parfait-ayanou-wci_jas_text

Eta 5

¹ Fifia mìa gatɔwoa, mìfa avieye mìxa nu le djɔgbevɔ̃ yike le mìa dji vagbea ŋti. ² Miabe kesinɔnuwo gblẽ eye baba ɖu mìabe awuwo. ³ Mìabe sikawo ku mìabe gawo dje akaɖa. Wobe akaɖa djedjea ɖi ɖase titre le mìa ŋti eye ele mìa be ŋtilãwo bigbe sigbe djo ene. Mì bɔ kesinɔnuwo le ŋkeke mamlɛawo me ⁴ Kpɔ ɖa lebletɔ yiwo ne ɖe mìabe agble nukuwo ne mì eye mì gbe fecucu ne woa be fecu le aƒa doŋ eye agble nuku ɖelawo be aƒadodo va yi ɖo kaka Mawu aʋakalɛtɔa be towo me. ⁵ Mì nɔ agbe le anyigbã dji le agbeɖuɖu ku vivisese me, mì ɖu nu eye mì doamì le ku zã gbe. ⁶ Mì co kufiɔ eye mì wu ame djɔdjɔɛ yi me citre le mìa ŋtio wa. ⁷ Nɔviwo, mì gbɔdjiɖi kaka va se le Aƒetɔa be vava gbe. Kpɔɖa agbledela gbɔdjiɖi le tenɔŋ kpɔ anyigbã be kucece xɔasia va se ɖe gayime ci tutugbã ku ci mamlɛa la dja. ⁸ Mìa wo cã mì gbɔdiɖi, mì do ŋsẽ mìa be djiwo, ɖoa Aƒetɔa be vava gogo. ⁹ Nɔviwo mì megba ɖu ce ne mìa nɔnɔɛwo be ne Mawu megba ɖo kodjo ne mì o : kpɔɖa kodjoɖotɔa le ʋɔtrua dji. ¹⁰ Nɔvinyewo, nyagblɔɖila yiwo ne ƒo nuƒo vayi le Aƒetɔa be nyikɔ mea be fukpekpe ku djigbɔɖi ne nyi kpɔɖeŋ ne mì. ¹¹ Kpɔɖa mí gblɔna be yayratɔwoe nyi ameyiwo ne kpefu le djigbɔɖi mea. Mì se wo ƒonuƒo co Hiɔbu be djigbɔɖi ŋti, eye mì kpɔ nuwuwu yi Mawu nɛa, ɖoa Aƒetɔa ɖɔ ku nublanyui kpɔkpɔ gaku dɔmetɔtrɔ. ¹² Nɔvinyewo, do ŋkɔ ne nusianua, mì megba ta djiƒo alo anyigbã alo nubu ɖekpe o. Vɔa mìa be ɛ̃ɛ nenyi ɛ̃ɛeye mìa be o nenyi o be ne mì megba dje kodjoɖoɖo me o. ¹³ Ɖee mìa dometɔ ɖe le fukpekpe mea? Ne do gbeɖa. Ɖee mìa dometɔ ɖe le djidjɔkpɔkpɔ mea ? Ne dji kafukafu hawo. ¹⁴ Ɖee mìa dometɔ ɖe le dɔlema? Ne yɔ hamea be amegãwo, eye ne woa do gbeɖa le eta, ne woa si amì nɛ le Afetɔa be nyikɔ me ; ¹⁵ xɔse be gbedodoɖa la xɔ ne dɔnɔa eye Aƒetɔa la li cite ; eye ne wɔ nuvɔ̃a, woa cɔɛ ake. ¹⁶ Mì ʋu mìabe nuvɔ̃wo me ne mìa nɔnɔɛwo, eye mì do gbeɖa le mìa nɔnɔɛwo ta be ne mìa kpɔ dɔyɔyɔ. Ame djɔdjɔɛ yi be gbedodoɖa sesẽa wɔna dɔ gã ɖe. ¹⁷ Elia nyi amegbetɔ sigbe míawo ke ene ; edo gbeɖa be ku ŋusẽ be ci megba dja o eye ci me dja le anyigbã dji o kaka xɔ ƒe etɔ̃ ku woetri adẽ. ¹⁸ Emegbea Elia trɔ do gbeɖa eye ci dja co djiƒo, eye anyigbã ce ku. ¹⁹ Nɔvinyewo, ne ameɖe tramɔ djo le nyateƒea gbɔ eye amebu trɔ kplɔɛ gbɔa, ²⁰ ne nyaɛ be ameyi la kplɔ nuvɔ̃ wɔla yi tramɔa gbɔ co yibe mɔtratra mea, eɖe luʋɔ̃ ɖeka co ku me eye ela cɔ̃ nu nuvɔ̃ sugbɔ dji.