¹ Athumwa ni apangi akhedi ku zude evidi etshi apani epi anonini ndaka ya Nzambi. ² Kiedidi Petulu waya ku Yeluselemi akhidishitu a yandjika ku mu londa ni kwakula etshi ³ Ayi wa bundangana ni athu akonda kuwuka wadia nawu homa hamoshi ni eni. ⁴ Kashi Petulu wa yandjika kuwa tendudila mambu ki makhedi. Wa wa leza etshi ⁵ Niakhedi mu katshi ka yisambu ku vidi dia Jope nia mweni mbona mesu ya muledi wujima wakatukidi ku wulu ni kwiza kudi ami ku mokhu ma awandjio awana. ⁶ Nia shianginini nia mona ambiji edi ni miendu yiwana ambiji a mutemu aniokha ni tujila twa ku wulu. ⁷ Nievidi ndaka ya ndeza etshi Zanguluka Petulu jiya wudi ⁸ Nia vutudidi etshi Loni Fumu kikuma kima kia mvindu to kia kijila kia lungidiku kwingila mu kanwa diemi. ⁹ Kashi ndaka mweni yakula epi katuka ku wulu etshi Eyi yidi ya waha kumesu ma Nzambi wu yi nonoku etshi yidi yima ya mvindu. ¹⁰ Mambu mweni mahangimini mbala jisatu kumanima yima mweni ya vutuka ku wulu. ¹¹ Nia mweni amala asatu amakana ha kishu kia nzu yi twa khedi kukhala akatukididi ku Sezare a wa tumuni kudi ami. ¹² Pevi ya ndejidi niendi nawu njdila yimoshi konda kasolangani. A pangi enawana asambenu endidi ni ami twengididi nawu mu nzu ya muthu mwenoyuna. ¹³ Mweni wa tumenika kiehi amweni wandjio wa makana mu katshi ka nzu yendji ni ku mu leza etshi Tuma athu ku jope eji ni Simoni wenda kutambika Petulu. ¹⁴ Wu ku kuhwa tsangu yi ku nu hulusa ni ayi ni atuu jieyi. ¹⁵ Kioki ki nia yandjika kwakula Pevi ya Longu ya kulumuka kudi eni mudi kudi mu luyandjiku. ¹⁶ Niebukidi ndaka ya Fumu yakulanga etshi Yowani wakhedi kubotika mu meya enu aka nu botika mu Pevi ya Longu. ¹⁷ Kinga lo yivwa Nzambi wa wahwa dikabu mudi ethu twa kumbudidi Yesu khidishitu nani nidi ami mu kuleka makula Nzambi e. ¹⁸ Tangwa dievidi mambu menamana a dibata a yandjika kuwa Nzmabi lukumu ni kwakula etshi Nzambi wa hana ndjila kudi apani mu kubaula mitshima aswakadi eni epi kunona moyi. ¹⁹ Mejidi kumwekana etshi awana a mwanginini ku Yeluselemi mu kikuma kia kuniokwama kwa yandjikidi ni lufwa lwa Etiene endidi tii ku Fenisi ku Sipre ni ku Antiosia. Alonganga ndaka ya Nzambi kaka kudi Ayuda. ²⁰ Kashi mu katshi keni akatukidi ku shipre ni ku Sirene endidi ku Antiosia mu kulonga a Greki Tsangu ya mboti ya Fumu Yesu. ²¹ Kokhu dia Fumu diakhedi ni eni lawu dia athu a kwikididi a laba Fumu. ²² Tsangu jiowu jia tudidi ni mu matu ma kwa dibundu dia Yeluselemi Eni atumini Barnabe tii ku Antioshia. ²³ Kiedidi wa tula wa mona mamboti ma Nzambi wakhedi ni kieshi kia ku wahwa kikesa mu ku hangila Nzambi mu mitshima miowu mioshu. ²⁴ Kikuma mweni wakhedi muthu wa mboti wazadidi ni Pevi ya Longu ni lukwikilu lwingi. Athu lawu akangimini kudi Fumu. ²⁵ He Barnabe waya ku Tarse mu kuhenga Sawudi. ²⁶ Kiela wa mu mona weza nendji ku Antiosia. Mvula ya mufumbi akhedi kuwongama ni dibundu ni kulonga athu lawu. Yakhedi ku Antioshia ahwedi alongukimu mbala ya thethi jina dia akhidishitu. ²⁷ Mu tangwa mwenedina a mbikudi a katukidi ku Yeluselemi aya ku Antioshia. ²⁸ Mu moshi mu katshi kowu jina diendji Agabisu wa zangulukidi wakula mu ngolu jia Pevi ya Longu etshi nzala yijima yakheza mu kifutshi. Mambu menama mabwidi mu tangwa dia Kuloti. ²⁹ Alonguki azengidi muthu ni muthu mu pila yenda kumwena mu ku tumisa lusadisu kudi a pangi ku Zude. ³⁰ Eni a hangidi kienekina a tumisa fwalanga kudi a mambuta dibundu ku mokhu ma Barnabe ni Sawudi.