¹ L'itina lika bakapo bako basotomwa ok'ole bakolami oko Yuda, ntingia lobo loesonele mi ye. ² Ibango nzeba mposa le nyo le bosungi; ndokokele pe losaki l'itina li nyo oko beso baka bato ba Makedonia, la ntepele mie: ''Bambale ba Akaya baliki kosanu la nsunga-sunga yima nko mpela ene esoleka'', ngako mposa le nyo le wuke esukomolake wuke bo booko oko esali le bosungi. ³ Ngako metomia bambale bane l'itina mie bonene boki so toetikake lama la lobo'ene boyale nkoyala lobo lo ntoo-too, yaaka ndanga mi mie boyale nta kosanu nkonga oki nyo botepelake. ⁴ Ibango laa bosi Makedonia asoya loselele la mi pe asoetana lelo ntaboyalili kosanu ye, so, ntitepele nkia nio l'itina li nyo ye, nko l'itina li so basakoyala la losaki l'itina dilo li nyo, tongoyoka diemo li sonda wuke. ⁵ Nyenili mi mie ekolama la mi mbotitie bambale bane baye ok'ole nyo ntondo le mi l'itina li nkolimie bo bakapo bako ba isei basaka nyo bokosia. Ngako, ngengo ebele mi ngotana bakapo bankuma kosanu nga ikapo lisopawua la bobonda nyingha, ntenge nga mfuti ye. ⁶ Boyepolaka lobo'ene Boto lo yona nio, angoduka nko nio; boto lo yona wueke angoduka pe nko wuke. ⁷ Ekolama la boto nko apae oko dweli losa nde nkika asekisa, ntenge la benghoo-nghoo laape nkambia ye, ibango Wangi alanga boto lo kapa la nyingha. ⁸ Pe Wangi alia nguya le nkapele nyo bakonda bankumela balanga nyo bio-bio, l'itina nde nyo boyale la biemba binkumela bi kamba nyo pe botikalake nko la bobalelo wuke l'itina li nkele dilo ngengo ok'ole bato. ⁹ Kweli nkonga otepela basono; nde alokokape la nyingha ok'ole ba mbolo Dilo nde litikala kuu edie l'edie. ¹⁰ Akoboko nde lo kapa bionwa ok'ole ba yoni pe efula itina lika biemba engopawua, angonyotia nkela bi nyo la biuonwa pe angofulia balukelo ba nyo ba bokolami. ¹¹ Bongoyala bakwaki oko bemboka benkuma, ngako ango nyo boyosono nkapa-kapa oko ngengo binkumela, pe wuke bangotelia Wangi l'itina lika bakapo ba nyo banga so toabelela. ¹² Esali eko ekamba nyo ntenge nko la nkapele batii baka Wangi ye yaaka ekembia mbotitia bi bitelia ok'ole Wangi. ¹³ Ibango la kiesali ene ekela nyo bosokalakia nyo nkika ng'ole nyo, bato bangotelia Wangi l'itina lika bototie bonyo boko bo lami la boyoboli bo nyo oko nsango dilo eka Masiya, pe l'itina lika bakapo bako ba kapa nyo nyoa bo laape boto nd'onkumela. ¹⁴ Pe oko mbotitia bibo bi botitia bo l'itina li nyo, bebonda be bo beyilela kuu nko ok'ole nyo, ibango la iyangi lika Wangi li sonda lisaka nde asembola ok'ole nyo. ¹⁵ Bitelia ok'ole Wangi ibango la ikapo li nde limpa so ntatoyosone ndimbola ye.