¹ Yehova yamba kuli Mose , ngwenyi , ² " Shimbi ya mukwa mbumba hatangwa lyakumupemesa yino . Akamunehe kuli sasendote . ³ Sasendote matuhuka mu chilombo akamweseka nyi musongo wambumba hiwamuhwa . ⁴ Sasendote matumina hali yoze anambe kupemesa akande aali amwono , apema , tujila , hamwe nyi mutondo wa sendulu , nyi hina lyangengu , nyi yisope . ⁵ Sasendote matumina ashihe kajila umuwika helu lya meya waze anende muchikwachilo cha ndeho ya uma . ⁶ Sasendote akande mwe kajila wamwono hamwe nyi mutondo wa sendulu , nyi hina lyangengu nyi yisope , akachupike yino yuma yeswe , hamwe nyi kajila wa mwono , mumanyinga ja kajila yoze hamushiha helu lya meya waze anende . ⁷ Mba sasendote akasapwile meya yisuho shimbyali hali yoze anambe kumupemesa ku musongo , cheka nawa sasendote akawuluke ngwenyi kanapeme , mba sasendote makatusula kajila wa mwono akaye muchifuchi cha woya . ⁸ Mutu yoze mamupemesa akakose mazalo jenyi , akateule kambu jenyi jeswe , akasane mwene mumeya , mba mapema . Hakumanyisa yino akahiluke mu chilombo , alyoze makatwama haze lya mbalaka yenyi ndo matangwa shimbyali hahwa . ⁹ Hatangwa lya mu chishimbyali akateule kambu jenyi jeswe jakumutwe , akateule wevu wenyi nyi yikenyi kenyi . Akateule kambu jenyi , nawa akakose mazalo jenyi akasane mwene mu meya mba mapema . ¹⁰ Hatangwa lyamuchinake akande ana amapanga aali akuji keshi chipa , nyi chihwo cha panga umuwika keshi chipa , nyi mulambu waunga wa yihanda yitatu yaku kumi lya yihanda ya unga wakuchinga nyi maji nyi njongo ya maji . ¹¹ Mba sasendote mukwa kumupemesa mamanyisa yoze mutu hapemesa , hamuwika nyi yino yuma , kumeso ja Yehova kuchikolo ya mbalaka ya chikungulwila . ¹² Sasendote akande kuji ya panga umwika akamulambule ngwe mulambu wauhye , hamuwika nyi njongo ya maji ; akayihungise yikapwe mulambu wakuhungisa kumeso ja Yehova . ¹³ Akashihe mwana panga wakuji kuze akushihila mulambu washili nyi mulambu wakwocha ; muchihela cha mbalaka , mumu mulambu wa shili wa kundama kuli sasendote , ngwe mulambu wa uhye , mumu wapwa usandu kuhyana . ¹⁴ Sasendote akande amwe manyinga aku mulambu wa uhye akamusotwele mutwitwi lya chindume yoze hapemesa , nyi hamunwe wakwoko lyenyi lya chindume , nyi hamunwe wa shina lya kulu lyenyi lya chindume . ¹⁵ Sasendote akande maji munjongo aka zujile mukwoko lyenyi mwene lya chimeso , ¹⁶ akachupike songo lya munwe wenyi wa chindume mumaji ali mukwoko lyenyi lya chimeso , akasapwile amwe maji nyi munwe yisuho shimbyali kumeso ja Yehova . ¹⁷ Sasendote akande maji waze makasalaho akase mukwoko lyenyi , akanokele mutwitwi lya chindume lya yoze makapemesa , nyi hamunwe wa shina lyakwoko lyenyi lya chindume , nyi hamunwe washina lya kulu lyenyi lyachindume . Akase manyinga helu lya mulambu wa uhye . ¹⁸ Maji waze makasala mukwoko lya sasendote akakwite ha mutwe wa yoze makamupemesa , mba sasendote akamuwahisa ku meso ja Yehova . ¹⁹ Mba sasendote akalambule mulambu wa shili hanga akawahise yoze makamupemesa ku luchisa wenyi , kulutwe akashihe mulambu wa kwocha . ²⁰ Mba sasendote makalambula mulambu wa kwocha nyi mulambu wa unga ha chilumbilo . Sasendote makawahisa mwe mutu , mba makapwa wakupemesa . ²¹ Alyoze nyi ngwe chiswale kechi kuhasa ku wana yino yuma , akande kuji wapanga umuwika ha mulambu wa uhye akamu hungise , hanga akaliwahise mwene , akanehe nawa chihanda chimuwika chaku- kumi lya yihanda ya unga wakulumba wa kuchinga nyi hamulambu wa unga , nyi njongo ya maji , ²² hamuwika nyi tutela aali chipwe nyi ana amemba aali , waze mahasa kuwana ; umuwika mukapwa mulambu washili mukwo mulambu wa kwocha . ²³ Hatangwa lyamuchinake akatwale hanga akamuwahise no kuli sasendote , kuchikolo cha mbalaka ya chikungulwila , kumeso ja Yehova . ²⁴ Sasendote akambate panga akamulambule , akambate nawa nyi njongo ya maji akayizundule helu ku meso ja Yehova . ²⁵ Akashihe panga wamulambu wa uhye , akambate manyinga amwe amulambu wa uhye akasotwele mutwitwi lya chindume lya yoze makamupemesa , nyi hamunwe washina lyakwoko lyenyi lua chindume , nyi ha munwe washina lya kulu lyenyi lya chindume . ²⁶ Mba sasendote akazujile maji amwe mukwoko lyenyi mwene lya chimeso , ²⁷ akasapwile nyi munwe wenyi , wakwoko lyenyi lya chindume amwe maji amukwoko lyenyi lya chimeso yisuho shimbyali kumeso ja Yehova . ²⁸ Mba sasendote akase amwe maji mukwoko lyenyi akasotwele mutwitwi lya chindume lya yoze mamupemesa , nyi hashina lya munwe wa kwoko lyenyi lya chindume , nyi ha munwe wa shina lyakulu lyenyi lya chindume , akasele homa haze hene asele manyinga amulambu wa uhye . ²⁹ Akase amwe maji waze makasalaho ha mutwe wa yoze mamupemesa , hanga akamuwahise kumeso ja Yehova . ³⁰ Mba akalambule umwe katela , chipwe mwana lyembe , yoze mahasa kuwana - ³¹ umuwika wa mulambu wa shili mukwo wa mulambu wa kwocha , hamuwika nyi mulambu wa unga . Mba sasendote makamuwahisa yoze anambe kuwahise kumeso ja Yehova . ³² Ayino ye shimbi ya mutu yoze uli nyi musongo wa mbumba , nyi ngwe mahona kuwana mulambu yakumupemesa nayo . " ³³ Yehova yamba kuli Mose nyi kuli Alone , ngwenyi , ³⁴ " Muze munuheta ku chifuchi cha kanana chize nanuhele ku chizuka , nyi mungusa musongo uze mu utanda muzuwo mu chifuchi chize hinwazuka , ³⁵ mwenya zuwo akaye kuli sasendote akamulumbunwine . Akambe ngwenyi , ' Chinasoloka ngwe musongo uli muzuwo lyami . ' ³⁶ Sasendote akahane shimbi yakuchiza yeswe yuma yili muzuwo shimbu kanda achiya nyi kutala ushindakenyo wa musongo , kashika nyi chimwe chuma cha muzuwo makawuluka ngwenyi chili nyiluchisa . Kulutwe sasendote akaye akatale mwe muzuwo . ³⁷ Akaseke kutala nyi musongo uli mu muchipupacha zuwo , nyi uli nyi yipeka yipeka ngwe mbundu nyi yichila hanji hiwa njila muchima . ³⁸ Nyi muzuwo mwawanyiwa musongo , sasendote akatuhukemo akajile kuchikolo matangwa shimbyali . ³⁹ Sasendote akahilukileko nawa munyima ya matangwa shimbyali akeseke kutala nyi musongo hiwatanda muchipupa cha zuwo . ⁴⁰ Nyi mauwanamo , sasendote akahane shimbi ja kuchiza mawe eswe makawana nyi musongo akambile kuchihela chaluchisa haze lya chihunda . ⁴¹ Aye makatumina kukwala mukachi ka zuwo lyeswe , nyi mavu eswe makakwala makazukwila kuma kuze kwa luchisa haze lya chihunda . ⁴² Akande mawe eka akasala kanjise muli waze hachizamo akazachise mavu aha akashingule nacho zuwo . ⁴³ Nyi musongo muukasangumuka nawa muzuwo lize hachiza mawe nyi kulikwala nyi kulishingula , ⁴⁴ sasendote akaye mukulyeseka nyi musongo hi watanda muzuwo . Nyi ngwe muuli , ka musongo wa mbongolo , nyi zuwo mulipwa lya luchisa . ⁴⁵ Zuwo lino akalipuzule . Nyi mawe jalyo , nyi mitondo yalyo , nyi mavu eswe akushingula akambile haze lya chihunda kuma kuze kwa luchisa . ⁴⁶ Chikwo nawa , mweswawo makanjilamo muzuwo shimbu lichili lyakwajila makapwa waluchisa ndo chingoloshi . ⁴⁷ Mweswawo makapomba muze muzuwo akakose mazalo jenyi , nyi mweswawo makalilamo muze muzuwo akakose mazalo jenyi . ⁴⁸ Alyoze nyi sasendote maya nyi kutalamo mawana musongo kuwatanjile muzuwo lyakushingula , ka mawana musongo kuushimo hiwahwa , aka vuluke ngwenyi zuwo linapeme . ⁴⁹ Keshika sasendote akande tujila aali akapemese zuwo , nyi mutondo wa sendulu , nyi hina lya ngengu, nyi yisope . ⁵⁰ Akashihe kajila umuwika mu chikwachilo cha uma helu lya meya waze anende . ⁵¹ Akambate mutondo wa sendulu , nyi yisope , nyi hina lyangengu , nyi kaji kajila wa mwono akayichupike mu manyinga ja kajila wakufwa , nyi helu lya meya waze anende , akasapwile ha zuwo yisuho shimbyali . ⁵² Keshika akapemese zuwo nyi manyinga ja kajila nyi helu lya meya waze anende , nyi kajila wa mwono , nyi mutondo wa sendulu , nyi yisope , nyi hina lya ngenegu . ⁵³ Mba makatusula kajila wa mwono akaye kwenyi muchifuchi cha woya . Muli yino jila makawahisa zuwo , ka muli kapema . ⁵⁴ Yino muyikapwa ye shimbi ya kutwala kumusongo weswawo wa mbumba nyi yuma yize yakuneha uno musongo chipwe kuzwa , ⁵⁵ yamusongo muma zalo nyi mu zuwo , ⁵⁶ yakujimba , yimbulu, chipwe yilonda , ⁵⁷ hakunyingika musongo uno kupwa waluchisa chipwe nyi hiwaluchisako . Ayino ye shimbi ya mbumba nyi misongo .