¹ Kwakhedi ni yala mumoshi ku Sezare jina dendji diakhedi Korneye fumu dia batayo dia Asuta a ku Loma dienda kutambika batayo dia Itali. ² Wakhedi muthu wa pimbu wakhedi kuhwa Nzambi lukumu ni nzu yendji yoshu. Wa hananga Fwalanga jingi kudi Ayuda wa sambilanga Nzambi tangwa diosu. ³ Mu tangwa dia trwazere dia kingweji wa mweni kimona mesu wandjio mumoshi wa Nzambi wa katukidi ku wulu weza kudi mweni. Wandjio wa mu leza etshi Korneye ⁴ Korneye wa tekitidi mu kumona Wandjio woma wa mu kwata wakula etshi ekhi eyi fumu. Wandjio wa mu leza etshi yisambu yeyi ni kukapa ku wenda kukapila a tsukami a tsukami matula kudi Nzambi mudi makabu. ⁵ Kikimweni tuma athu ku vidi dia Jope eji ni yala mumoshi jina diendji Simoni wenda kutambika epi Petulu. ⁶ Wenda kukhala ni muhangi a yiketa ya mbiji jina diendji Simoni wudi nzu penapena ni meya ma jima. ⁷ Kiela wandjio wakulanga nendji waya Korneye watambika athu jiendji mbadi a kisalu ni musuta mumoshi wa jitisanga Nzambi mu katshi ka owu osu akhedi mu kisalu kiendji. ⁸ Korneye wa walejidi mosu mahitidi he wa watuma ku Jope. ⁹ Kuma ki kwakiedi mu ma tangwa ma midi kiakhedi kaka ni kwenda atudidi penapena ni vidi Petulu wa nini ha yangi mu ku kusambila. ¹⁰ Wevidi nzala ya kudia kima kimoshi. Kashi kiakhedi ku mu lambila kima kia kudia wabwa pevi ¹¹ wamona wulu dianzuluka sanduku dijima dia kulumuka ni kima kimoshi mudi kiandu kijima kiezanga ni kukulumuka ashi a kikwata mu tsongi jioji ji wana. ¹² A katshi ha khedi ambiji a ma maboti ni miendu yiwana ni mitsialanda ni tujila twa ku wulu. ¹⁴ Kashi Petulu etshi Loni Fumu kikuma khandiku kadi nidianga kima kia mvindu ni kia kijila. ¹⁵ Kashi mu mbala ya kiadi ndaka ya wudika epi etshi Eyi ya konda kijila kumesu ma Nzambi wu yi tambika oku yima ya mvindu. ¹⁶ Ma mwijididi mbala jisatu mu mbala yimoshi sanduku dia kandukidi ku wulu. ¹⁷ Kiakhedi Petulu ni kudihula mu kubakisa mambu ma mweni tala a mala atumini Korneye kiela a wa leza ndjila ya nzu atudidi ha kishu. ¹⁸ Atambika mu ndaka ya ngolu ewula yivwa Simoni wenda kutambika Petulu wudi momu. ¹⁹ Petulu wakhedi kaka kudihula mu ma mweni ku thulu Pevi ya mu leza etshi Tala amala asatu a ku kuhenganga. ²⁰ Zanguluka. Tuluka ndanga ni eni. Wivwoku woma mu kwenda nawu kikuma ami nia wa tumini. ²¹ He Petulu wa tuluka wa leza athu mwena wana etshi nidi oyu wu nu kuhenganga ekhi nwejilanga. ²² Eni etshi Kapiteni mumoshi jina diendji Korneye yala masonga wenda kusambila Nzambi kikanda kiosu kia Ayuda kienda ku mu muhanina kithemu kia pimbi a mu lejidi kudi wandjio mu moshi wa Nzambi mu kwiza ku kunona wendi mu nzu yendji evi ndaka ya Nzambi kudi ayi. ²³ Petulu wa wengisa munzu mu kukhala nawu. Mu suka dia labidi wa zangulukidi waya nawu. Kiatshi kia a pangi a ku Jope a washindjikididi. ²⁴ Mu kukhia atudidi ku Sezare. Korneye wa wa makininanga wa tambikishidi a pangi jiendji ni a ndoji enda kushila mutshima. ²⁵ Kiela Petulu wengila Korneye wa zanguluka wa fukama ku mesu mendji mu ku mu jitisa. ²⁶ Petulu wa mu zangulushidi wa