3 ¹ Агар унинг қурбонлиги тинчлик қурбонлиги бўлса ва уни катта қорамолдан келтирса, унда бенуқсон эркак ёки урғочи жинсидаги ҳайвонни Раббийга келтирсин. ² Қурбонликнинг бошига қўлини қўйиб, уни Йиғин Чодирининг кириш жойида сўйсин, Аҳарўн ўғиллари руҳонийлар эса унинг қонини қурбонгоҳнинг ҳар томонига пуркасинлар. ³ У тинчлик қурбонлигидан Раббийга қурбонлик сифатида ички аъзоларини қоплаб турган ёғни, ички аъзоларидаги ҳамма ёғни, ⁴ иккала буйраги ва уларнинг устидаги ҳамда биқинидаги ёғни, жигари устидаги ёғни келтирсин. У буларни буйраклари билан бирга ажратиб олсин. ⁵ Аҳарўннинг ўғиллари буларни қурбонгоҳдаги оловда ёнаётган ўтинлар устида, тамоман ёндириш қурбонлиги билан бирга ёқиб юборсин. Бу ― Раббийга ёқимли бўлган хушбўй тутатқи сифатида қурбонликдир. ⁶ Агарда Раббийга кичик қорамолдан тинчлик қурбонлигини келтирмоқчи бўлса, унда бенуқсон эркак ёки урғочи жинсидаги ҳайвонни келтирсин. ⁷ Агар у қурбонлик сифатида қўйни олиб келса, унда уни Раббийнинг қаршисига олиб келсин. ⁸ Қурбонликнинг бошига қўлини қўйиб, уни Йиғин Чодири олдида сўйсин. Аҳарўннинг ўғиллари эса қўйнинг қонини қурбонгоҳнинг ҳар томонига пуркасинлар. ⁹ У тинчлик қурбонлигидан Раббийга қурбонлик сифатида унинг ёғини, умуртқа суягигача кесилган бутун думбасини, ички аъзоларини қоплаб турган ёғни, ички аъзоларидаги ҳамма ёғни, ¹⁰ иккала буйраги ва уларнинг устидаги ҳамда биқинидаги ёғни, жигари устидаги ёғни келтирсин. У буларни буйраклари билан бирга ажратиб олсин. ¹¹ Руҳоний буларни оловда ёқиб юборсин. Бу ― Раббийга қурбонлик, оловнинг озиғидир. ¹² Агарда у қурбонлик сифатида эчкини олиб келса, унда уни Раббийнинг қаршисига олиб келсин. ¹³ Қурбонликнинг бошига қўлини қўйиб, уни Йиғин Чодири олдида сўйсин. Аҳарўннинг ўғиллари эса унинг қонини қурбонгоҳнинг ҳар томонига пуркасинлар. ¹⁴ Раббийга қурбонлик сифатида оловда ёндиришга эчкининг ички аъзоларини қоплаб турган ёғни, ички аъзоларидаги ҳамма ёғни, ¹⁵ иккала буйраги ва уларнинг устидаги ҳамда биқинидаги ёғни, жигари устидаги ёғни келтирсин. У буларни буйраклари билан бирга ажратиб олсин. ¹⁶ Руҳоний буларни қурбонгоҳда ёқиб юборсин. Бу ― оловнинг озиғи, Раббийга ёқимли бўлган хушбўй ҳиддир. Ҳамма ёғи эса Раббийга тегишлидир. ¹⁷ Бу барча хонадонларингизда авлодларингиз аро абадий низомдир ― ҳеч қандай ёғни, ҳеч қандай қонни еманглар”.