¹ Tangwa ditwa kapinginini nawu twengididi mu masuwa twaya mbala yimoshi mu ndjila ya vidi dia Koshi. Kilumbu kia labidi mu kukhia twa tudidi ku vidi dia Rodeshi Katuka henahana twaya ku vidi dia Patala. ² Kitwedidi twa mona masuwa ma moshi mayanga ku Fenisia twengididi twaya. ³ Tangwa ditwedidi twa kewuka kidinga kia Shipre twa kitemba ku kokhu dia ki mama twa zawuka a sambwa dia Siria twaya kukhela ha Tire kikuma henihohu masuwa ma feti kutulula yima. ⁴ Ki twela twa mona alonguki twa hangidi hohu yilumbu tsambwadi. Alonguki alejidi Polu mu ngolu ya Pevi ya longu mu kuleka kwenda ku Yeluselemi. ⁵ Ki twedidi twa tula ku tsuka ya yilumbu yi twashidi twa katukidi twaya. Owoshu ni akhetu jiowu ni ana jiowu a tu shindjikididi tii ku mapambu ma vidi diowu. Kumanima twa fukimini ha kiawu twa sambididi Nzambi twa haninginini mboti ya tsuka. ⁶ Etu twendidi mu khulu ya masuwa tangwa dia vutukanga eni kwimbu diowu. ⁷ Ki twedidi twa manisa mu kujeta ku Tire twendidi kutula ku Petolemayisi. Kwenokuna twahwedi a pangi mboti twa jinga nawu kilumbu kimoshi. ⁸ Mu kukhia twa katukidi twaya ku Sezare. Twengididi mundjia Fidipa longi wa tsangu ya mboti oyuna wakhedi mumoshi mu katshi ka athu tsambwadi twa jingididi kudi mweni. ⁹ Kinga lo muthu mweni wakhedi ni andumba awana akonda kwijika amala akhedi kubikula. ¹⁰ Kinga lo etu ki twa jingididi hohu ndambu yilumbu mbikudi mumoshi jina diendji Agabushi wa katukidi ku zude watula. ¹¹ Wejidi penapena ni etu wa nona mukaba wa Polu. Wa dikasa nawu miendu ni mokhu wakula etshi Pevi ya Longu yakula etshi Kieni kiki Ayuda a ku Yeluselemi a kakasa mu kwa mukaba owu a ka mu yekula ku mokhu ma apani. ¹² Tangwa di twevidi mambu menamana ni etu ni athu ajingilanga henhana twa lekisa Polu kendoku ku Yeluselemi. ¹³ He Polu wa vutudidi etshi Ekhi nwa hanga kudila kwa pamba ni mutshima pashi wa pamba nu kuhwanga Kikuma nia kumbula keshiku kashu etshi akhashi mishinga kashi ata kufwa ku Yeluselemi kikuma kia jina dia Fumu Yesu. ¹⁴ Twa kukidiku kwalumuna mabanza ma Polu twa kudidi etshi Leka luzolu lwa Nzambi lu hangami. ¹⁵ Kumanima ma mwa yilumbu twa zangudidi yinda yetu twa kanduka ku Yeluselemi. ¹⁶ Ndambu ya Alonguki a ku Sezare endi nietu. Eni akhedi kukiba ni muthu mumoshi jina diendji Manasoni mukwa Shipre mulonguki mukulu wu tufeti kukhala nendji. ¹⁷ Kitwuela twa tula ku Yeluselemi a pangi a tu yambidi ni kieshi kioshu. ¹⁸ Mu kukhia Polu wendidi ni etu kunzia Jaki A mambuta dibundu oshu akhedi kwenokuna. ¹⁹ Kumanima ma kuhwahwa mboti wata lumenu mutshindu Nzambi a hangidi kudi apani mu kisalu kiendji. ²⁰ Tangwa dia mwividi ahwedi Nzambi lukumu a mu leza etshi Wamona pangi athu mafunda mangahi ma kwikila mu katshi ka Ayuda. ²¹ Owu oshu a kumbula kusweka tsiku ya Nzambi.Evidi etshi ayi wa longidi Ayuda oshu enda kujinga mu membu ma apani mu