¹ Talenu luzolu lwa Tata Nzambi kudi etu, kikuma atu tambiki ana zia Nzambi, tudi epi ana jienji. Kienikioki athu ha hashi katwiziku, kikuma kejikidiku Tata. ² Apangi jiemi ania hitangana kuzola, ejikenu etshi, twekina ana jia Nzambi lujingu lwa kumesu lea keza kumanima. Kiakela Yesu weza, twaka khala mudi mweni, twaka mumona kitelengi. ³ Kosu muthu wa kumbula mambu ama ma keza kumesu, waka vedila, kikuma Yesu enzi mweni udi wa vedila. ⁴ Owu wuku hanganga kubola tangwa diosu, wenda wa kolama mu jitshiku, kikuma kuhanga kubola kudi kukolama ku tshiku. ⁵ Ejikenu etshi Khidishitu wejidi kidimwekini kudi etumu kikuma ajimi mambu mosu ma bola, kikuma mu katshi ka mweni kubola kwa khaloku. ⁶ Kosu owuna uku khalanga ni Yesu tangwa diosu, kalumgidiku epi kuhanga kubola, kosu owuna uku hanganga epi kubola kamumweniku, kamwijikidiku ⁷ Ana jiemi, lekenu kubila nzila owu uku hanganga ni masonga, udi muthu wa masonga, kikuma Yesu enzi mweni udi muthu wa masonga. ⁸ Owu uku hanganga kubola, udi mwana Satana, kikuma Satana udi wa bola yanjika luyandjiku. Mwana wa Nzambi wejidi kikuma kia kuzanga yisalu yosu ya bola ya Satana. ⁹ Owu wekhina mwana wa Nzambi, ka lungidiku epi kuhanga kubola, kikuma kheni ya Nzambi yekhina mu katshi ka moyi wenji ka lungidiku epi kujinga mu kubola, kikuma wa butuka kudi Nzambi. ¹⁰ Kieni kioki twa lunga kwijiya ana jia Nzambi ni ana jia Satana. Owu uku lekanga kuhanga masonga keshiku mwana wa Nzambi; owu epi uku lekanga kuzola pangienji keshiku mwana wa Nzambi. ¹¹ Kikuma, nwendi nsangu yanjika luyandjiku etshi : tu feti kuzolanganenu. ¹² Keshiku mudi kia khedi Kayina wakhedi ni Satana wa jiyidi mwakhienji ekhi amu jiyididi? kikuma yisalu yenji ya khedi ya bola, ya mwakienji yakhedi ya waha. ¹³ Nu yitungangoku apangi ivwa etshi akwa kifutshi eshiku kunu zolanga. ¹⁴ Ejikenu etshi twa katuka kadi mu lufwa twa nona moyi wa nvula ni nvula, kikuma twenda kuzola apangi zietu. ¹⁵ Owu wa beya pangienji udi muthu wenda wa jinga mu lufwa owu wa kota mukowu tshoki wa mu jiya. Ejiyenu etshi kaka khaloku ni moyi wa mvula ni mvula. ¹⁶ Etu twenda kuzolangana kikuma Yesu waha nini moyi wenji sambu dietetu; etu epi tufeti kudihana kikuma kiapangi jietu. ¹⁷ Kashi ivwa muthu udi ni yima lawu, wenda wemina pangienji udi mu pashi, ku mwivila khenda loni, kieyi luzolu lwa Nzambi luku khala kudi mweni? ¹⁸ Ana jiemi athalu tuzola kaka mu ndaka ni ludimi kashi, mu yisalu ni kiedika. ¹⁹ Kieni kioki twakejika etshi twenda twa jinga ni kiedika mu pila etshi tuhani mithsima metu kudi mweni. ²⁰ Kikuma ivwa mutshima watu bedisa, Nzambi udi mujima wa twijiya, wejiya epi mambu mosu. ²¹ Apangi jiemi ania zola, ivwa mitshima mietu mishiku kutu bedisanga, tudi hanenu kudi Nzambi. ²² Kiosu ki twa lomba , Nzambi wuku tuhwa, kikuma twenda twa zitisa tshiku zienji, ni kuhanga mamabu ma waha makuhwanga kieshi. ²³ Talenu tshiku ja Nzambi yitu feti ku kumbula mu zina dia mwanenji Yesu Khidishitu, tu zolangenu etu mweni mudi kiatu zodidi mweni. ²⁴ Owu uku zitisanga tshiku jia Nzambi, Nzambi udi wenda wa jinga ni mweni, mweni epi wenda wajinga ni Nzambi. Kieni kioki, twejiya etshi mweni udi nietu, kikuma kia muhunga wenji wa tuhwedi.