13 ¹ Ҳар бир жон юқори ҳокимиятларга бўйсунсин. Чунки Худодан бўлмаган ҳокимият йўқ, мавжуд бўлган ҳокимиятлар эса Худодан ўрнатилган. ² Шунинг учун ҳокимиятга қаршилик қилаётган Худонинг ўрнатганига қарши чиққан бўлади. Қаршилик қилувчилар эса ўз-ўзларини маҳкумликка дучор қиладилар. ³ Чунки бошлиқлар яхши ишлар учун эмас, балки ёмон ишлар учун даҳшатлидирлар. Ҳокимиятдан қўрқмасликни хоҳлайсанми? Яхшилик қил ва ундан мақтовлар оласан, ⁴ чунки у сенга яхшилик учун Худонинг хизматкоридир. Лекин агар ёмон иш қилсанг, қўрққин, чунки ҳокимият беҳудага қилич кўтариб юрмайди: у Худонинг ёмонлик қилганга қаҳрини сочувчи хизматкоридир. ⁵ Шунинг учун фақат қаҳрдан қўрққанликдангина эмас, балки виждон юзасидан ҳам ҳокимиятга бўйсуниш керак. ⁶ Шу сабабли ҳам сизлар солиқ тўлайсизлар, чунки улар Худонинг хизматкорлари бўлиб, доимо бу иш билан банддирлар. ⁷ Шундай қилиб, ҳар кимга ўз ҳақини беринглар: кимга солиқ бўлса – солиқ, кимга бож бўлса – бож, кимга қўрқув бўлса – қўрқув, кимга ҳурмат бўлса – ҳурмат. ⁸ Бир-бирингизни севишдан бошқа ҳеч бир нарсада ҳеч кимдан қарздор бўлманглар, чунки ўзгани севадиган одам Қонунни бажарган бўлади. ⁹ Зеро: “Зино қилма,” “Қотиллик қилма,” “Ўғирлик қилма,” “Ёлғон гувоҳлик берма,” “Тамагирлик қилма,”- деган амрлар ва бошқаларининг ҳаммаси шу сўзда жамланади: “Ўз яқинингни ўзингни севганингдек севгин”. ¹⁰ Севги яқинига ёмонлик қилмайди, шунинг учун севги – Қонунни бажаришдир. ¹¹ Энди уйқудан уйғонишимиз вақт-соати эканлигини билинглар, чунки ҳозир бизнинг нажотимиз имон келтирган пайтимиздан кўра яқинроқдир. ¹² Тун ўтиб кетди, кун эса яқинлашди. Шунинг учун қоронғилик ишларини улоқтириб ташлаб, нур қуролларига бурканайлик. ¹³ Кундузда бўлганимиздек, ўзимизни одобли тутиб, айш-ишрат ва ичкиликбозликка, шаҳватпарастлик ва бузуқликка, жанжалкашлик ва ҳасадгўйликка топширмайлик. ¹⁴ Аммо Раббий Исо Масиҳга бурканинглар ва танангизга бўлган ғамхўрликни ҳирсларга айлантирманглар.