elyo abantu bamushikile mu musumba wakwa Davidi wishi wakwe. Rehoboamu, umwana wakwe umwaume, aishileba imfumu mucifulo cakwe.