2 ¹ Сен эса соғлом таълимотга муносиб насиҳат қилгин: ² Чоллар ҳушёр, вазмин, ақли соғлом бўлиб, имон, севги ва сабр-тоқатда соғлом бўлсинлар. ³ Шунингдек, кампирлар ҳам ўз турмуш тарзларида муқаддас бўлсинлар, ғийбатчи бўлмасинлар, ичкиликка берилмасинлар, аксинча, яхшиликка ўргатсинлар ⁴ ва ёш хотинларга ўз эрларини ҳамда фарзандларини севишни ўргатсинлар, ⁵ токи Худонинг Сўзи ҳақорат қилинмаслиги учун, ёш хотинлар иффатли, покиза, ўз уйлари ҳақида ғамхўрлик қиладиган, хушфеъл ҳамда эрларига итоатли бўлсинлар. ⁶ Шунингдек, йигитларга ҳам ақли соғлом бўлишни насиҳат қилгин. ⁷ Ҳамма нарсада ўзингни яхши ишларнинг намунаси қилиб кўрсатгин. Таълим беришда покликни, жиддийликни, зарарланмаганликни кўрсатгин. ⁸ Сўзларинг соғлом ва айблаб топилмайдиган бўлсин, токи рақиб биз ҳақимизда ёмон сўз айта олмай, уятга қолсин. ⁹ Қулларга ўз хўжайинларига бўйсунишларини, ҳамма нарсада уларга маъқул бўлишларини ва гап қайтармасликларини насиҳат қилгин. ¹⁰ Улар ўғирлик қилмасинлар, аксинча, ҳамма нарсада Нажоткоримиз Худо таълимотининг безаги бўлишлари учун бор яхши содиқликни кўрсатсинлар. ¹¹ Чунки ҳамма инсонларга Худонинг нажот берадиган инояти зоҳир бўлди. ¹² Бу иноят эса бизга ўргатади, токи биз бетавфиқликни ва дунёвий ҳирсларни рад қилиб, бу дунёда иффатли, ҳақ ва диёнатли ҳаёт кечирайлик, ¹³ ва бахтли умидимизни рўёбга чиқишини ҳамда Нажоткоримиз Исо Масиҳнинг ва буюк Худойимизнинг шуҳрати зоҳир бўлишини кутайлик. ¹⁴ Бизни ҳар қандай қонунбузарликдан қайта сотиб олиш учун Масиҳ Ўзини фидо қилди, токи яхши ишларга ғайратли бўлган алоҳида халқни Ўзи учун покласин. ¹⁵ Буларни бор ҳокимият билан гапиргин ва насиҳат қилгин, ва фош қилгин. Ҳеч ким сени камситмасин.