¹ Alyoze Shipilitu kanambe pundu ngwenyi mumatangwa a kusula atu amwe maka hichika ufulyelo nyi kusa mana kuma shipilitu a makuli nyi ku longesa lya mahamba ² nyi amhuza a ulembekese, hakola mbunge yo eene, ³ Makahonesa atu kumbata nyi kwatindela kujila ya kulya yimwe yize Zambi atengele hanga a kayitambule nyi kusakwila kuli waze hana fulyela nawa anyingika umwenemwene. ⁴ Mumu chitangu cheswe cha Zambi chipema , nawa chakuli chize hanatambula nyi kusakwila a kalitune cho. ⁵ Alyoze hana chipwisa chisandu nyi liji lya Zambi nyi kulemba . ⁶ Nyi ngwe nwasa yino yuma hali mandumbu , munupwa ndungo apema a Yesu Kilishitu . Mumu hana kuhoka nyi maliji a ufulyelo nyi longeso lipema lize wa ku kaula. ⁷ Alyoze litune yishima yamuchifuchi eze azanga tushinakaji a mapwo. Shinaho , lilembe yena mwene mu yuma ya u Zambi. ⁸ Mumu kulifumba chamujimba china waha ha kepe , alyoze yuma ya u Zambi kuya kukwasa mu yuma yeswe . se kuyinakwato chilakenyo cha uno mwono nyi mwono uze muwiza kwiza. ⁹ Wano maliji a umwenemwene kanatambe kuta cheswe. ¹⁰ Mumu wa chino keshika twa kukilikita nyi kulitachika . Mumu twakulikolela mu Zambi ya mwono, Iye chilamwina cha atu eswe , mba ene - ene akwa kufulyela. ¹¹ Hana shimbi nyi kulongesa yino yuma . ¹² Nyi umwe kanda akulelesa ha ukweze we. Alyoze pwako , kuli waze hana fulyela , chilweza mu kuhanjika mu zango , yilingi, ha ufulyelo , nyi ha kulinga . ¹³ Ndo mungwiza , ukoleze kukutanga , kukushinjila maliji nyi kulongesa . ¹⁴ Kanda ukalengulula chawana chize chili muli yena , chize a kuhele kupalikila mu upulofeto, nyi kusayika chamoko cha makulwana. ¹⁵ Ukalame yino yuma . Pwako muli ayo , hanga kuswanya che kulutwe chikasoloke kuli eswe atu. ¹⁶ Lyehe kukanyama chipema yena mwene nyi kulongeso . Nyongonona muli yino yuma . Mumu hakulinga chino , mukalilamwina yena mwene nyi waze a kwivwilila kuli yena.