¹ Dabidi Atontonkanya mumutima wakwe ati, ''Ubushiku bumo ndi nokonaulwa kumaboko yakwa Saulo. Icintufye icsuma ico ninga cita cakufyukila kucalo caba Falisiti. Elyo Saulo ali nokuleka ukumfwaya mucalo conse ica Israeli, naine nkapusuka ukufuma mumaboko yakwe.'' ² Kanshi Dabidi pamo nabantu bakwe imyanda mutanda abali nankwe baima nokuya kuli Akishi mwana Maoki imfumu yaku Gati. ³ Dabidi pamo nabantu bakwe epakwikala mu Gati kuli Akishi. Cila muntu aikele nolupwa lwakwe. Elyo Dabidi nao ali nabakashi bakwe babili Ahinoamu uwaku Yisireli elyo na Abigaili uwaku Kamiri, uwafwililwe umulume Nabali. ⁴ Ilyo babwelele bamwebele Saulo ukuti Dabidi nafyukila ku Gati alekele nokumufwayafwaya. ⁵ Elyo Dabidi aebele Akishi ati, ''Ngacakuti ninsanga ukusekelelwa mumenso yenu, mumpeleko incende imo mumushi uwamucalo celo cenu, umwakuti ndeikala. Nga mulandunshi umubomfi wenu enge kalilila mumusumba umo naimwekala?'' ⁶ Kanshi pabushiku bwine ubu Akishi amupele Sikilagi abela kumfumu shabena Yuda ukufumafye napakale. ⁷ Dabidi aikele mucalo caba Falisiti umwaka umo nemyeshi ine. ⁸ Elyo Dabidi nabantu bakwe bafumine bayasansa abena Geshuri, abana Girisi nabena Ameleki. Pantu ukufuma kunshita yakale aba bantu baleikala mucalo icasuntinkene ku shuli iyo naku Egupiti. ⁹ Kanshi lyonse Ilyo Dabidi alesansa incende taleshako umuntu nelyo umo umwaume nangu umwanakashi umumi. Lelo alesenda impanga, in'gombe, bapunda, ingamila, elyo nefyakufwala elyo babwelelamo ku Akishi. ¹⁰ Ilyo lyonse Akishi amwipusha ati, ''Bushe nincende wile sansa ilelo?'' Dabidi aleasukati, '' nikumatololo yaku Yuda nangu kumatololol yaku Yerameri, nangu kumatololo yakubena Keni.'' ¹¹ Dabidi tapuswishepo nangu umo umwaume nangu umwanakashi umutuntulu uwakusenda ku Gati pantu aletontonkanya ati, ''Pantu limbi kuti baya bayatusoselela nokulanda ati, 'Ifi efyo Dabidi acita.'''Kabili ifi efyo Dabidi alecita munshiku shonse isho aikele mucalo caba Falisiti. ¹² Akishi alicetekele Dabidi elyo atile, ''Dabidi nabamupata kubantu bakwe abena Israeli, eico kanshi ali nokuba umubomfi wandi pe.''