22

¹ Собере ангел возьматӥз мыным улонлэсь шурзэ, кристалл кадь югыт, кудӥз бызе Инмарлэн но Ыжпилэн трон дорысьтыз.

² Солэн ульча шораз, шурлэн со палаз но та палаз но улонлэн писпуэз будэ. Со дас кык пол емышсэ вае, толызьлы быдэ сётэ аслысьтыз емышсэ. Нош куаръёсыз со писпулэн калыкъёсты катьяны.

³ Номыр каргамез уз ни луы, нош со пушкын луоз Инмарлэн но Ыжпилэн тронэз, но Солэн рабъёсыз Солы служить карозы.

⁴ Соос адӟёзы Солэсь ымнырзэ, но Солэн нимыз луоз соослэн кымысъёсазы.

⁵ Отын уз ни луы уй, соослы кулэ уз ни луы светильниклэсь но шундылэсь но югытсэ, уго соосты югыттоз Ачиз Кузё-Инмар. Соос царствовать карозы пумтэм-быронтэм дауръёс.

⁶ Ангел шуиз мыным:"Та кылъёс зэм но шонер. Святой пророкъёслэн Кузё-Инмарзы келяз Аслысьтыз ангелзэ возьматыны Аслаз рабъёсызлы, ӝоген луонозэ.

⁷ Тани, ӝоген лыкто, но шудо со адями, кин быдэсъя та книгаысь азьласянь верам кылъёсты".

⁸ Мон, Иоанн, адӟи но кылӥ тае. Куке кылӥ но адӟи, соку, мыным тае возьматӥсь ангеллэн пыд азяз усьытски, йыбырттыны солы.

⁹ Нош со шуиз мыным:" Уть, озьы эн лэсьты! Уго мон, ӵош ужась луисько, тыныд но тынад пророк вынъёсыдлы но та книгаысь кылъёсты быдэсъясьёслы но. Инмарлы Йыбыртты".

¹⁰ Со шуиз мыным:" Печать эн пукты та книгалэн азьласянь верам кылъёсыз вылэ.

¹¹ Уго дыр матын ини. Шонертэм лэсьтӥсь мед азьланьтоз шонертэм лэсьтонзэ, чылкыттэм мед саптаськоз на. Шонеолыко адями мед азьланьтоз шонер ужъёссэ, святой адями эшшо но освятится мед кариськоз.

¹² Ӝоген лыкто, Мынам дун тыронэ Монэным, котькудӥзлы сёто солэн ужъёсызъя.

¹³ Мон Альфа но Омега, Кутсконэз но Пумыз, Нырысетӥез но Берпуметӥез.

¹⁴ Шудоесь соос, улон писпулэсь емышсэ сиыны но городэ ӟезыетӥ пырон понна, мисько асьсэлэсь дӥсьёссэс.

¹⁵ Нош городлэн педпалаз - пуныос но туно-пеллёос, азыса-калгыса улӥсьёс но адями виисьёс, идолъёслы йыбырттӥсьёс, но ваньмыз кинъёс ярато но лэсьто шонертэм ужъёсты.

¹⁶ Мон, Иисус, келяй Мынысьтым ангелме ивортыны тӥледлы черкъёсын. Мон - Давидлэн выжыез но улӥез, югыт ӵукна кизили".

¹⁷ Дух но кен шуо:"Лык!" Кылӥсь мурт но мед шуоз:"Лык!" Сюэз куасьмись мед лыктоз, мылкыд карись мед басьтоз улонлэсь вузэ дунтэк.

¹⁸ Мон но котькудӥзлы ивортӥсько, кин кылэ та книгалэсь азьласянь верам кылъёссэ:"Кин ке ватсаз ке отчы мае ке, солы Инмар ватсалоз курадӟёнъёс, кудъёсыз сярысь гожтэмын та книгаын.

¹⁹ Но кин ке куштӥз ке мае ке та книгалэн азьласянь верам кылъёсысьтыз, солэсь Инмар кулэстоз святой городын будӥсь улонлэн писпуысьтыз люкетсэ".

²⁰ Та сярысь ивортӥсь вера:"Бен! Ӝоген лыкто!" Аминь! Лыкты, Кузё-Иисус!

²¹ Асьмелэн Иисус Христос Кузёмылэн благодатез асьмеосын ваньмыныз. Аминь