13 ¹ Мана, мен олдингизга учинчи маротаба бормоқдаман. Ҳар қандай сўз икки ёки уч гувоҳнинг оғзидан қатъий бўлади. ² Сизларнинг олдингизда иккинчи маротаба бўлганимда, огоҳлантирганимдек, энди эса орангизда бўлмасдан, мен аввал гуноҳ қилган одамларни ва бошқаларнинг ҳаммасини огоҳлантираман: яна ёнингизга борганимда, аямайман. ³ Масиҳ мен орқали сўзлаётганининг исботини излаяпсизларми? Мана, Масиҳ сизлар учун заиф эмас, лекин сизларда кучлидир. ⁴ У заифликда хочга михланган бўлса ҳам, Худонинг қудрати туфайли тирикдир. Биз ҳам Масиҳда заиф эканмиз, бироқ сизлардаги Худонинг қудрати туфайли Масиҳ билан тирикмиз. ⁵ Ўз-ўзингизни текширинглар: сизлар имондасизларми? Ўзингизни синаб кўринглар. Сизлар ўзингизни билмаяпсизларми, Исо Масиҳ сизларнинг ичингизда-ку? Фақатгина сизлар ярамас бўлмасангизлар. ⁶ Биз эса ярамас эмаслигимизни билиб оласизлар, деб умид қиламан. ⁷ Биз яроқли бўлиб кўринишимиз учун эмас, балки ярамас кўринсак ҳам, сизлар яхши ишлар қилишингиз учун ҳеч қандай ёвузлик қилманглар, деб Худога ибодат қилмоқдамиз. ⁸ Чунки биз ҳақиқатга қарши эмас, балки ҳақиқат учун кучлимиз. ⁹ Биз заиф, сизлар эса кучли бўлганингиздан қувонмоқдамиз. Биз айнан шу – сизлар баркамол бўлишингиз учун ибодат қилмоқдамиз. ¹⁰ Шунинг учун мен буларни орангизда йўқлигимда ёзяпман, токи келганимда Раббий менга барбод қилиш учун эмас, барпо қилиш учун берган ҳокимият билан сизларга қарши жиддий чоралар қўлламайин. ¹¹ Ниҳоят, биродарларим, қувонинглар, камолотга интилинглар, бир-бирингизни юпатинглар, ўзаро ҳамфикр ва тинч-тотув бўлинглар, шунда севги ва тинчлик Худоси сизлар билан бирга бўлади. ¹² Бир бирингиз билан муқаддас ўпич билан саломлашинглар. Барча муқаддаслар сизларга салом йўллаяптилар. ¹³ Раббий Исо Масиҳнинг инояти, Отамиз Худонинг севгиси ва Муқаддас Руҳнинг мулоқоти сизларнинг ҳаммангиз биландир. Омин.