¹ Yenu ana ononokenu kuli yisemi jenu muli Mwene , mumu chino chinate . ² '' Lemesa tatenu nyi noko'' { yenayo ye shimbi yitangu yikwete lakenyo}, ³ '' Hanga chikapwe chipema nyi yena hanga ukapwe nyi mwono wa myaka yinji mu chifuchi.'' ⁴ Yenu atato kanda nu kehya ana jenu ku utenu. Alyoze alelenu nyi kufumba nyi ku kanyamisa cha Mwene. ⁵ Ndungo , ononokenu kuli waze hanapu kumusunya akakenu nyi kulemesa chikolo nyi woma nyi kuchikima mu kutuwika cha mbunge jenu. Ononokenu kuli ayo chizechene munwonoka kuli Kilishitu. ⁶ Hi kulinga cha meso ko , hanga chitome ku mbunge jo . Pwenu akwononoka chizechene ndungo wa Kilishitu, wuza wakulinga upale wa Zambi mu mambunge jenu. ⁷ Lingenu nyi vumbi ngwe , kuli Mwene hi kuli atu ko, ⁸ mumu tunanyingkika ngo yuma yeswe yipema mutu malinga , makawana fweto kuli Mwene, chipwe ndungo chipwe mwenya chifuchi. ⁹ Yenu myata , lingilenu yuma yimuwika kuli ndungo jenu. Nikulitwamina kwomesa. Nunanyingika ngwo wapwa mwene wa eswe aali kali mwilu, iye keshi katonde nyiumwe. ¹⁰ Ha yize yinasala , likolezenu muli Mwene nyi mungolo ja ndungo jenyi. ¹¹ Zalenu mazalo a utale eswe a Zambi , hanga nukahase kumana nyi kulimika nyi unjiliji wa ndyapu. ¹² Mumu kulinjika chetu hi cha musunya nyi manyinga ko, alyoze chakulimika nyi mwanangana, nyi yiyulo, cha kulimika nyi ene a milima mwakono, cha kulimika nyi mashipilitu ja ungulungulu mu malilu. ¹³ Keshika zalenu utale weswe wa Zambi , hanga nukahase kumana mu shimbu yino yipi, nyi muze hinwalinga yeswe , kumana ngu. ¹⁴ Manenu keshika ngu, se hinunalijichika muzalilo wenu muya wa umwenemwene, hinunazale chipwiko cha utale wa ululi, ¹⁵ nyi yilyato yenu kululika sango lipema lya sambukila . ¹⁶ Helu lya yeswe andenu lukepwe wa ufulyelo , yoze kumunukahasa kujima nenyi mivu yeswe yakuyila ya mwe chingulungulu. ¹⁷ Andenu nawa ngalau ya ulamwino nyi katana ka Shipilitu , lye liji lya Zambi . ¹⁸ Lembenu shimbu yeswe mu Shipilitu, kulemba nyi kulyumba. Ndo kusongo lino, pwenu aku tala nyi ku nyongonona muze munulemba hali asandu. ¹⁹ Ngulembelelenuko , hanga akangwehe sango muze mukazulula kanwa kami. lembenu hanga kasolole chinyingi cha hamu hali sango lipema. ²⁰ Mumu wa sango lipema hinapwa kanganda wuze anase mumalenge , hanga ngukahanjike nyi hamu , chizechene changutamba kuhanjika. ²¹ Techiku , ndumbwetu wa zango nawa ndungo wafulyela muli Mwene, manwambulwila yeswe, hanga nunyingike chize nguli. ²² Hingunamutume kuli yenu ha chikuma chino, hanga nukanyingike chize tuli, nawa hanga akalembejeke mbunge jenu. ²³ Sambukila yikapwe kuli mandumbu, nyi zango hamwe nyi ufulyelo kukatuka kuli Zambi Tata nyi Mwene Yesu Kilushitu. ²⁴ Vumbi likapwe kuli yoze mweswe wa zanga Mwene Yesu Kilishitu wetu nyi zango lyamwenemwene.