¹ Nomba ilyo bapwishishe fyonse ifi, abantu bonse abena Israel abali kulya baile mumusumba ya Yuda kabili batobawile ilibwe mutupimfya ilyo baimike nokuputula ifimuti ifyo baimike, nokubongolola incende ishaku pepelamo ne fipailo mu Yuda monse na muli Benjamin namuli Efraimu na muli Manase, mpaka babonaula bonse. Elyo abantu bonse abamu Israel babwekelemo, cilamuntu kucifulo cakwe naku musumba wakwe. ² Hisekia alyakenye bashimapepo nabena balongene mu mabumba yabo, cila muntu na mulimo wakwe, baonse bashimapepo nabena Lebi. Abapele ukupanga imitulo yakoca na malambo, ukubomba, ukupela ukutusha, nokulumbanya pa mpongolo ya ng'anda yakwa Yawe. ³ Nakabili apele icakaniko ca mfumu pa mutulo wakoca ukufuma ku cifulo cakwe, ukuti, imitulo yakoca iyalucelo ne cungulo, na imitulo yakoca iya pa bushiku bwesabata, pa myenshi ipya, na panshita ya matebeto nge fya lembwa mu mafunde yakwa Yawe. ⁴ Kabili akonkomeshe ku bantu abaleikala mu Yerusalemu ukupela icakaniko bashimapepo nabena Lebi, pakuti bakonke sana ukunakila amafunde yakwa Yawe. ⁵ Bwangufye amafunde yalile, abena Israe balifushishe bapele ifisabo fyakubalilapo ifya ngano, umwangashi uupya, amafuta, ubuci, na ukufuma muli fyonse ifyo balimine mumabala. Baletele ifya pekumi ifya mu cintu conse, ico icali icisuma sana. ⁶ Abena Israel na Yuda abaikele mu musumba ya mu Yuda nabena baletele icapekumi ca ng'ombe ne mpaanga, ne capekumi ica fya mushilo ifintu ifya pekanishiwe kuli Yawe Lesa wabo, bali fitulike imina ne mina. ⁷ Cali nimumwenshi wabutatu ilyo batampile ukutulika ifyabupe fyabo imipili, kabili bapwile mu mwenshi walenga cine lubali. ⁸ Ilyo Hesekia na bacilolo baishile nokumona imipili, balipalile Yawe nabantu ba Israel bakwe. ⁹ Elyo Hesekia aipwishe bashimapepo nabena Lebi pa mipili. ¹⁰ Asaria shimapepo mukalamba, wa mu ng'anda yakwa Sadoke, amwaswike nokutila, ''Ukutula apo abantu batampile ukuleta imitulo mu ng'anda yakwa Yawe, twalya no kwikuta, nokushapo ifingi, pantu Yawe na pala abantu bakwe. Efya shala ifi impendwa iikulu kuno.'' ¹¹ Elyo Hesekia akonkomeshe ukupekanya imiputule yakulilamo mu ng'anda yakwa Yawe, nabo bali pekenye. ¹² Elyo baletele mucishinka imitulo, necapekumi ne fintu fya kuli Yawe. Konania umwina Lebi ewali intungulushi yabo, na ndume yakwe Shimei ewali inkonkani yakwe. ¹³ Yehiele, Asaria, Nahati, Asaele, Yerimote, Yosabadi, Eliele, Isimakia, Mahati na Benaya bali bakalamba abali mumaboko yakwa Konania na Shimei ndume yakwe, mukusontwa kwakwa Hesekia imfumu, na Asaria, ewali intungulushi pa ng'anda yakwa Lesa. ¹⁴ Kore umwana mwaume wakwe umwina Lebi, kalinda wa mpongolo yaku kabanga, ukwanga ne mitulo yakwa Lesa, mukupela ulusangulo lwa mitulo kuli Yawe na imitulo yamushilo. ¹⁵ Panshi yakwe kwali Edene, Miniamin, Yeshau, Shemaya, Amaria na Shekania, mumisumba yaba shimapepo. Bapele umulimo pantu bali abacishinka, mukupela imitulo kuli ba ndume shabo mumabumba kuli yonse aya cindama nayashacindama. ¹⁶ Nabena bapele kubaume imyaka itatu na pamulu, abo abalembelwe intuntuko shafikolwe fyabo abaingile mu ng'anda yakwa Yawe, cilabushiku, kukubomba umulimo wabo na mabumba yabo. ¹⁷ Basalanganine kuli bashimapepo nefyalembelwe ku fikolwe fyabo, elyo cimo cine nakubena Lebi imyaka amakumi yabili nokucilapo, ukulingana nemilimo shabo namabumba yabo. ¹⁸ Bablilundilemo nabana babo abanono, abana babo abaume, nabana babo abanakashi, nolukuta lonse, pantu umulimo balebomba necicetekelo bali isungile abene aba mushilo. ¹⁹ Pantu bashimapepo, abantu bakwa Aaron, abali mu mpanga ya mishi iya ku misumba yabo, nangu mu musumba yonse, umwali abaume abalumbwilwe amashina ukupela icakaniko ku baume bonse pali bashimapepo, nakuli bonse abalembelwe mufikolwe fyabo pabena Lebi. ²⁰ Hesekia acitile ififine mu Yuda monse. Acitile icisuma, icalungama kabili ifya cishinka pa cinso cakwa Yawe, Lesa wakwe. ²¹ Mu mulimo onse uo atendeke ukuwamya ng'anda yakwa Lesa, ifunde na mafunde paku fwaya Lesa wakwe, aubombele no mutima wakwe onse, kabili alitungulwile.