¹ Isiku ilyonye uYesu akafumamo munyumba akikala pansi mulubazu umwa nyanja. ² Po amagulu aginji aga banthu go gakamuwunganira, uwonyene uwene akinjira mwiboti, akikala pansi, po amagulu aginji aga banthu gakimilira pamulundu. ³ Uwene akababuzga ivinthu ivyinji umwakuyerezgera. Akanena, "Yen'ya, uwakupesa akajenda ukupesa imbeyu. ⁴ Po mukupesa kwakwe, zimo zikagwira mulubazu umwa nzira, po tukinza utuyuni, nukwinza ukuzirya. ⁵ Zimo zikagwira pamabwe, po pate itope ilyinji. Po panapo zikamera, pakuti zikamera po pate itope ilyinji. ⁶ Lusanya lukati lwalama po zikumira, pakuti zitakaba na magululuzi, zikafota. ⁷ Zimo zikagwa pamimvwa. Po zikakula umwakughandaluka bulo. ⁸ Zimo zikagwa pitope ilya mvundira, Po zikapapa vipaso, po zimo zikapapa handiredi, zimo po zikapapa sikisite, zimo zikapapa sate. ⁹ Wo ali na makutwi, ayivwe." ¹⁰ Po abasambiri bakwe bakinza, bakanena nawo, "Choni cho nukunena nabo umwakukulubika?" ¹¹ Po uwene akabazgora akati, "Chifukwa kwaperecheka kuimwe ukuti mumanye ivisinsi ivya bufumu ubwa kumwanya, Po ubonye kutaperechesire ku banthu bara. ¹² Pakuti aliwonsi wo alinavyo, kukwinzu kuperecheka kwa wuyo. Kwene aliwonsi wo ate navyo, nacho angaba nacho chopenyene bakwinzu kusendako. ¹³ Cho chifukwa nkhunena nabo umwakukulubika bwelere: Chifukwa ukwen'ya bakwen'ya, kwene bakwen'ya pabwelere; ukwivwa bakwivwa, kwene bakwivwa pabwelere, nesi ni ching'anamulo chope batakuchimanya. ¹⁴ Ubuneneri ubwa Yesaya bukukwanirisyika ku banthu bara, bo bukuti, 'ukwivwa mwivyaje, kwene iching'anamulo chakwe mutachimanye; ukwen'ya mwen'ye, kwene mutenerezge. ¹⁵ Pakuti wumoyo uwa banthu aba wugomire, amakutwi gabo givwa ukwamburu kupangapo chilichonsi, po bigalira na minso gabo, ukuti baleche ukwen'ya na minso gabo, nu kwivwa na makutwi gabo, kweneso bamanye iching'anamulo mu myoyo yabo, ukuti bang'anamuche, ukuti imbachizge.' ¹⁶ Aminso ginyu gakukondwa, Chifukwa chakuti gakwen'ya; na makutwi ginyu, hope givwa. ¹⁷ Pakuti nadi apa nkhubabuzga, pakuti abaneneri abinji na banthu abalunji bakaba bakwanzirizga ukwen'ya vyo mukwen'ya, kwene bataviwonyi. Nu kwivwa vyo mukivwa, kwene batavyivuye. ¹⁸ Imwe nomba yivwisyi ifanizo ilya wakupesa. ¹⁹ Umunthu aliwonsi uwakwivwisya amazgu aga wufumu kwene atakumanya iching'anamulo chakwe, umulwani akwinza nukupoka cho chasebeka mumoyo wakwe, iyi yo yikasebeka mulubazu ulwa nzira. ²⁰ Yo yikasebeka pamabwe, uyu wo wowuyo wo akwivwa amazwi Po umwalubirolubiro akugazomerezga umwakukondwa, ²¹ po ate na magululuzi umwa wuyo weka, inthi ayikale akanyengo akansi. Nanthi pinza inthamyo pamo kuyimba chifukwa icha amazwi, uwene akufulwa umwalubiro. ²² Yo yikasebeka pakasi pamivwa, uwene wo wowuyo wo akwivwa amazwi, po ukupwelelera ukwa charu icha pansi na maka agakupusika umwabusambazi vikughandisya amazwi, po akuba umunthu uwamburi vipasi. ²³ Po yo yikasebeka pitope ilya mvundira, uyo wo wowuyo wo akwivwa amazwi nu kumanya iching'anamulo chakwe, uyo wo akupasa ivipasi, uyu handiredi, uyu sikisite, uwamwabo sate." ²⁴ Ichiyerezgero chimo uYesu akababuzga abanthu akati, "Uwufumu bwakumwanya wakuyerezgera nu munthu wo akapesa imbeyu izginza mumugunda wakwe. ²⁵ Po abanthu bakaba ukuti bagonire, umulwani wakwe akinza, akaseba indezge pakasi pa tirigu, akafumapo. ²⁶ Po imbeyu yira yikambu kukula po yikambu kupasa ivipasi, po aponyene indezge yikinza yalolecheraso. ²⁷ Po pakinza abazga aba mwenecho uwa mugunda, bakanena nawo, 'Bwana, asi mukapesa imbeyu izginza mumugunda winyu? Ngapo indezge yafumira kwii?' ²⁸ Uwene po akanene nabo, 'Munthu wo mulwani wane wo apangi ivi.' Po abazga bakanena nawo, 'Ka mukwanza tunyamuche tuye tuyinyunkhule?' ²⁹ Uwene akanena akati, 'Awe. Po mukwanza muyinyunkhule, munganyunkhulira poka nu tirigu. ³⁰ Muvileche vyonsi poka vibiri vikulire poka ukufichira panyengo iya kwinzu kugobora. Munyengo iya kugobora nkhwinzu kubabuzga abakugobora, "Mwambe