3 ¹ Бошлиқларга ҳамда ҳокимиятларга итоаткор бўлиб, уларга бўйсунишлари ва ҳар бир хайрли ишга тайёр бўлишларини имонлиларга эслатиб тургин. ² Улар ҳеч кимни ёмонламасинлар, жанжалкаш бўлмасинлар, ҳамма одамларга бор мулойимликни кўрсатиб, ювош бўлсинлар. ³ Чунки бир вақтлари биз ўзимиз ҳам фаҳмсиз, итоатсиз, адашган одамлар бўлиб, турли ҳирслару кайф-сафоларнинг қуллари эдик; ёвузлик ва ҳасадгўйликда яшайдиган жирканч одамлар бўлиб, бир-биримиздан нафратланар эдик. ⁴ Аммо Нажоткоримиз Худонинг эзгулиги ва инсонпарварлиги зоҳир бўлганида, ⁵ Худо бизнинг ҳақликда қилган ишларимиз туфайли эмас, балки қайта туғилишимизнинг ювилиши орқали, Муқаддас Руҳ томонидан янгиланиш орқали Ўзининг раҳм-шафқати туфайли бизга нажот берди. ⁶ У Нажоткоримиз Исо Масиҳ орқали бизнинг устимизга Муқаддас Руҳни мўл-кўл ёғдирди, ⁷ токи Унинг инояти билан оқланиб, абадий ҳаётнинг умиди бўйича биз меросхўрлари бўлайлик. ⁸ Бу сўз ҳақдир. Шунинг учун, Худога ишонганлар яхши ишларга астойдил бел боғлашлари учун, буни тасдиқлашингни хоҳлайман. Бу эса одамлар учун яхши ва фойдалидир. ⁹ Аммо Қонун ҳақидаги аҳмоқона тортишувлардан, насл-насаблар тўқишлардан, баҳс ва жанжаллардан узоқлашгин, чунки улар фойдасиз ва беҳудадир. ¹⁰ Бидъатчи одамдан эса бир-икки огоҳлантиришдан сўнг узоқлашгин, ¹¹ чунки ўзинг биласанки, бундай одам бузилган бўлиб ва гуноҳ қилиб юриб, ўз-ўзини маҳкум этади. ¹² Артемас ёки Тихикни олдингга юборганимдан кейин, Никопол шаҳрига, менинг олдимга келишга ҳаракат қилгин. Чунки мен қишни шу ерда ўтказишга қарор қилдим. ¹³ Қонуншунос Зенас ва Аполлосни жўнатишда шундай ғамхўрлик қилгинки, уларда ҳеч нарсада камчилик бўлмасин. ¹⁴ Бизнинг одамларимиз эса ҳосилсиз бўлмасликлари учун, зарур эҳтиёжларни қондиришда яхши ишлар қилишни ўргансинлар. ¹⁵ Мен билан бирга бўлганларнинг ҳаммаси сенга салом йўллаяптилар. Бизни севадиган ҳамма имонлиларга салом айтгин. Иноят сизларнинг ҳаммаларингиз биландир. Омин.