kuleka malongi ma Moshi wa wa lekisa mu kwingisa ana mukhanda ni kuleka kulaba tsiku ji kulu. ²² Ekhi tufeti kuhanga Eni akwivwa kaka etshi ayi weza. ²³ Hanga ma tu ku kuleza kikimweni tudi ni athu awana a kumbudidi. ²⁴ Nona athu mwena awa hanga mudi kikwakulanga tsiku ni eni wa futidi kikuma awa kuludi dingwa. Kienikioki owoshu a kwijiya etshi yoshu ya wa lejidi mu jina dieyi yidi wukhubidi. Eni akwijiya etshi ayi epi wenda kulemvuka ku tsiku. ²⁵ Kashi kikuma kia apani akwikididi twa nu sonikini mu kulaba milongi mi twa nu hwedi etshi yima ya ku mahamba mashi ni ambiji a difila kalungidiku kudia aleki ma wala ma kulekisanga tsiku. ²⁶ He mu kukhia Polu wa senda athu mu kwenda ku dihangika mu nzu ya Nzambi ndjila yimoshi ni mweni wata mukanda mu kulombulula yilumbu ya kudihangika tii koku kwa kahana makabu makoshu muthu. ²⁷ Kiela yilumbu tsambwadi yahita kiatshi kia Ayuda a ku Azi amweni Polu mu nzu ya Nzambi a hukumuna athu oshu mu ku mu tombukila mu pila etshi a mu kwata. ²⁸ Ayandjika kwakula kiangolu etshi Swakalenu amala ku Yiseledi nu tadi muthu wu ku longanga muma mwoshu mambu ma bola kudi athu ni kubebisa tshiku ni homa mwenaha. ²⁹ Thethi a mweni Tolofimi mu kwa Efesu ni mweni ku vidi abandjidi etshi Polu wa mwingishidi mu nzu ya Nzambi. ³⁰ Vidi dioshu diekhinini kisakasaka athu oshu endidi fishi mu kukwata Polu. A mu hudishidi mu nzu ya Nzambi mu mbala yimoshi yanzuluku yoshu a yandjidika. ³¹ Akhedi kuhenga pila ya ku mu jiya tsangu jia tudidi kudi Kapitene oyuna wakhedi fumu wa kengidilanga etshi Yeluselemi dioshu diengila kisakasaka. ³² Mu tangwa mwenedina kaka wa nonini asuta ni a kumanda aya kwakhedi hundji dia athu. Kiela athu amona Kapiteni ni asuta aleka kubula Polu. ³³ He Kapiteni waya kwakhedi eni wakwata Polu wahana djila a mu kashi miyololu miadi. Wehula mweni nani ekhi a hanga. ³⁴ Athu ni athu akhedi ku diakudila mu pila yowu mu ndaka ya ngolu. Kapiteni pila ya kwivwa yakhediku kikuma mayema mahitinginini wa hanini ndjila hengishi Polu mu lupangu lwa asuta. ³⁵ Kiela atula ha zandu a mu zangudidi kudi asuta kikuma kia khabu jia hundji dia athu. ³⁶ Kikuma hundji dia athu dialabanga ni kwakula mu ndaka ya ngolu etshi Mu jiyenu. ³⁷ Tangwa diakhedi kuzola kwingisa Polu mu lupangu mweni walejidi Kapiteni etshi Nia lunga kukuleza ndaka yimoshi. Kapiteni wa mu hula etshi Ayi wenda kwakula ndaka ya Greki. ³⁸ Ayi wushiku mukwa Ngipiti wengishidi ki jieneshi mu yilumbu yahita wanehini asuta akhedi ni mata ku mokhu khama ji wana mu tseki. ³⁹ Polu etshi Ami nidi mu yuda mu kwa vidi dia Tarse ku Silisi. Ami nidi Muthu wa dimbu dia lukumu. Ami nia buba kidi wa kumbula nguleki ni leji athu awa ndaka. ⁴⁰ Tangwa Kapiteni a mu hwedi ndjila Polu wa zanguluka wa thutha kokhu mu kulekisa athu mayema. Kiela a dibata mweni wa yandjika kwakula mu ki Hebreu etshi