¹ Manase ali ne myaka ikumi na ibili elyo atendeke ukuteka, atekele imyaka amakumi yasano na isano mu Yerusalemu. ² Acitile ifyabipa mu menso yakwa Yawe, nga filya ifintu fya bunani ifyo inko isho Yawe atamfishe ku cinso ca bantu ba Israele. ³ Pantu akulile cipya cipya incende shapa mulu isho Hisekia wishi abongolwele, kabili akulile ifipailo fyakwa Baali, apangile incenshi sha Asherah nokulakontamina kuli shonse intanda sha mu mulu nokushishinshimuna. ⁴ Manase akulile ifipailo mu ng'anda yakwa Yawe, nanguline Yawe akonkomeshe, ''Ni mu Yerusalemu emukaba ishina lyandi umuyayaya.'' ⁵ Akulile ifipailo ifya ntanda sha mu mulu mu mansa shibili isha ng'anda yakwa Yawe. ⁶ Mu mupoka poka wakwa Hinomu alengele umwana wakwe umwaume ukupita mu mulilo. Alecita ifingelengwe, ukubuka no buloshi, kabili aleipusha kuli abo abalelanda na bafwa nabo abalelanda ne mipashi. Manase alicitile ifyabipa nganshi mu menso yakwa Yawe, kabili alimukalifye ena ku cifukushi. ⁷ Icimpsho apangile, abikile mu ng'anda yakwa Lesa. Cali nipali iyi ng'anda iyo Lesa alandile kuli David na Solomon umwana mwaume wakwe; atile, ''Nipali iyi ing'anda na mu Yerusalemu, emo nasala ukufuma mu mikowa yonse iya kwa Israele, ukuti emo nkabika ishina lyandi umuyayaya. ⁸ Nshkaseshe abantu ba Israele nangula panono ukubafumya mu mpanga iyo napele ku fikolwe fyabo, nga bakabika amano ukusanga fyonse ifyo na konkomeshe, ukukonka yonse amafunde, ifipope, nobupingushi ifyo nabapele ukupitila muli Mose. ⁹ Manase alebeleleka abena Yuda nabekashi ba mu Yerusalemu ukucita ifyabipa ukucila inko isho Yawe aonawile amenso ya bantu ba Israele. ¹⁰ Yawe alandile kuli Manase, na ku bantu bakwe, lelo bena tabaposeleko amano. ¹¹ Eico Yawe abaletele abakalamba ba bashilika ba mfumu ya Assyria, abasendele Manase mu minyololo no kumukaka mu makusu, elyo nokumusenda ku Babiloni. ¹² Ilyo Manase ali mubucushi, anashishe umutima wakwa Yawe, Lesa wakwe, kabili ali icefeshe umwine icine cine pamenso yakwa Lesa wa fikolwe fyakwe. ¹³ Apepele kuli ena; na Lesa alyumfwile ukupapata kwakwe, kabili Lesa alyumfwile ukupapata kwakwe no kumubwesha ku Yerusalemu, mu bufumu bwakwe. Elyo Manase aishibe ukuti Yawe ali ni Lesa. ¹⁴ Pamuma yaici, Manase akulile ilinga kunse ya musumba wakwa David, kumasamba ya Gihon, mu mupoka poka, kukwingila pampongolo ye sabi. Ashingulwishe ulupili lwa Ofele na cena nokwimya ilinga pamulu ulutali. Abikile abakalamba ba bashilika abashipa muli yonse imisumba iya malinga ya Yuda. ¹⁵ Asendele tu lesa twabena fyalo, icilubi ukufuma ku ng'anda yakwa Yawe, ne fipailo fyonse ifyo akulile pa lupili lwa ng'anda yakwa Yawe na mu Yerusalemu, nokufiposa panse ya musumba. ¹⁶ Akulile cipya cipya icipailo cakwa Yawe no kupelelapo ilambo lya mu tende na malambo yakutotela; akonkomeshe Yuda ukulabombela Yawe, Lesa wakwa Israele. ¹⁷ Nangu cakutila, abantu bacili balepla amalambo pa ncende sha pa mulu, lelo kuli Yawe fye, Lesa wabo. ¹⁸ Ngemilandu imbi iiyikumine Manase, ipepo lyakwe kuli Lesa wakwe, na mashiwi yabalemona ifimonwa abalelanda nankwe mwishina lyakwa Yawe, Lesa wakwa Israele, moneni, fyalilembwa pakati ka milimo yasha mfumu sha Israele. Na ¹⁹ muli ico mwaba ilyashi lyepepo lyakwe nefyo Lesa asenshiwe nacena. Kabili kwaliba ishi shonse isha membu shakwe ne fibi fyakwe ne ncende umo akulile incende shapa mulu nokwimikamo incenshi sha Asherah ne fyabaswa kuminwe, panuma talaicefya umwine-balembele palwa milandu yakwa Seer. ²⁰ Awe Manase alele pamo nefikolwe fyakwe, kabili bamushikile mu ng'anda yakwe, Amoni, umwana mwaume wakwe, aishileba imfumu mu cifulo cakwe. ²¹ Amoni ali nemyaka amakumi yabili na ibili ilyo atampile ukuteka, atekele imyaka ibili mu Yerusalemu. Acitile ifyabipa mu menso yakwa Yawe, nga Manase, wishi wakwe, ²² Acitile. Amoni aletula amalambo ku fimpashanya fya baswa ifyo Manase wishi wakwe apangile, kabili alefipepa. ²³ Taicefeshe umwine pa menso yakwa Yawe nga ifyo Manase wishi acitile. Mucifulo, uyu wine Amoni abifishe nganshi. ²⁴ Ababomfi bakwe balimwimine ena kabili bamwipaye mu ng'anda yakwe. ²⁵ Lelo abantu ba mu calo baipeye bonse abo abaimine imfumu Amoni, kabili bapangile Yosha, umwana mwaume wakwe ukuba imfumu mu cifulo cakwe.