¹ Keshika , kuhyana yeswe , ngunashinjila , kulemba , kulyumba , nyi kusakwila kuli aatu eswe, ² hali myanangana nyi waze eswe ali muyitwamo ya ulemu, hanga tukatwame kuhwima nyi sambukila nyi uwayilo weswe kukushilwelya. ³ Mumu chino chinawaha hachitayiza kuli Zambi chilamwina chetu. ⁴ Kazanga aatu eswe akapwe nyi wulamwino eze kuchinyingi cha mwenemwene. ⁵ Mumu kwali umuwika Zambi nyi chitakanyishi umuwika hakachi ka Zambi nyi mutu , yiye mwe mutu Kilishitu Yesu. ⁶ Walyechele ndando ya ukulu hali eswe , shindakenyo yacho akayambujole ha wola yize yinalite. ⁷ Ha chuma chino hanangusela mukwa kwambujola nyi kapositolo - ngunambe umwe nemwene , chambile mahuza - nguli longeshi wa kwa mavungu mu ufulyelo nyi umwenemwene. ⁸ Ha chino , nguna zange malunga akalembe kuma kweswe nyi ku zundula asandu keshi utenu hanji kuyambashana . ⁹ Chize chene , nawa mapwo aliwahise nyi mazalo zae analite , nyi kuhomboka ku meso nyi mana , hi nyi kuyinda cha kambu ko hanji olu hanji kakanga hanji mahina ja ndando yikalu , ¹⁰ alyoze nyi yize yinalite hali mapwo waze akuwayila Zambi mu yitanga yipema. ¹¹ Pwo akalilongese nyimukuhola nyi kuzeyela cheswe. ¹² Alyoze chishi ku tayiza pwo kulongesa chipwe akapwe nyi chiyulu hali lunga , alyoze akahole. ¹³ Mumu alyangile kutanga Andama, kulutwe atangile Evwa . ¹⁴ Andama kakamwongele , alyoze pwo kamwongele walimbukile mu utanguko . ¹⁵ Alyoze kumakalamwina ha kusema aana, kachi manyongonona mu ufulyelo nyi zango nyi usandu hamwe nyi mana.