¹ Inyengo iyonyene yo uHerodi yikaba mfumu, akivwa imbiri iya Yesu. ² Akanena na banyamata bakwe, "Uyo wo uYohane m'babatizi; akanyamuka ku bakufwa. Ichifukwa chiichi, ivyamaka ivi vikulimbanalimbana nawo." ³ Pakuti uHerodi akamulema uYohane, akamupinya, akamubika mu ndende chifukwa icha Herodiya, umwanthanda uwa Filipu, umukuru wakwe. ⁴ Pakuti uYohane akanena nawo, "Te chinza ukuti iwe wikale nawo kuba ngati mwanthanda wako." ⁵ Po pakwanza ukumugoga uwene, akanyira igulu ilya banthu, chifukwa bakamusenda uYohane ngati muneneri. ⁶ Kwene pakukumbuka isiku ilya kupapwa ukwa Herodi, umwana umwanthanda uwa Herodiya akimba pakasi pabo, akamukondweresya uHerodi. ⁷ Po aponyene akamulonjezga umwakulumbira ukumpa chilichonsi cho angalaba. ⁸ Po umulindu, umwakumubuzga kulubazu nu mama wakwe, akati, "Mumphe apanyene, itwe ilya Yohane m'babatizi, mu mbale." ⁹ Po imfumu iyonye ichitima chikayilema, kwene pakughanaghana ukulumbira ko akalumbira, na banthu bo akaba nabo piphwando lira, akalamulira ukuti bamupe. ¹⁰ Po akamutumizga munyamata, akamudumuli itwe uYohane munyumba iya ndende. ¹¹ Po akalinyamula itwe lira mumbale nukumupa umulindu, Po uwene akanyamuka nukwambu kuya niitwe lira kwa mama wakwe. ¹² Po abasambiri bakwe bakinza, bakasenda umubiri wakwe, bakaya bawusyira. Po bakinza kwa Yesu nukumuwuzga. ¹³ Po ubonyene uyesu pakwivwa, akafuma ukonyene mungalaba, ukuya amalo agachimbalangwa paweka, Po amagulo aginji gakati givwa, bakamulandata uwene pamulundu ukufuma mutwaya. ¹⁴ Uwene po akafuma, aken'ya ubwinji ubwa banthu, akabachitira ubwira, akabachizga abalware babo. ¹⁵ Po aponyene po chikaba chamabwira, abasambiri bakwe bakinza kwa wuyo, bakanena, "amalo aga ga muchimbalangwa, inyengo yajenda nomba. Mubabuzge abanthu abo bajendaje, bajende mutwaya baye bayikalire beka ichakulya." ¹⁶ Kwene uYesu akanena nabo, "Abene bate ni chifukwa ichakuti bajende. Imwenyene mwe mubape ichakulya." ¹⁷ Abene bakanena nawo, "Iswe tute na chilichonsi kwene tuli nu buledi fayivi, ni nswi zibiri." ¹⁸ Po uwene akati, "mwinze nazgo kwiine." ¹⁹ Uwene po akalamulira ubwinji ubwa banthu abo ukuti bikale pansi pa tumasole. Uwene po akasenda ababuledi fayivi abo, ni nswi zibiri izo. Ubonyene po aken'ya kumwanya, po akayiputa, po akapyola, po akabapa abasambiri bakwe ubuledi uyo, na abasambiri ku banthu abo. ²⁰ Po bonsi bakalya, bakikuta. Po bakasenda vyo balya vyasyalako, vidunga teni na vyamwabo vibiri ivyakwizula. ²¹ Po abakulya abo bakaba banavuli abakukwana fayivi sauzandi, nukuleka abanthanda na bana. ²² Umwamburu kuchedwa akababuzga abasambiri bakwe ukuti bakwere iboti nukulongolera ukuya kwisyira ilinji, ubonyene po akababuzgaga abanthu abo ukuti bajendaje kumwabo. ²³ Paumaliro, akati abuzga imizinda iya banthu ukuti yijendaje, akakwera mwigamba kwaweka ukuti ayipute. Nangabuli kukila, akaba kuranyene kwaweka. ²⁴ Panyengo iyinyene iboti likaba amamita amahandiredi aginji ukufuma ku bwalulu, likayimbaga na mayigha, chifukwa imphepo yikalimbanaga nabo. ²⁵ Kwene pakulindilira ukwa pachinayi uwusiku, uwene akajenda ukukumana nabo, akajenda pamwanya pa nyanja. ²⁶ Kwene abasambiri bakwe po bakamwen'ya po akajendaga paminzi, bakatetema, bakati, "Chizguka," Po bakakora umwilyoga. ²⁷ Po panapo uYesu akanena nabo akati, Mulimbe amoyo! Nene! Mutanyire." ²⁸ Po uPeturo akamuzgora akati, "Mulungu, nanthi mwemwe, mumbuzge ninze ukonyene paminzi." ²⁹ Po uYesu akati, "Zaga." UPeturo po akisika mwiboti po akajenda paminzi ukuya ukufika kwa Yesu. ³⁰ Kwene uwene akati ayen'ya imphepo, akinza anyira. Po akamba ukudwiba, po akinza apunda, akati, "Mulungu, nthasya ine!" ³¹ Inyengo iyonye uYesu akagolosya inyobe yakwe, nukumulema, po akanena nawo, "Iwe we wakugomezga kalimphi, choni cho wakayikaga mumoyo?" ³² Abene po bakinjira mwiboti umo, imphepo yikaleka. ³³ Po abene bo bakaba mwiboti umo, po bakamufugamilira, bakanena, "Nadi, we Mwana wa Mulungu." ³⁴ Po abene bakati balamba, bakafika kwisyira ku Genesarete. ³⁵ Po aponyene abanavuli aba aponyene bakati bamumanya, po bakatuma amazwi kulikonsi mu chigaba cho chibazinjiriye, bakinza nabo kwa wuyo bonsi bo bali ni nthenda. ³⁶ Po abene po bakamulaba ukuti bakwamfye ichakuzwara chakwe chakunzi, po bonsi bo bakamukwamfya bakachizgika.