¹ Yehova yamba kuli Mose nyi Alone , ngwenyi , " ² Ambenu kuli atu A - Izalele , nyi kwamba kuli ayo , muze umwe lunga mapwa nyi musongo wa kuhita ku mujimba wenyi , iye mapwa wa luchisa . ³ Kulichisa chenyi chili mumu wa kuhita manyinga . Chipwe mujimba wenyi unachihichi chipwe hiwalitwamina , nyi hindu wapwa wa luchisa . ⁴ Muhela weswe mapomba muukapwa wa luchisa , nyi homa hesweho matwamaho muhapwa ha luchisa . ⁵ Mweswewo makwata ku muhela wenyi akakose mazalo jienyi nyi kusana iye mwene , nyi meya , ma mapwa wa luchisa ndo chingoloshi . ⁶ Mweswewo matwama ha chuma kuze mwe mukwa musongo wa kuhita hatwama , awo mutu mahasa kukosa mazalo jenyi nyi kusana mu meya , mba mapwa wa luchisa ndo chingoloshi . ⁷ Mweswewo makwata ku mujimba wa mukwa kuhita iye mahasa kukosa mazalo jenyi nyi kusana mweene mu meya , mba mapwa wa luchisa ndo chingoloshi . ⁸ Ngwe mukwa musongo wa kuhita mafwila mate hali umwe mupema , iye makakosa mazalo jenyi nyi kusana iye mweene mu meya , mba mapwa wa luchisa ndo chingoloshi . ⁹ Selina yeswe haze mukwa kuhita makatwama muyipwa ya luchisa . ¹⁰ Kashika mweswawo makwata chuma cheswecho hichapwa kwishi lyenyi mapwa wa luchisa ndo chingoloshi , nyi , mweswewo makambata chuma cheswe a kakose mazalo jenyi nyi kusana mu meya , mba mapwa wa luchisa ndo chingoloshi . ¹¹ Mweswawo mwe mukwa kuhita makwata kanda achikosongona moko jenyi nyi meya nyi kukosa mazalo jenyi nyi kusana mu meya , mba mapwa wa luchisa ndo chingoloshi . ¹² Yeswawo ndeho ya uma makakwata mu ka kuhita muyikapwa kuyishiha , nyi chikwachilo cheswe cha mutondo machikosongona mu meya ¹³ Muze hawuka mukwa kuhita ku kuhita chenyi , mba a ka lyalwila matangwa shimbyaali ha kulipemesa ; mba a kakosa mazalo jenyi nyi kusana muzhimba wenyi ku meya anende . Mba lye mapwa mupema . ¹⁴ Ha hatangwa lya muchinake akambate tutela aali chipwe ana a membe aali mba akanjile kumeso ja Yehova kuuchilyilo wa mbalaka ya chikungulwila ; akaahane tushila kuli sasendote . ¹⁵ Sasendote maalambula , umwe akapwe mulambu ha shili nyi mukwo akapwe mulambu wa kulumba , chocho sasendote mamufukila ha kuhita chenyi kumeso ja Yehova . ¹⁶ We swewo umwe lunga mamwanga mbuto yenyi ya ana , akasanyise mujimba weyi weswe mu meya ; mba mapwa wa luchisa ndo chingoloshi . ¹⁷ Mazalo eswe hanji lamba lyeswe kuze amwanganyine ye mbuto akayikose mu meya ; mba yikapwe ya luchisa ndo chingoloshi . ¹⁸ Mweswe lunga mapomba nyi pwo nyi mamwanga mbuto yenyi , eswe nyi aali akasane mu meya mba akapwe a luchisa ndo chingoloshi . ¹⁹ Muze mwana pwo kana hichisa , luchisa wenyi mukapwe matangwa shimbyaali , nyi mweswewo mamukwata mapwa wa luchisa ndo chingoloshi . ²⁰ Heswaho mukapomba ha kuhandunuka chenyi muhakapwa ha luchisa ; hesweho makatwama muhakapwa nawa haluchisa . ²¹ Mweswawo makwata ku muhela wenyi mahasa mazalo jenyi nyi kusana iye mwene mu meya ; mba yoze mutu akapwe wa luchisa ndo chingoloshi . ²² Mweswawo makwata chimwe chuma haze mwana pwo hatwama iye akakose mazalo jenyi nyi kusana mu meya ; mba yoze mutu akapwe wa luchisa ndo chingoloshi . ²³ Chipwe muhela hanji chuma cheswacho haze hatwama , muze machikwata , yoze mutu mapwa wa luchisa ndo chingoloshi . ²⁴ Nyi lunga mapomba nenyi , mba luchisa wa kuhandunuka chenyi meza hali lunga , iye mapwa wa luchisa ku matangwa shimbyali . Nyi muhela weswe makapomba muukapwa wa luchisa . ²⁵ Nyi mwaana pwo mahita manyinga ku matangwa anji alyoze hi ha matangwa jenyi a kuhandunuka ko chenyi , chipwe muchihyana matangwa jenyi a kuhandunuka , shimu matangwa eswe a kuhita chenyi makapwa wa luchisa , ngwe ku matangwa jenyi a kuhandunuka . Akapwe wa luchisa . ²⁶ Muhela weswe mapomba ha matangwa eswe a kuhita kwa manyinga jenyi ukapwe kuli iye ngwe muhela mapomba mu matangwa cha kuhandunuka chenyi , nyi cheswacho chitwamo matwama muchipwa cha luchisa , chizechene ngwe luchisa wa kuhandunuka chenyi . ²⁷ Mweswe makwata ku yino yuma mapwa wa luchisa ; akakose mazalo jenyi nyi kusana iye mwene mu meya , mba akapwe wa luchisa ndo chingoloshi . ²⁸ Alyoze nyi hapema ku kukatwuka ku kuhita kwa manyinga chenyi , mba akalyalwile matangwa shimbyaali , mba nyi kulutwe makapwa mupema . ²⁹ Ha tangwa lyamuchinake akande tutela aali hanji ana a membe aali nyi kutwala kuli sasendote ku chikolo cha mbalaka ya chikungulwila . ³⁰ Sasendote akalambule umuwika mulambu ha shili nyi mukwo akapwe mulambu wa kulumba , chocho iye mamufukila ha kuhita kwa manyinga chenyi cha luchisa ku meso ja Yehova . ³¹ Chocho nuka handununa atu A - Izalele kukatuka ku luchisa wo , mba kuchina makafwa mu luchisa wo , ha kuchisa tabernakulu yami , muze natwama hakuchi ko . ³² Jino je shimbi kuli mweswawo uli nyi musongo wa kuhita manyinga , nyi lunga yoze matuwisa , mbuto yenyi nyikulipihisa nayo , ³³ nyi kuli pwo uli nyi luchisa wa kuhandunuka chenyi nyi kuli mweswe uli nyi kuhita , chipwe lunga hanji chipwe pwo , nyi kuli lunga mapomba nyi pwo yoze uli mu luchisa . "'