12 ¹ Мақтанишим мен учун фойдали эмас, шунинг учун Раббийдан олган кўриниш ва ваҳийларга келаман. ² Масиҳдаги бир одамни биламанки, ўн тўрт йил илгари – танадами ёки танадан ташқаридами билмайман, буни Худо билади – у одам учинчи осмонга олиб чиқилган эди. ³ Бундай одамни биламанки – танадами ёки танадан ташқаридами билмайман, буни Худо билади – ⁴ у жаннатга олиб чиқилган эди ва инсонга айтиш тақиқланган, тил билан ифодалаб бўлмайдиган сўзларни эшитди. ⁵ Бундай одам билан мақтанишим мумкин. Лекин ўзим билан эмас, фақат заифликларим билан мақтанаман. ⁶ Бироқ мақтанишни хоҳласам ҳам, ақлсиз бўлмайман, чунки ҳақиқатни айтаман. Лекин мен ўзимни тийиб турибман, токи кимдир мен ҳақимда менда кўраётганидан ёки эшитаётганидан ортиқ ўйламасин. ⁷ Менга очилган ваҳийларнинг ҳаддан ортиқлигидан ўта юксалмаслигим учун, менинг танамга бир ниш, яъни шайтоннинг мени қийнайдиган фариштаси берилган, токи мен ўта юксалмайин. ⁸ Буни мендан узоқлаштиришни Раббийдан уч марта илтимос қилдим. ⁹ У эса менга деди: “Менинг иноятим сен учун етарлидир, чунки Менинг қудратим заифликда амалга ошади”. Шунинг учун Масиҳнинг қудрати менда жо бўлиши учун бажонидил ўз заифликларим билан янада кўпроқ мақтанаман. ¹⁰ Шундай қилиб, мен заифликларда, хафагарчиликларда, муҳтожликларда, қувғинларда, Масиҳ учун бўлган сиқувларда қаноатланиб юрибман, чунки мен заиф бўлганимда кучлиман. ¹¹ Мен мақтаниб ақлсиз бўлдим – сизлар мени бунга мажбур қилдингизлар. Аслида сизлар мени мақташингиз керак эди, чунки мен ҳеч ким бўлмасам ҳам, ўша “олий ҳаворийлардан” ҳеч нарсада қолишмаган эдим. ¹² Менинг ҳаворийлигимнинг белгилари орангизда ҳар қандай сабр-тоқатда, аломатларда, мўъжизаларда, куч-қудратда намоён бўлди. ¹³ Бошқа Жамоатларга нисбатан сизларга нима етишмайди? Фақатгина мен ўзим сизларга оғир юк бўлмаганимми? Бу айбим учун мени кечиринглар. ¹⁴ Мана, мен учинчи марта олдингизга боришга тайёрман ва сизларга ҳеч юк бўлмайман, чунки мен сизларникини эмас, балки сизларнинг ўзингизни излайман. Чунки фарзандлар ота-оналарига эмас, балки ота-оналар фарзандларига мол-мулк тўплашлари керак. ¹⁵ Мен эса ўзимни сизларнинг жонларингиз учун бажонидил сарф қиламан ва сарф бўламан. Мен сизларни ҳаддан ташқари севсам ҳам, сизлар томондан камроқ севилмоқдаман. ¹⁶ Борди-ю, мен ўзим сизларга юк бўлмаган бўлсам ҳам, лекин айёрлик қилиб, ҳийлакорлик билан сизлардан олган бўлсам. ¹⁷ Аммо олдингизга юборган одамлар орқали сизлардан манфаат изладимми? ¹⁸ Мен Титусдан илтимос қилганман ва у билан бирга биродаримни юборганман. Титус сизлардан манфаат изладими? Биз бир руҳда ҳаракат қилмадикми? Бир йўлда юрмаган эдикми? ¹⁹ Яна бизни олдингизда ўзини оқлаяпти, деб ўйламаяпсизларми? Эй, севганларим, буларнинг ҳаммасини сизларнинг барпо бўлишингиз учун Худонинг олдида, Исо Масиҳда айтяпмиз. ²⁰ Зотан сизларнинг ёнингизга келганимда, мен сизларни исталмаган ҳолатда топмайин ва сизлар ҳам мени исталмаган ҳолатда топманглар, деб қўрқяпман, яъни орангизда яна жанжалкашликни, ҳасадни, ғазабни, талаш-тортишувларни, туҳматни, шикоятбозликни, мағрурликни, тартибсизликни топмайин,- дейман, ²¹ токи менинг кейинги келишимда Худо мени сизларнинг олдингизда камситмасин ва аввал гуноҳ қилиб, ўз нопоклигида, фоҳишабозлигида, бузуқлигида тавба қилмаган кўплар учун йиғлаб аза тутмайин.