¹ Apangi aluzolu, lukwikiloku pevi jiowu kashi khalenu ni pevi ya kuswashukisa ivwa yidi ya Nzambi kikuma ambikudi aluvunu aya lawu mu kifutshi. ² Kieni kioki nwa kejiya pevi ya Nzambi pevi yoosu yi kwijiyanga etshi Yesu Khidishitu wejidi mu musuni udi Nzambi. ³ Pevi yi kulekanga kwijika Yesu yishiku ya Nzambi. Yidi pevi ya Satana mbeni wa Yesu, yi nwevidi etshi ya keza eyi yidi kadi mu kifutshi. ⁴ Nudi a Nzambi ana jiemi nwawanunga kadi kikuma owu udi kunudienu wa hita owu udi mu kifutshi. ⁵ Edi akwa kifutshi, kieni kioki moosu menda kwakula kifutshi kienda kuwevila. ⁶ Tudi a Nzambi mwoosu wejika Nzambi kaku twiviloku mu ama moosu tu kwijika pevi ya masonga ni ya luvunu. ⁷ Apangi aluzolu tuzolanganenu etu nietu kikuma luzolu ludi lwa Nzambi muosu hudi ni luzolu wabutuka kudi Nzambi wejikepi Nzambi. ⁸ Muthu'owu kendoku kuzola kejiku Nzambi kikuma Nzambi udi luzolu. ⁹ Kieni kioki luzolu lwa Nzambi lwa mwekhinini ku tudietu, kieni kioki Nzambi wa tumishini mwanenji mumoshi kaka mu kifutshi kikuma tu jingi sambu ni mweni. ¹⁰ Kieni kioki zola keshiku etshi etu twa zodidi Nzambi kashi mweni wa tuzodidi, wa tumishidi mwanenji mu moshi mu kufwa kikuma kia masumu metu. ¹¹ Apangi aluzolu ivwa Nzambi wa tuzola, etu epi tuzolanganenu etumweni ni etimweni. ¹² Ata muthu khanduku amonanga Nzambi ivwa twenda zolangana etumweni ni etumweni, Nzambi uku yala lujingu lwetu luzolu lwenji ludi lwa masonga ku tudietu. ¹³ Kieni kioki twejika etshi twenda kujinga ni mweni, mweni nietu kikuma wa tuhwa pevi yendji. ¹⁴ Kieni kioki etu twamweni twa kumbula etshi Tata watumishini mwanendji kikuma ahulushi kifutshi. ¹⁵ Mwosu owu wa kumbula etshi Yesu wudi mwana wa Nzambi, Nzambi wudi ni mweni ni Nzambi. ¹⁶ Kumanima twejikidi he twa kwikila mu luzolu olu Nzambi udi nalu kutudietu. Nzambi udi luzolu, mwosu uku jinganga mu luzolu lweno luna udi ni Nzambi, Nzambi udi mu mweni. ¹⁷ Kikuma kioki, zola dienedina dia waha mukatshi kietu, kumanima tushi mutshima mu kilumbu kia kufundisa, kikuma ki medi kitudi mu kifutshi. ¹⁸ Kushiku ni woma mu zola kima kidi kweni zola dia pimbu dienda kukatula woma, kikuma woma wudi mudi ndola mwosu wudi ni woma zola dia pimbu dia muyaloku. ¹⁹ Twenda kuzola kikuma Nzambi watu zodidi wa thethi. ²⁰ Ivwa muthu wakula niazola Nzambi kashi wenda menga pangienji wudi mukhubidi kikuma owu uku lekanga kuzola pangienji waku monanga ka lumgidiku kuzola Nzambi kendoku kumona. ²¹ Kieni tata tshiku atushila : mwosu wa zola Nzambi afeti kuzola pangienji.