¹ A pangi ni a tata yivwenu ki ni kusamba. ² Kiedidi athu evwa Polu wa wakudilamu ndaka ya ki hebreu eni oshu adibata nee. Mweni etshi ³ Ami nidi mu yuda nia tetuka ku Tarse ku Silisi kashi nia sashiwa ha vidi mwenedi ku mokhu ma Ngamadiela. Nia nonini mulongi wa tadila tsiku jia a khakha. Nia dihana kudi Nzambi mudi ki nudi enu lelu edi. ⁴ Nia mwenishini athu alabanga ndjila mweni pashi jingi nia khedi kukasa amala ni akhetu misinga ni ku washia mu boloku. ⁵ Mbuta dia anganga Nzambi ni a mambuta dibundu alunga ku nuhwa kithemu etshi nia nonini mikanda mia katukidi kudi eni kikuma kia a pangi ku Damas. Kikuma niendi ku wakwata ni wa nehi a kukasa miyololu ku Yeluselemi. ⁶ Ki nia khedi mu ndjila ni kwenda nia tula penapena ni Damas mu mbala yimoshi mu midi mikalukalu yimoshi ya katukidi ku wulu ya bejimina kiangolu mwila woshu. ⁷ Nia bwidi hashi nievwa ndaka yenda ya ngu leza etshi Sawudi Sawudi kikuma kiakhi wu ku nguhwanga pashi. ⁸ Ami nia vutudidi etshi Ayi nani Fumu Mweni etshi Ami nidi Yesu mu kwa Nazaleti wudi kuhwanga pashi. ⁹ Athu a twakhedi nawu amweni mikalukalu kashi kevidiku ndaka ya muthu wakulanga. ¹⁰ Ami nia muhula ekhi ami ni feti kuhanga. Fumu wa ndeza etshi Zanguluka ndanga wendi ku Damas kweno kuna a ku kuleza ma wu feti kuhanga. ¹¹ Ami nia khediku epi kumona kikuma kia kubejimina kwa mikalukalu niendi ku Damas mu ngolu jia athu a twakhedi nawu. ¹² Kwenokuna nia waninginini ni muthu mumoshi wa tambikanga mi jina dia Anani muthu wa shipidi wa jitisa tshiku Ayuda oshu akhedi ku mu tela kithemu kia pimbu. ¹³ Wejidi wa makana penapena ni ami wakula etshi Pangi Sawudi temuna. Mu mbala yimoshi nia mu mona. ¹⁴ He wakula etshi Nzambi wa a khakha jietu wa ku sodidi kadi kikuma wijiki luzolu lwendji wu moni muthu wa kiedika wivi ndaka ya wudika mu kanwa diendji. ¹⁵ Kikuma wa kakhala themu wendji kudi athu mu moshu ma wa mweni ni ma wevidi. ¹⁶ Ekhi epi wudi ku makininanga. Zanguluka wu botami kubola kweyi kwahwa mu jina diendji. ¹⁷ Nia vutukidi ku Yeluselemi tangwa di nia khedi kusambila mu nzu ya Nzambi nia bwidi nia dimina. ¹⁸ Nia mu mweni wenda wa ndeza etshi Hanga tswalu wu katuki ha Yeluselemi kikuma eni ka kukumbula oku kithemu kieyi kia tadila ami. ¹⁹ Ami nia kula etshi Eni ejiya owu mweni khia pila nia khedi kukwata athu ni ku washia mu boloku ni kuwa bula owoshu akhedi ku kukwikila ayi mu manzu ma yisambu. ²⁰ Kiedidi mashi ma Etiene themu weyi ma tsakuka ami niakhedi hohu nia kumbudidi moshu mahangidi ni kukhetshikina miledi ya athu a mu jihidi. ²¹ Kashi mweni wandejidi etshi Ndanga kikuma ni ku kutuma kwalaha kudi apani. ²² Athu azokudidi matu ni ku mwivwa ti wa manisa ndaka yendji. Kashi eni he athutha ndaka kiangolu akula etshi Katulenu muthu wa mutshindu owu hashi kikuma kushiku mboti ajingi. ²³ Tangwa diakhedi kungangumuka a bhakanga miledi miowu ni ku mwanga mbombi ku wulu Kapiteni fumu wahana kumandima hengishi Polu mu lupangu. ²⁴ Wa hana djila a mu budi fimbu enjimweni aswakadi ku bakisa kikuma kiakhi athu akhedi ku ngangumuka kienkina. ²⁵ Kiela a mu kasa mishinga Polu waleza Kumanda wakhedi henahana Medi pimbu mu kubula muthu wudi mukwa kifutshi kia Loma wa konda kadi kuzengila mulonga. ²⁶ Tangwa dievidi Kumanda kienkina waya kudi Kapiteni Fumu dia asuta mu ku muleza etshi ekhi wu kuzolanga kuhanga. Kikuma muthu oyu wudi mukwa kifutshi kia Loma. ²⁷ Kapiteni Fumu dia asuta waya wa muhila etshi Ngu leji yivwa wudi mukwa kifuthsi kia Loma. Polu wa vutula etshi Hee. ²⁸ Kapiteni fumu dia asuta wa vutula epi etshi Nia bidishidi fwalanga jingi mu kwikhina mukwa kifushu kia Loma. Kashi Polu wakudidi etshi Ami nia tetuka ku Loma. ²⁹ He athu akhedi kuzola ku mu sambisa akatuka mbala yimoshi. Kapiteni Fumi ni dia asuta ni mweni wevidi woma tangwa dievidi etshi Polu wkhedi mukwa kifutshi kia Loma kikuma a mu kashidi mishinga. ³⁰ Mu kukhia Kapiteni fumu dia asuta wa zodidi ejiki kiedika mu kufunda kwa mu fundidi Polu kudi Ayuda. Heni hohu wa mu kasulula mishinga wa hana djila kudi Anganga Nzambi ni a wongiki athu oshu enda kukhala ku fondu. Ku manima awudisa Polu a mushia mu mbaji.