¹ Mi Paolo, mebotitia mi nkika oko mboka le bokiseni bo bienge pe la totolo eka Masiya. Mi one lokakisena bienge oko beso ba nyo, yaaka ngengo'ele mi la nyo nkalakia boto lo Wangi! ² Mebotitia mi mie ngeng'enga mi nzale mia nyo ndiemo, ntabo nsukomolake ntepela la wembu bone bo yanga mi ndakia ok'ole bankina bane ba tepela boboe so tolokokende la nsembele mposa bi bienge. ³ Ibango, nkia tolokok'ende oko bienge, etumba leso ntenge etumba le bienge ye, ⁴ ibango bilolelo biso bi etumba ntabinge bi bienge ye yaaka bile nguya eka Wangi l'itina li nzimbe bingolo bi wembu (ndie bi wembu) bika bobe. Toyimba bayoyi ⁵ pe ndie bi nkoma bine bi yemala esongo la boyeli boka Wangi. ⁶ Tolala batangeli bankumela la balalo, l'itina soe bayosone ntotie Masiya. ⁷ Bosolenda mbo bil'oko ntondo le beso ba nyo. Onkeni loka sekisa nde ndee ale boto oka Masiya, akatepele nde nkika nde ndee, ng'ole nde boto oka Masiya, la so pe tole nko ngako. ⁸ Nkia mi nkika nsonda nio la nsangie bienge l'itina lika bonkumu boso, bone Nkolo atopake l'itina li nkembie nyo, pe ntenge l'itina li mpite nyo ye, nkia ngako ntiyoke diemo ye. ⁹ Yaaka ntilange nyenele nga boto loeyokia nyo diemo oko mboka le bekanda. ¹⁰ Batepela bo boe, Bekanda be nde belia bolito pe wembu, yaaka bienge bi nde biyenele bonghonyu pe atepelo le nde ele ntoo-ntoo. ¹¹ Paaka bato ba luumba'eko bayeba bo boe ngengo eyaka so, tongotia bisali kweli nkonga osono so oko bekanda. ¹² So ntatolanga soe tokakolimie soa bamo baabo bane bakasangia bienge bo nkika ye. ¹³ Yaaka so ntatokanangie bienge biso kuu la nsonde bolelo ye, yaaka nk'oko dweli losaka Wangi akolimia l'itina li so nde ndee boyosone nzia-yia ok'ole nyo. ¹⁴ Ntatosonde bolelo boso ye, ekanoyala nko laa ntatoyosoni nzia-yia oni ole nyo; ibango tosoyia nta dilo ole nyo la mbelele nyo nsango dilo eka Masiya. ¹⁵ Ntatosonde belelo beso ye, ntatokanangie bienge lama la dweli lo bisali bitia bato bankina ye; yaaka elikia leso ele nghane, ngengo enga boyambi bonyo bofula, soo nko so tobae ndie lenene ok'ole nyo, nkia ntatosondili bolelo. ¹⁶ Ngako tongobela nsango dilo oko bise bine bil'oko ntondo le nyo, ntatokanangie bienge lama la bisali bisotiwua oko ndie eka boto onkina ye. ¹⁷ Yaaka paaka boto one lokasekisa nde nkika, akasekise oko lina lika nkolo. ¹⁸ Ibango boto onkeni loka sangia bienge nde nkika ntango yenele bokolami ye, yaaka one longa Nkolo nde nkika aosangie.