muyiwunganichi indezge, muyipinye mumizigo nukuyu kuyocha, Utirigu wo mumuwunganiche mubiche munthamba yane."'" ³¹ Ichiyerezgero chimo uYesu akababuzga abanthu. Akati, "Uwufumu ubwa kumwanya wukuyanana na kambeyu aka mpiru ko umunthu akakasenda, akakapesa pa mugunda wakwe. ³² Ko kansi nkhani ukuchira imbeyu zgonsi. Kwene kakati kakula, kaba kakulu ukulusya amatundu gonsi, nukuba likwi, ubonyene nu tuyuni utwa mumlengalenga tukwinza, tukwinza kuvwama na munsamba zgakwe." ³³ Ichiyerezgero chimo akanena nabo abanthu. "Ubufumu ubwakumwanya wukuyanana ni chakututumusya ubuludi cho umwanthanda akachisenda nukuchizgika mu wutu uwakukwana amathini gatatu, ukufichira wonsi wukinza watutumuka." ³⁴ Vyonsi ivyo uYesu akanena kumagulu aga banthu umwakuphiphirisya, kwambura ichiyerezgero te nge akanena nabo abanthu chilichonsi. ³⁵ Ukuti chichitiche cho chikaneneka nu muneneri ukuti, "Ndiyigula pamulomo want nu kuyerezgera. Nkwinzu kuvumbula vyonsi ivyakuvwama ukwamba ukwikazikika ukwa chalo ichapansi." ³⁶ Po aponyene akaleka amagulu ago, akinjira munyumba. Po abasambiri bakwe bakinza kwa wuyo, bakanena, "Mutung'anamulire ichiyerezgero icha ndezge yo yili mumugunda." ³⁷ Po uYesu akabazgora akati, wo akapesa imbeyu iyinza wo Mwana wa Munthu. ³⁸ Po mugunda chalo icha pansi; ni mbeyu iyinza, bana aba wufumu. Indezge bana aba satana, ³⁹ po umulwani wo akayipesa wo usatana. Nu kugobora bo bumaliro ubwa nyengo iya chalu icha pansi, na bakugobora abo bangelo. ⁴⁰ Nomba ni ndezge iyakuyiwunganika poka nukuyocha pa moto, iyonyene yikwinzu kuba nyengo iya wumaliro pa chalu icha pansi. ⁴¹ Umwana wa Munthu akwinzu kutuma abangelo bakwe, po abene bakwinzu kuwunganika poka nukufumyamo vyonsi vyo vyakukalalizga muwufumu bwakwe, na banthu bo batakweruzgika. ⁴² Po bakwinzu kubasumbira mu gahena ilya moto, ukonyene ko kukwinzu kuba kwakulira nu kusya amino. ⁴³ Po abakulungama bakwinzu kulama ngati lizuba muwufumu ubwa Baba wawo.Wo ali na makutwi, ayivwe. ⁴⁴ Ubufumu ubwa kumwanya bwakuyanana ni chuma icha kuvwama cho chili mumugunda. Cho umunthu akinza achaga, cho akachizgaka. Chifukwa chakwe kukondwa ko akaba nako, akajenda nukukazga ivinthu vyo akaba navyo nukukala mugunda wura. ⁴⁵ Po nubufumu bwa kumwanya bukuyanana nu munthu uwa malonda wo akwanza ingale izginza. ⁴⁶ Po akati ayaga ingale yoka iya mutengo uwa patali, akajenda akaya akazga vyonsi vyo akaba navyo, akaya ayikala iyonye. ⁴⁷ Po eso, ubufumu ubwa kumwanya bukuyanana nu bukonde ubwakusumbira mu nyanja, nukuwunganika poka ivya mutundu wonsi. ⁴⁸ Bukati bwizura, bakawuguzira panzi. Po bakati bikala pansi, bakaziwunganika izginza umwakunyamulira, kwene zibibi bakazitaga kunkholongo. ⁴⁹ Vikwinzu kuba ubonyene pawumaliro uwa nyengo iya chalu icha pansi. Abangelo bakwinzu kufuma, bakwinzu kuseba ababibi pakasi apa banthu abinza. ⁵⁰ Bakwinzu kubatajira mung'anjo iya moto,ukonyene ko kukwinzu kuba ukulira nukusya amino. ⁵¹ Mwivwisya vyonsi ivi fwanthi?" Abasambiri bakanena nawo, "Twivwa" ⁵² Po uwene akanena nabo, "Chifukwa chakwe umulembi aliwonsi uwakusambizgika nu bufumu bwa kumwanya, akuyanana nu munthu wo mwenechonyumba, wo akufumya mu chuma chakwe ivyakale ni vyanomba." ⁵³ Po pakaba po uYesu akamalizga iviyerezgero, akafuma ukonye. ⁵⁴ Po uYesu akati afika kukaya aka kumwabo,akabasambizga mu masinagogi mwabo. Ubonyene abene bakambu kuzizwa, bakanena, "Uwene agasenda kwii amahara ni vyamaka ivi? ⁵⁵ Asi uyu wo mwana uwa misiri uwa matabwa? Izina ilya mama wakwe asi uMariya? Na bakamu bakwe asi uJakobo, nu Yosefe, nu Simon, nu Yuda? ⁵⁶ Na bayemba bakwe asi bonsi bali poka niiswe? Ko kwii ko umunthu uyu asenzite vyonsi ivi? ⁵⁷ Abene po bakapunula ichifukwa cha wuyo. Uyesu akanena nabo, "Kulikonsi umuneneri akubanga uwakuchindikika, ukufumyamo mu charo icha kumwabo na munyumba yakwe." ⁵⁸ Po uwene, ichifukwa ichamburu kugomezga kwabo, atakachita ivyamaka nkhani ivyinji.