muleza etshi Zanguluka ami epi nidi muthu. ²⁷ Tangwa diela Petulu wa manisa luhangub ni mweni wengila mu nzu wa wana athu lawu a wongama. ²⁸ Wa wa leza etshi Enu mweni nwejika etshi yidi kijila kudi mu yuda mu kukhala homa ha moshi ni nzenza to mu kwenda ku mu tala kashi Nzambi wa ndeza etshi ni tambika oku ata muthu mumoshi wudi mvindu to wa kijila. ²⁹ Kieni kioki niejilanga konda kushia pika tangwa di wa tambikanga. Ekhi kia wa tambikilanga. ³⁰ Korneye wa vutudidi etshi kwa hita kadi yilumbu yiwana kaka mu tangwa mwenedi dia trwazere dia kingweji niakhedi kusambila mu katshi ka nzu nia mona muthu mumoshi wa makana wa vwata miledi yitoka ni ku kedia. ³¹ Mweni etshi Korneye yisambu yeyi ayivwa kudi Nzambi Nzambi wa kwibuka mu pila yi wenda kukapila a tsukami. ³² Tuma athu ku jope eji ni muthu mumoshi jina diendji Simoni wenda kutambika epi Petulu. Wenda kujinga mu nzu ya muthu mumoshi wenda kuhanga yima ya yiketa jina diendji Simoni edi mu khulu ya meya majima. ³³ Nia tumini mu mbala yimoshi athu kudi ayi wahanga pimbu mu kwiza. Kikimweni tudi ku mesu ma Nzambi mu kwivwa ma ku leza Nzambi wu tu longi. ³⁴ He Petulu wa kangula kanu wakula etshi Mu kiedika nejika etshi Nzambi kendoku kuhanga kasolangani mu katshi ka athu. ³⁵ Kashi mu thothu yoshu koshu wenda ku mu jitisa ni ku mu muhwa lukumu ni kuhanga mambu ma pimbu wenda ku mu kumbula. ³⁶ Enu nwejiya tsangu ya tumisini ku kikanda kia Yiseledi mu ku wa leza tsangu ya mboti ya ngemba yeza mu ndjila ya Yesu Khidishitu wudi Fumu wa athu oshu. ³⁷ Nwejiya enu mweni mambu mahitidi ku thothu ya Zude yandjika ku Ngadidi kumanima ma mbotika ya longidi Yowani ³⁸ mambu moshu matadila Yesu wa ku Nazaleti kiehi Nzambi wa mu zadishidi ni Pevi ya Longu ni ngolu. Wakhedi kwenda ni kuhanga mambu ma pimbu ni kuwukanga athu oshu akhedi kuyangisa Satana kikuma Nzambi wakhedi ni mweni. ³⁹ Etu tudi etwosu athemu mu mambu moshu ma hangidi ku thothu ya Ayuda ni ku Yeluselemi Yesu mweni wa jihidi ni ku mushia ha Kulundji. ⁴⁰ Muthu mweni Nzambi wa mu tokimishini mu lufwa mu kilumbu kia kisatu wa mwijikishidi keshiku ⁴¹ kudi athu oshu kashi kudi athemu awana athethikididi kusola kudi Nzambi ni kudi etu twadidi ni kunwa nendji tangwa dia tokimini mu lufwa. ⁴² Wa tuhwedi kiyeka kia kulonga makanda ni kuta kithemu etshi wa sodiwidi kudi Nzambi mu kukhala zuji wa athu a moyi ni afwa. ⁴³ Yidi mweni a mbikudi oshu enda kuhanina kithemu etshi koshu wa kwikila kudi mweni wu kunona ndolula ya kubola kwendji mu jina djiendji. ⁴⁴ Tangwa Petulu akhedi ni kwakula kaka Pevi ya Longu ya kulumukini kudi athu oshu akhedi kwivwa tsangu. ⁴⁵ Athu akhedi mu dingulu dia Ayuda awana ejidi ni Petulu ayitukidi kikuma makabu ma Pevi ya longu a ma mwangini kudi a pani. ⁴⁶ Kikuma eni evwanga apani ni kwakula ji ndaka jia kinzenza ni kuhwa Nzambi lukumu. ⁴⁷ He Petulu wa wa vutudila etshi Kiehi twa lunga kuleka kubotika mu meya awa a nona Pevi ya Longu mudi etu. ⁴⁸ He mweni wa tumini a wa botiki mu jina dia Fumu. Eni a mu lombidi akhadi nawu kamwa yilumbu.