21

¹ Собере мон адӟи выль ин но выль музъем, уго азьлоез ин но азьлоез музъем но море но ӧвӧл ни.

² Мон, Иоанн, адӟи выль святой Иерусалим городэз. Со ваське инмысь Инмар дорысь, дасямын, кызьы кенэз чебер дисяло эмеспилы, сюан азьын.

³ Мон кылӥ бадӟым куара инмысь, кудӥз вераз: « Та Инмарлэн скинияез, калыкъёсын ӵошен улонни интыез, но Со улоз соосын татын. Соос луозы Солэн калыкез. Инмар ачиз луоз соосын но луоз соослэн Инмарзы.

⁴ Инмар ӵушылоз соослэсь синмысьтызы котькуд синвузэс, но кулон уз ни луы. Уз ни луы куректон но бӧрдон но висён но, уго азьлоез ортчиз ини".

⁵ Престол вылын пукись шуиз: «Табере лэсьтӥсько ваньзэ выльзэ». Но вера мыным: «Гожты, уго та кылъёс зэм но шонер».

⁶ Со шуиз мыным: «Быдэсмиз! Мон Альфа но Омега, Кутсконэз но Пумыз. Сюэз куасьмись муртлы дунтэк сёто улэп вулэн ошмесысьтыз.

⁷ Вормисьлы сётэмын луоз ваньзэ тае. Мон луо солы Инмарен, но со луоз Мыным пие.

⁸ Кышкасьёслэн но оскисьтэмъёслэн, адӟемпотонтэмъёслэн но адями виисьёслэн, азыса-калгыса улӥсьёслэн но туно-пелёослэн, идолъёслы йыбырттӥсьёслэн но вань пӧялляськисьёслэн адӟёнзы – тылын но сераен ӝуась озеро. Та кыкэтӥ кулон».

⁹ Но лыктӥз мон доры одӥгез сизьым пӧлысь ангел, кудӥзлэн берло наказаниосын тырмытэмын сизьым чашаез. Со шуиз мыным: «Лык, мон тыныд возьмато кышномуртэз, Ыжпилэсь кэнзэ».

¹⁰ Со монэ духен нуиз бадӟым но ӝужыт гурезь вылэ но возьматӥз быдӟым, святой Иерусалим городэз, кудӥз инмысь Инмар дорысь ваське.

¹¹ Солы сётэмын Инмарлэсь данзэ. Солэн светильникез тупа дунолэсь но дуно излы, кристалловидной яшмалы.

¹² Солэн вал бадӟым но ӝужыт стенаез, дас кык ӟеӟьыез но соос вылын дас кык ангелъёс. Ӟеӟьыос вылын гожтэмын дас кык выжыосысьтыз Израильлэн пиосызлэн нимъёссы.

¹³ Шунды ӝужанниысен куинь ӟезьы, уй паласен куинь ӟезьы, лым шор паласен куинь ӟезьы но шунды пуксённиясен куинь ӟезьы.

¹⁴ Городлэн стенаезлэн вал дас кык инъетъёс вылын, но соос вылын Ыжпилэн дас кык апостоллъёсызлэн нимъёссы гожтэмын.

¹⁵ Монэным вераськисьлэн вал зарни бодыез, соин со мерталляз городэз, солэсь ӟеӟыоссэ но стенаоссэ.

¹⁶ Город ньыльсэрего, солэн кузьдалаез но пасьталаез одӥг кадь. Со мертаз городэз бодыен: кузьдалаез, пасьталаез но ӝуждалаез даскык сюрс стадия луэ.

¹⁷ Солэсь стеназэ но мертаз: адямилэн мертэтэзъя сю ньыльдон ньыль гырпум , ангеллэн мертэтэз кадь ик.

¹⁸ Солэн стенаез яшмалэсь пуктэмын, нош город – пыртӥз адӟиськись стекло кадь, чылкыт зарнилэсь лэсьтэмын.

¹⁹ Городлэн стенаезлэн инъетъёсыз котькыӵе дуно изъёсын чебермамын: нырысетӥез инъет - яшмаен, кыкетӥез - сапфирен, куиньметӥез - халцедонэн, ньылетӥез - изумрудэн,

²⁰ витетӥез - оникс, куатетӥез - карнеол, сизьыметӥез - хризолитэн, тямысэтӥез - бериллен, укмысэтӥез - топазэн, дасэтӥез - хризопрасэн, дас одӥгетӥез - гиацинтэн, дас кыкетӥез - аметистэн.

²¹ Дас кык ӟезьыос – дас кык жемчужинаос: котькуд ӟезьы вал одӥг жемчужиналэсь. Городлэн ульчаосыз - чылкыт, пыртӥз адӟиськись стекло кадь зарнилэсь.

²² Город пушкысь мон храмез ӧй адӟы, уго солэн храмез - Ваньзэбыгатӥсь Кузё-Инмар но Ыжпи.

²³ Та городлы кулэ ӧвӧл шунды но толызь но, уго сое югыттэ Инмарлэн данэз, но Ыжпи - солэн светильникез.

²⁴ Калыкъёс ветлозы солэн югытаз, музъем вылысь царьёс но отчы асьсэлэсь данзэс но сӥ-данзэс ваёзы.

²⁵ Солэн ӟезьыосыз уз пытсаське нуназе, нош уй отын уз луы.

²⁶ Солы ваёзы данзэс но сӥ-данзэс калыкъёслэсь.

²⁷ Со пушкы номыр но кырсьсе, нокин но, юрӟым но шонертэм лэсьтӥсез, уз пырэлэ, нош соос гинэ пырозы, кинъёс гожтэмын Ыжпилэн улон книгаяз.