¹ Yesu yasanyika akumi nyi ali tumbaji nyi kwaaha tachi ja hali Mashipilitu aluchisa , hanga achize mu atu , nyi kuuka misongo yamuta po weswe. ² Mba majina ja tumbaji akumi ali wano . Mutangu, Semone { yoze alukile ngwo Petulu}, nyi Andeleu mwanakwo Tiyangu mwana Zembendeu , nyi Yowano mwanakwo ; ³ Fwilipu , nyi Mbatolomeu; Tomase, nyi Mateu mukwa kufwetesa lijimu, Tiyangu mwana Alefweu nyi Lepeu nyi jina likwo Tateu; ⁴ Semone kazelo nyi yundase ka kelyote , yoze nawa makamukuyika. ⁵ Wano akumi nyi ali Yesu waatumine . Yalweza ngwenyi , '' kanda nukaya kuyihela kuze kwatwama akwamavungu , nyi kunjila kuze kumambonge kwatwama Asamaliya . ⁶ Yenu shinaho kuli mapanga akutoka aku zuwo lya Izalele; ⁷ nyi muze munuya , ambujolenu nyi kwamba ngwenu, 'wanangana wa malillu hi wakundama. ⁸ Ukenu myeji hindwisenu afu , wayisenu akwa mbumba , nwatambula, chawana hanenu . ⁹ Kanda nukambata olu , palata, chimwe lumbongo wakuzachisa mu kulanda . ¹⁰ Kanda ukambata nyi chimwe muli pakumuna haungeji we , chimwe mbinja jiali, chimwe haku, chimwe mulumbu, mumu mukwa milimo katela kulya chenyi. ¹¹ Mweswamo mu limbo chimwe mu chihunda , nukahule yoze unatela , nyi kutwama kuze ndo muze munutukanuka nyi kuya . ¹² Nyi mununjila mu zuwo , yenu nukalimeneke. ¹³ Nyingwe zuwo linalite , echenu kuunda chenu chipwe hamwe nyi ayo . Mba nyingwe kulitele , echenu kuunda chihiluke kuliyenu. ¹⁴ Kuli waze eswe keshi kanutanutambula nyi kunwivwilila kumaliji jenu , muze munulihandununa nyi kuhichika lize zuwo chimwe limbo yenu nukakukumune fufuta kuyi lyato yenu . ¹⁵ Chaumwenemwene ngunambe kuli yenu ngwami , lamba lize lyasoloka likehe hachihunda cha sondoma nyi ngomola hatangwa lya upatwilo kuhyana lize limbo. ¹⁶ Talenu, nanutumine ngwe mapanga mukachi katungunge , chenacho pwenu akukanyama ngwe tupela nyi kuhomboka ngwe kakulimba ¹⁷ Kanyamenu kuli atu! mumu makanutwala mu yota , nyi kunulamba muma sunangonga jo. ¹⁸ Mba yenu makanuneha kuli nguvulu jo nyi myanangana jo mumu hali yami , mumu kumuchikapwa hi chinyingi kuli ayo nyi Akwa mavungu ¹⁹ Muze makanuhetesa yenu kuze, kanda nulipikala ngwenu yika munguhanjika , mumu yize mukahanjika ma kakwaha wola yacho. ²⁰ Mumu hi yena mukanjikako , alyoze shipilitu ya Tatenu mwe makahanjika muli yena. ²¹ Ndumbwa panga makakujika ndumwenyi kukufwa, nyi tato kukujika mwanenyi . Ana maka katukatukila yisemi jo nyi kwatwala ndo kukufwa. ²² Yenu keshi kanuzanga kuli mweswe ha welo wa jina lyami. Mba mweswe mashimbika ndo kusongo makamulamwina . ²³ Muze makanuhungumyona yenu mu lize limbo , yenu cheka nawa kukwo , mba chamwenemwene ngunambe kuli yenu ngwami , kunushi kahasa kupalika mu limbo lyeswe lya A Izalele ndo mwana mutu meza. ²⁴ '' Kambaji kechi kuhasa kuhyana longeshi wenyiko chimwe ndungo kuhyana mwata wenyi. ²⁵ kunanu hali kambaji afwile hali longeshi wenyi , nyi mdungo afwile hali mwata wenyi . Nyingwe masanyika mwata wazuwo ngwo Mbelezepu, akwa zuwo lyenyi chocho! ²⁶ Keshika kanda nwachina , mumu kukushi chize hanafuku makahona kufukula, nyi chimwe nawa makasweka makahona ku chiwana. ²⁷ yize mungunulweza yenu mumilima, yambenu nawa ha mwalwa, nyi yize mwivwa numatwi jenu , yikololokenu nyi maliji ahelu ayivwe. ²⁸ Kanda nwivwa woma nyi waze akushaha mujimba alyoze mahona kushaha alama. Alyoze shinaho , yoze menyeka ye alama nyi mujimba nyi kuyitwala mu Ngehena. ²⁹ Kuma tujila ali malanda nyi lumbongo kamuwika nyi? ,Hindu nyi umwe maholoka hashi kwakuhona Tatenu kunyingika . ³⁰ Alyoze chimwe kambu ja mumutwe we hanga jalula . ³¹ Kanda wivwa woma . Yena uli mulemu kuhyana tujila nyi? ³² Keshika mweswawo malikonyeka ku meso ja atu , Nyi yami ngumukonekena ku meso ja Tata wamumalilu. ³³ Alyoze yoze keshi kungutayiza ku meso ya atu, Nyi yami chichi kamu tayiza kumeso ja Tata wamumalilu. ³⁴ '' Mba kanda nunyonga ngwenu nejile nyi kuneha sambukila hano hashi. chakejile nyi kuneha sambukila alyoze nanehene poko. ³⁵ Mumu nejile nyi kuhandununa mutu nyi tata, nyi mwana wapwo nyi naye , nyi tembwamwana wapwo nyi tato pwo. ³⁶ Akwakole ja mutu makapwa amu zuwo lyenyi mwene, ³⁷ Yoze mazanga tato nyi naye kuhyana yami wamokomoko ; Yoze mazanga mwene nyi walunga nyi hanji wapwo kuhyana yami wamokomoko . ³⁸ Yoze mahona kumbata kulusu yenyi nyi kungukaula kali wamokomoko. ³⁹ Yoze mawana mwono wenyi makautokesa. Mba yoze makatokesa mwono wenyi hali yami makauwana. ⁴⁰ ''Mba yoze makanutambula kangutambula yami , nyi yoze mangutambula yami katambula yoze wangutumine. ⁴¹ Yoze matambula pulofeta mujina lya pulofeta matambula wana wa upolufeta, nyi yoze matambula mukwa ululi mujina lya mukwa ululi makatambula wana wa mukwa ululi. ⁴² Mweswawo mahana chuma chimwe chikehe kuyino yuma chimwe musenge wa meya hanga anwe mujina lya kambaji , chaumwenemwene Ngunambe kuli yenu ngwami , yoze mutu kechi katokesa nyi chimwe mu yawana wenyi''.