27 ¹ Мана булар ― йилнинг барча ойларида, ҳар ойда келиб-кетиб барча ишларда подшоҳга бўлимлар бўйича хизмат қиладиган авлодларнинг бошлиқлари, мингбошилар, юзбошилар, назоратчилар, уларнинг сони бўйича барча Исроил ўғилларидир. Ҳар бир бўлимда улар йигирма тўрт минг нафардан эдилар. ² Биринчи ойда биринчи бўлим устидан Забдиэлнинг ўғли Йашобеам бошчилик қилар эди. Унинг бўлимида йигирма тўрт минг киши бор эди. ³ У Перез ўғилларидан бўлиб, биринчи ойда барча лашкарбошилар устидан бошлиқ эди. ⁴ Иккинчи ойнинг бўлими устидан ахохлик Додай бошлиқ эди. Унинг бўлимида ҳоким Миклот ҳам бўлиб, унинг бўлимида йигирма тўрт минг киши бор эди. ⁵ Учинчи ойда учинчи лашкарбоши, руҳоний Йеҳойаданинг ўғли Бенайаҳ эди. Унинг бўлимида йигирма тўрт минг киши бор эди. ⁶ Бу Бенайаҳ ўттиз нафар жасур одамларнинг бири бўлиб, уларнинг устидан бошлиқ эди. Унинг бўлимида ўғли Аммизабад ҳам бор эди. ⁷ Тўртинчи ойда тўртинчи бошлиқ Йўабнинг биродари Асаҳел эди. Ундан кейин унинг ўғли Зебадийаҳ эди. Унинг бўлимида йигирма тўрт минг киши бор эди. ⁸ Бешинчи ойда бешинчи бошлиқ Израҳдан бўлган ҳоким Шамхут эди. Унинг бўлимида йигирма тўрт минг киши бор эди. ⁹ Олтинчи ойда олтинчи бошлиқ текойлик Иккешнинг ўғли Ираҳ эди. Унинг бўлимида йигирма тўрт минг киши бор эди. ¹⁰ Еттинчи ойда еттинчи бошлиқ Эфрайим ўғилларидан пелонлик Ҳелез эди. Унинг бўлимида йигирма тўрт минг киши бор эди. ¹¹ Саккизинчи ойда саккизинчи бошлиқ Зераҳ авлодидан бўлган хушатлик Сиббекай эди. Унинг бўлимида йигирма тўрт минг киши бор эди. ¹² Тўққизинчи ойда тўққизинчи бошлиқ Бенямин ўғилларидан анатотлик Абиэзер эди. Унинг бўлимида йигирма тўрт минг киши бор эди. ¹³ Ўнинчи ойда ўнинчи бошлиқ Зераҳ авлодидан нетофатлик Махарай эди. Унинг бўлимида йигирма тўрт минг киши бор эди. ¹⁴ Ўн биринчи ойда ўн биринчи бошлиқ Эфрайим ўғилларидан пиратонлик Бенайаҳ эди. Унинг бўлимида йигирма тўрт минг киши бор эди. ¹⁵ Ўн иккинчи ойда ўн иккинчи бошлиқ Отниэл авлодидан нетофатлик Хелдай эди. Унинг бўлимида йигирма тўрт минг киши бор эди. ¹⁶ Исроил қабилалари устидан эса қуйидагилар бошлиқ эдилар: Рубен қабиласи устидан ― Зихрийнинг ўғли Элиэзер, Шимўн қабиласи устидан ― Маақаҳнинг ўғли Шефатийаҳ, ¹⁷ Леви қабиласи устидан ― Кемуэлнинг ўғли Хашабийаҳ ва Аҳарўннинг ўғли Садок, ¹⁸ Яҳудо қабиласи устидан ― Довуднинг биродарларидан бири Элиҳу, Иссохор қабиласи устидан ― Микаэлнинг ўғли Омри, ¹⁹ Забулун қабиласи устидан ― Обадийаҳнинг ўғли Ишмайаҳ, Нафтали қабиласи устидан ― Азриэлнинг ўғли Йеримот, ²⁰ Эфрайим ўғиллари устидан ― Азазийаҳнинг ўғли Ҳўшейаҳ, Манашеҳнинг ярим қабиласи устидан ― Педайаҳнинг ўғли Йўэл, ²¹ Гилъаддаги Манашеҳнинг ярим қабиласи устидан ― Закарийаҳнинг ўғли Иддо, Бенямин қабиласи устидан ― Абнернинг ўғли Йасиэл, ²² Дан қабиласи устидан ― Йерохамнинг ўғли Азариэл эди. Мана, булар Исроил қабилаларининг бошлиқлари эдилар. ²³ Довуд йигирма ва ундан кичик ёшда бўлганларнинг саноғини олмас эди, чунки Раббий Исроилни осмондаги юлдузлар каби кўпайтиришини айтган эди. ²⁴ Зеруйаҳнинг ўғли Йўаб ҳисоблашни бошлади, бироқ якунламади, чунки бу учун Исроилга Худонинг ғазаби келди. Шунинг учун ўша ҳисоб сонлари подшоҳ Довуднинг йилномасидаги сонларга киритилмади. ²⁵ Подшоҳнинг хазиналари устидан Адиэлнинг ўғли Азмавет масъул эди. Даладаги, шаҳарлардаги, қишлоқлардаги, қасрлардаги омборхоналар устидан эса Ўззийаҳнинг ўғли Йўнатан масъул эди. ²⁶ Дала ишлари билан шуғулланадиган деҳқонлар устидан Келубнинг ўғли Эзрий эди. ²⁷ Узумзорлар устидан ― раматлик Шимей, узумзорлардаги шароб омборхоналари устидан эса шифамлик Забди эди. ²⁸ Водийдаги зайтунзорлар ҳамда анжирзорлар устидан ― гедерлик Баал-Ханан, мой сақланадиган омборхоналар устидан эса Йўаш тайинланган эди. ²⁹ Шаронда боқиладиган қорамоллар устидан ― шаронлик Шитрай, водийлардаги қорамоллар устидан эса Адлайнинг ўғли Шафат эди. ³⁰ Туялар устидан ― исмоиллик Обил, эшаклар устидан меронотлик Йеҳдейаҳ эди. ³¹ Кичик қорамоллар устидан ҳожарлик Йазиз масъул эди. Буларнинг барчаси подшоҳ Довуднинг мол-мулкларининг устидан бошлиқлар эдилар. ³² Довуднинг амакиси Йўнатан маслаҳатчи, доно киши бўлиб, котиблик ҳам қилар эди. Ҳахмонининг ўғли Йехиэл подшоҳнинг ўғиллари билан бирга эди. ³³ Ахитофел подшоҳнинг маслаҳатчиси, арқилик Хушай подшоҳнинг дўсти эди. ³⁴ Ахитофелдан кейин Бенайаҳнинг ўғли Йеҳойада ва Абиатар эди. Йўаб эса подшоҳнинг лашкарбошиси эди.